MATHI 17 - DAÜLANGPÜ LAIHING (BSI)

Hangbong Jeipü

¹ Nyih vok pheikü Jisui büpa mü Peter, Jakob hatü chenaü Johan hathü müei kahshangei jomphong nying aong.

² Büpai jomphong touei hangbong jeile, hatü büpalei dhe vanghe kei, hatü büpalei owhiai nyangnyangtoptopshi shoei vam.

³ Ngangahük kü halei Mosa hi Elijah nyi jom touei vamei büpa mü shah etei.

⁴ Hahepak kü Peteri Jisu kü, “Shembüpa, jenphongü hamü nyudaijü meihen khih; nüngi mongjema ngei tap jem vephüshah; hük nüng shing, hük Mosa shing hatü hük Elijah shing” shei e.

⁵ Büpa shah eyei nyushingkü phum shola peiyei dhüm, hatü phum leipü ngeü hük vamei, “Hapayü ngei bampü Ha, ngei büpa kü mong hahnyeih; büpai epü bangtuh!” shei e.

⁶ Mechem nanglomthüi ha danpa, jomphong kahdokei doei sha, hatü nyempai mateke.

⁷ Shejao Jisu heih-ei jomphong kü hongtü, “Yaongtuh, am tenyem” shei e.

⁸ Mechem jomphong paoei veipa, jomi Jisu monha eepü mü lenei üpaao ne-ee.

⁹ Jomphong kahshang leipü leishingkü Jisui jomphong kü, “Shennyak Ha dipü kübü yangei manglei thahshi hapa manghkhang jung üpa kao te-e” shei ngeükhüam shuoh.

¹⁰ Hahepak kü nanglomthüi büpa kü, “Shejema, mehekei shahkung nyuhbüthüi Elijah shong yiükahen shei enya?” shei phe.

¹¹ Büpai, “Hingmei, Elijah shong yiükünyüke, hatü büpai lemphü temhen;

¹² shejao ngei enyeih, Elijah yiüdaiteke, hatü jomi büpa nenying, jomi mehe mong, ha büpa kü dükshuohnyüke. Hapa keiha Shennyak Ha jomphongei lakmongei shangponghen” shei e.

¹³ Hahepak kü büpai Johan Baptükbü nang enyu khih shei nanglomthüi nying.

Jisui Mang Laanghai Yeppü Naü Meihüpü

¹⁴ Mechem jomphong khongnyü touei peipa, shennyak hük büpa touei peiyei aümei shatü,

¹⁵ “Shembüpa, ngelei hapeü kü phahjishih; mehenangkü büpa kü mohoh yoi nyüpeih, hatü longi shangpongnyüke; büpai chengei aw kü shünyüke, hatü yungei laongnyüke.

¹⁶ Ngei nüngei nanglomthü touei deijapeih, shejao jomphongi büpa nemeiaokpeih” shei e.

¹⁷ Jisui, “Amphong hingnelempü hatü nyongnyongi lüdaipü denhivan, ngei meshük lushi am mü nyukahen? Ngei meshük lushi am mü chemi nyukahen? Büpa ngei touei deikei” shei e.

¹⁸ Jisui mang laangha kü loh, hatü ha büpa leipü vamdai, hatü shaangüng meidai.

¹⁹ Hahepak kü büpalei nanglomthü joei büpa touei peiyei, “Hamphongi ha mekei nechangtükaokpa yo?” shei phe.

²⁰ Büpai jomphong kü, “Am vaipü maanpü nangkü hih. Ngei am kü enyeih, am kü haoyangvang shük dangkao hinglempü nyujema, ammi hapa kahshang kü, ‘Hatoueipü antolei shindaituh’ shei eshuohjü ha shindaiphahen; hatü am shingvaishi neaokbenüng meheyao nechongkahen.

²¹ Shejao henüng keipeyü phoppü hatü shüaeiyunglepai mon changaokhen” shei e.

Jisui Shao Büpa Dihen Nang Epü

²² Jomphong Galilei chemi thaiyei nyushingkü Jisui jomphong kü, “Shennyak Ha hangkulei lak kü yutükhen,

²³ hatü jomi büpa jühen, hatü nyih jempabü kü büpa yangei leihen” shei e. Hapai jomphong longi mongshang.

Jisu hatü Phopshem Lat Shuohpü

²⁴ Mechem jomphong Kapernaum ngoipa, phopshem lat thaipüthü peiyei Peter kü, “Amphongei nyuhbüi phopshem lat neshuohnyu je?” shei phe.

²⁵ Büpai, “Shuohnyüpeih” shei e. Mechem büpa shemei leijapa, Jisui shong ha jung pheyei, “Nüngao mekei deihnya, Simon? Kahdoknyü ongthü kü üami nang hatü lat shuohnya? Bühüthüi hi mih-i shuohnya?” shei phe.

²⁶ Peteri, “Lebüthüi” shei e. Jisui büpa kü, “Shejema, bühüthüyü neshuohhen khih.

²⁷ Shejoongpa, jeni jom huluh neshuohhühen shingvaishi yungchingei heih-ei nyiamphaak shükeishuoh; ha kü manküpü shongpü nyah yah-ei ju kaei veishuohjü poisa phahük danghen, ha yah-ei ji shing shuohtuh” shei eteke.