MATHI 13 - DAÜLANGPÜ LAIHING (BSI)

Sheili Haibüi Lappü

¹ Ha nyih-üng Jisui shem leipü daiyei yungkungei uo.

² Hapa keiha khongnyü longpü büpa shonei thaijapü nangkü büpa ai mongei shüei uo, khong payü yungkungei yaongshi nyu.

³ Büpai jomphong kü douthü longi shahlapi e: Bangtuh! Sheili haibü hük sheili hainüng dai.

⁴ Büpai sheili haishingkü hanei lemshongei vü, hatü outhü peiyei hathü hahtük.

⁵ Lebü hanei kahcheü neshiüpü yaong shangei vü; halei kahcheü longi neshiüpü nangkü lomi nyem phaatei koh.

⁶ Shejao mechem vanghe vam, hathü ngatdai, hatü tünglang neshiüpü nangkü kaudai.

⁷ Sheili hanei hüh chi kü vü, hatü hüh longei jom lümlang.

⁸ Hanei kahmeichong kü vü, hatü hanei kho lomei, pejem lomei, hapüan lomei betjük jük.

⁹ Dhaong kohpü peüi bangtuh!

Shahlap Epü Mükhong

¹⁰ Hahepak kü nanglomthü peiyei büpa kü, “Nüngi mehekei jomphong kü shahlap mü eshuohnya?” shei e.

¹¹ Büpai jangei e, “Amphong kü payü vangsho ongching doujo nyinghen shuohteke, shejao jomphong kü payü mangshuohpih.

¹² Üami ang, hathü kü nyeishi shuohhen, hatü jom nyeishi anghen; shejao meheyao ne-angpü am leipü maani nyupeyao yahlanghen.

¹³ Ngei jomphong kü shahlap mü epü lappeyü, jomi veinyüke, shejao ne-eenyu, jomi bangnyüke, shejao nedannyu hatü nyingei neyahnyu.

¹⁴ Jomphong keyü Isaiah thibüi epü ha jiünyüke: Ammi düngei banghen, shejao nedanhen, hatü ammi veihen, shejao ne-eehen.

¹⁵ Mehenangkü hapa nanglakthülei mongdang bawdaiteke, hatü danpai jomei dhaong hüdaiteke, hatü jomei mük ngühdaiteke. Hei nevailangmeyü jomei müki eehen, jomei dhaongi ha danhen; jomei mongdangi nyingei yahpai mong lepei leihen, hatü ngei jom meitükhah shepeih.

¹⁶ Shejao ammei mükthü moihiman; mehenangkü hathüi eenyüke, hatü ammei dhaongi dannyüke.

¹⁷ Hingmei ngei eshah, thibüthü hatü daülangpü shennyakthü longi ammi mehe ee, ha eehüei ongyangei nyupeih, shejao ha ne-ee; hatü ammi mehe dan, ha danhahhüei nyupeih, shejao jomi ha nedan.”

Jisui Sheili Haipü Nih-ei Enyüke

¹⁸ Shejema sheili haipü jung shahlap bangtuh.

¹⁹ Mechem hanei ami hapa ongching jung epü shah bangtü nyingei neyahhen, mongdangei mehe sheili haiyei tuh, kahshih peiyei ha aetei lüdainyeih; lemshongei haipü sheiliyü ha hih.

²⁰ Yaong shangkü vüpü sheiliyü ha hih; hanei ami hapa shah dantü monghumpai lomi yahnyüke;

²¹ shejao hapa shennyakü tünglang neyiüpü nangkü kansho hük mon nyunyüke, hatü mechem hapa shah nangkü shanghah nevaijü shüveidoidei peihenshang, hapa shennyak lomi dodainyeih.

²² Hüh chi kü vüpü sheiliyü ha hih; hanei ami hapa shah dannyüke, shejao kahdok yangnyu chudeih mongshang hatü mop vaüpai hapa shah lümtükhünyeih hatü betjük nejüki leidainyeih.

²³ Shejao kahmeichong kü vüpü sheiliyü ha hih; hanei ami ha shah bangtü nyingei yahnyüke, hatü kho lomei, pejem lomei, hatü hapüan lomei betjük jüknyüke.

Hah hatü Nüklangthüng

²⁴ Büpai jomphong kü lebü shahlap hük e: “Vangsho ongchingü shennyak hük laophülei kahlei sheili haipü hük leshi nyüke.

²⁵ Shejao mechem shennyakthü shidaipa, vepa hük peiyei hah chi kü nüklangthüng vang haiphongtü lüdai.

²⁶ Hanangkü mechem hah nyem phaatei vampa, hahepak kü nüklangthüngao koh.

²⁷ Shem shembülei aathüi peiyei büpa kü, ‘Shembü, nüngi kahlei sheili meipü mon nehaiangpü je? Shejema meleipü nüklangthüng kohpa?’ shei phe.”

²⁸ “Vepa hük peiyei haiphongpü khih” shei e. Aathüi büpa kü, “Shejema hamphongi ha bhitükshah nyuo?” shei e.

²⁹ Shejao büpai, “Tah, ammi thüng bhishingkü hah-ao omshi bhitükhen aokpeih.

³⁰ Hahvet hepak ngoishi chemi nyemlong. Ngei hah vetbüthü kü shongei thüng shong vetei phongtü aw kü jaktüktuh; hapheikü mon hah vetei puongei kolangkei shei ehen” shei eteke.

Haoyang Vangi Lappü

³¹ Büpai jomphong kü lebü shahlap hük e: Vangsho ongchingü shennyak hüki haoyang vang yah-ei laophülei kahlei haipü hük leshi nyüke.

³² Hapayü sheili vangthü khongkü peü mü maanpüba, shejao mechem ha koh-ei longhen sheili khongkü longpüba hatü pü hük leinyüke, hatü halei shangouthü peiyei pükaothü kü jep lingnyüke.

Daw-i Lappü

³³ Büpai jomphong kü shao lebü shahlap hük e: Vangsho ongchingü nyüha hüki daw yah-ei aanthüng dok jem kü ha mangpaai thahshi vukpükei nyüke.

Jisui Shahlap Nopü

³⁴ Jisui khongnyü kü ha douthü peü shahlapi e; shahlap ne-omi büpai jomphong kü meheyao ne-e.

³⁵ Hapayü thibü homei epü jiühühen shingvaishi vamteke: Ngei shahlapi ngelei ju aphen, kahdoknyü linghinüng joshi nyupü douthü jung ehen.

Jisui Nüklangthüngi Lappü Nihnyüke

³⁶ Hapheikü büpai khongnyü tuhtü shem mongei shü. Büpalei nanglomthü büpa touei heih-ei, “Kah kü nüklangthüng haipü jung shahlap nih-ei eshih” shei e.

³⁷ Büpai e, sheili meipü haipü shennyakü Shennyak Ha;

³⁸ Kah lappeyü kahdoknyü, hatü meipü sheiliyü ongching kü hapeüthü, hatü nüklangthüngü kahshihlei hapeüthü,

³⁹ hatü vepa üpai thüng vang hai, hapayü kahshih; hahvetpeyü kahdoknyü den dohpü, hatü hah vetpüthüyü vangsho phongshanthü.

⁴⁰ Nüklangthüng thaiyei aw kü jaktükpü keiha, kahdoknyü den dohpü mü hapakei nyuhen.

⁴¹ Shennyak Ha-i büpalei vangsho phongshan shomhen, hatü büpalei ongching kü mang thahhüpüthü hatü mang dükpüthü peü thaihen,

⁴² hatü hathü awbhaongei shüktükhen; halei theppüyoungpü hatü bha vükpü nyuhen.

⁴³ Hahepak kü jomei Chepalei ongching kü daülangpüthü vanghenyü kei nyahen. Dhaong kohpü peüi bangtuh!

Shahlap Jem

⁴⁴ Vangsho ongchingü kah hükei kahmong mop nyupü leshi nyüke. Hanei ami ha dangei jophongtü mongongshi daiyei laophü angpü lemphü yutü ha kah shakpükei nyüke.

⁴⁵ Shao, vangsho ongchingü bhei leihbü hük meipü yüknyü yempükei nyüke.

⁴⁶ Büpai bhei longi shangpü yüknyü hük dangei laophüi angpü peü yutü ha shakpükei nyüke.

⁴⁷ Shao, vangsho ongchingü yungching kü shang haentü nyahlem laolao yeppü leshi nyüke.

⁴⁸ Mechem shangmong mahhen, yungphaangei shüei leinyüke, hatü uotü meipü nyah peü tuw mongei hünyüke, shejao nemeipü peü yaktüknyüke.

⁴⁹ Hapa keiha kahdoknyü den dohpü hepak kü nyuhen. Vangsho phongshanthü yiüei daülangpüthü kübü mangthü khaattükhen,

⁵⁰ hatü jom awbhaongei shüktükhen; halei theppüyoungpü hatü bha vükpü nyuhen.

Mop Chang hatü Mop Ja

⁵¹ Jisui, “Amphongi hathü peü nyingla?” shei phe. Jomphongi, “Dantepih” shei jang.

⁵² Büpai jomphong kü, “Hanangkü vangsho ongching shingvaishi nyuhtükpü shahkung nyuhbüthüyü shem shembü hük laophülei mop tuhshing leipü mop chang mop ja peü ngaipükei nyüke” shei e.

Nazarethlei Jisu Neyahpü

⁵³ Mechem Jisui hapa shahlapthü nyuh-ei kempa, büpa layaongei,

⁵⁴ laophülei ching yemei leiyei Sinagoglei nanglakthü kü nyuhhen chongpang, hatü nanglakthüi büpa kü yashanei, “Hapa shennyaki meleipü kihikon, hatü yashanpü dou dükhen ngan dangpa yo?” shei phe.

⁵⁵ “Büpayü mistripalei cheha nevaipü je? Chenyü-ü Mary hatü chenaüthüyü Jakob, Joseph, Simon hatü Judas hathü nevaipü je?

⁵⁶ Hatü büpalei chenaü nyühathü jen mü nenyupü je? Shejema hapa shennyaki hathü meleipü dangpa?” shei eteiteke,

⁵⁷ hatü jomi büpa kü huluh shuoh. Shejao Jisui jomphong kü, “Laophülei kahmük hatü ching nevaipheikü thibü hük kü peülei dhüm hunyeih” shei e.

⁵⁸ Jomi hingnelempü nangkü büpai halei yashanpü douthü longi nedük.