MATHI 12 - DAÜLANGPÜ LAIHING (BSI)

Sabbath Thempü Nang Phepü

¹ Hahepak kü Jisui Sabbath nyih kah homei dai; büpalei nanglomthü aeiyei nyu, hatü jomphongi hahmai shitei hahhen chongpang.

² Mechem Pharisee ami ha eepa, jomphongi büpa kü, “Veituh, nüngei nanglomthüi Sabbath nyih shahkung kü nejiüpü dou düknyüke” shei e.

³ Büpai jomphong kü, “David hatü büpalei küphüthüi aeishingkü mehe dükpa, ha amphongi ne-ieangpü je?

⁴ Büpai Kahvangei shemei shüei ngongpathü mü lenei büpa hatü büpalei küphüthüi hahhen shahkungi nemongpü daütükpü moila hahying hahteke.

⁵ Nevaijü Sabbath nyih ngongpathüi phopshem mongei Sabbath mangtü jomphong pungpeih shei nenyonghüpü shahkungei nyangpü neieangpü je?

⁶ Ngei am kü enyeih, phopshem mao nyeipü hamü nyüke.

⁷ Shejao, ‘Ngei jakpü moila nevai, bampü nanyüpeih’ shei epü lappü mehe ha amphongi nyinglang meyü amphongi nepungpü am nenyonghühah shepeih.

⁸ Mehenangkü Shennyak Hayü Sabbath kü shembü” shei e.

Lak Mangdaipü Meihüpü

⁹ Büpa hatoueipü daiyei Sinagoglei shü,

¹⁰ hatü halei shennyak hük lak mangdaitü nyu, hatü jomphongi büpa kü, “Sabbath nyih hapa meihühen shahkung kü jiüla?” shei phe. Jomi hayü büpa nyonghühen yemteke.

¹¹ Büpai jomphong kü, “Nyingshah-i amphong khongkü shennyak hükei mi hük mon nyüke, hatü ha Sabbath nyih kahshalei vüjema amphongi ha kü düktü shüei neanhen je?

¹² Mi hük mü shennyak hük meshük longpüang! Hanangkü Sabbath nyih doumei dükhenü shahkungi mongpeih” shei e.

¹³ Hapheikü büpai hapa shennyak kü, “Nüngei lak lantuh” shei e. Büpai lak lanshingkü lebü kei meidai.

¹⁴ Shejao Pharisee am daiyei büpa khüei mekei etü jühen shei phaüshah showteke.

Kahvangi Jelangpü Chongphobü

¹⁵ Mechem Jisui ha kon nyingpa, büpa haleipü lüdai. Khongnyü longi büpa phei mü, hatü büpai jom peü meihütük,

¹⁶ hatü jomphong kü büpa jung nenyinghühen ngeükhüam shuoh.

¹⁷ Hapayü Isaiah thibü homei epü jiühühen shingvaishi vamteke:

¹⁸ “Ngei jelangpü ngelei chongphobü hatouei nyüke, ngei bampü, büpa kü ngelei laanghai mong hahnyeih. Ngei ngelei laangha büpa kü shihshuohhen, hatü büpai jatthü kü shahhing baonghen.

¹⁹ Büpai shah nedakteihen, nevaijü nelenhen; üpaiyao chingshongei büpalei ngeü nedanhen.

²⁰ Büpai shahhingi aokpü mangdang thahshi laamdaipü pingu hükao nebhagtükhen, nevaijü metdaihen mü nyupü aw büpai nemettükhen.

²¹ Büpalei men kü jatthüi monglempü nyuhen.”

Jisu hatü Beelzebul

²² Hapheikü jomphongi büpa touei mang laanghai yeppü shennyak hük mükao phüngdai shah-ao ne-e-i müei dei, hatü Jisui büpa meihü, hatü büpai shah-ao eaok, mükiyao eeteke.

²³ Khong peüi thamaei, “Hapayü David Ha je?” shei etei.

²⁴ Shejao mechem Pharisee ami ha danpa, jomphongi, “Hapayü kahshihthülei vanglem lembü Beelzebulei ngan homei büpai kahshihthü changnyu khih” shei e.

²⁵ Jomphongi mehe deih, büpai ha nyingei büpai jomphong kü, “Ongching hük laophü khüei hanpeyü dodainyeih, hatü mepa chingnyü nevaijü shemong laophüi laophü khüei hanhen neyaongaoknyih.

²⁶ Satani Satan changaokjema büpa laophü khüei hannyüke; shejema mekei etü büpalei ongching yaongaokhen?

²⁷ Ngei Beelzebulei ngani mang laangthü changtükjema, ammei mang laangha changteipüthüi üpa homei jom changnya? Hanangkü jomphongü ammei shahphenbüthü vaihen.

²⁸ Shejao Kahvang Laanghai ngei mang laangthü changjema, Kahvang ongching am touei peiteke.

²⁹ Nevaijü wong kohpü shennyak shong yepei neshatükphei kü mekei etü shennyak hük wong kohpü shennyakei shemei shüei dou aetaokhen? Hapakei dükjü mon büpai shemei shüei dou aetaokhen.

³⁰ Üpa ngei mü nenyu, büpa ngei khüei nyüke, hatü üpai ngei mü nethai, haitüknyeih.

³¹ Hanangkü ngei am kü enyeih, shennyakthü kü mang hatü eelaei epü mang peü tükhen, shejao Laangha Daülangpü khüei thahpü mang netükhen.

³² Üami Shennyak Ha khüei shah ehenshang, ha mang tükhen, shejao üami Laangha Daülangpü khüei mang thahhen, hapa den nevaijü ngoikahen den kao mang netükhen” shei e.

Pü Hük hatü Hapalei Betjük

³³ Meipü betjükpü sheituh, shejema hapalei betjük meishi chongkahen; nemeipü betjük pü sheijema hapalei betjük nemei-i chongkahen; mehenangkü pü hükü hapalei betjük homei nyingnyüpeih.

³⁴ Amphong biüei hapeüthü! Am nemei-i tuhtü mekei meipü jung ammi enya? Mehenangkü mongei maei deihpü kübü julei vamei enyeih.

³⁵ Shennyakmei-i meipü dou jaoei tuhpü leipü doumei ngainyeih, hatü shennyakteni nemeipü dou jaoei tuhpü leipü nemeipü dou ngainyeih.

³⁶ Ngei am kü enyeih, shahphenpü nyih shennyak peüi laophüi etükpü nelishah peü kü shahnyok shuohhen;

³⁷ mehenangkü nüngei shah-i nüng dahshakhen, nüngei shah-i nüng nyonghen.

Jonah Homei Nyangeihepü

³⁸ Hahepak kü shahkung nyuhpü hatü Pharisee am hanei büpa kü, “Nyuhbü, hami nüng leipü nyangeihepü hük eehüangke” shei eteke.

³⁹ Shejao büpai jomphong kü, “Hapa mang hatü mükbongjuyung denhivani nyangeihepü yemnyüke, shejao Jonah thibü homei vampü nyangeihepü mü lenei meheyao neshuohpih.

⁴⁰ Mehenangkü Jonah nyih jem, ya jem nyah-ei vom mongei nyupü keiha Shennyak Hayao nyih jem ya jem kahdok mongei nyuhen.

⁴¹ Shahphenpü nyih kü Nineveh nanglakthü yaonghen hatü am nyonghühen; mehenangkü jomi Jonah-i chongvenpü kü mong lepteke, hatü veituh, Jonah mao longpü lemhük hamü nyüke.

⁴² Shahphenpü nyih kü Sheba am onglanyü yaonghen hatü am nyonghühen; mehenangkü pinnyüi Solomonei kihikon shah banghen shingvaishi jomei tailu kahdok leipü peipeih, hatü veituh, Solomon mao longpü lemhük hamü nyüke” shei e.

Mang Laangha Nyokei Leipü

⁴³ Mechem mang laangha shennyak hük leipü vamei daihen, ha yung neshiüpü kahmük kü nyiumei yemei longteinyeih, shejao shing nedangjema,

⁴⁴ laophü nyingi, “Ngei vamei daipü shemei shao nyokei leishah” shei enyeih. Mechem nyokei leihenshang, shem kong, nyüphinya maoei jungtüktü eenyüke.

⁴⁵ Hahepak kü ha daiyei shao lebü mang laangha nyet ha mao nyeinya nemeipü müei shüei halei nyunyeih; hatü shongeipü meyü pheilei-üng hapa shennyakü nemeipüba nyunyeih. Hapa keiha hapa nemeipü denhivan nyuhen.

Jisulei Shem am

⁴⁶ Mechem büpa khongnyü kü shah eyei nyupa, chenyü hatü chenaüthüi büpa mü shah eteihüei yaongshi nyu.

⁴⁷ Hanei ami büpa kü, “Veituh, anyü hatü naüpeüthü nüng mü shah eteinüng chingshelei yaongshi nyüke” shei e.

⁴⁸ Shejao büpa kü ha eshuohpü shennyak kü Jisui, “Ngelei onyü hatü naüpeüthü üamang?” shei e.

⁴⁹ Büpalei nanglomthü kü lakjaangi hutü, büpai, “Ngelei nyü hatü naüpeüthü hamü nyüke!

⁵⁰ Mehenangkü üami vangsholei nyupü Opa-i mongpü düknya, jomphongü ngelei jeihinaü, nyahinaü hatü nyü” shei eteke.