MATHI 11 - DAÜLANGPÜ LAIHING (BSI)

Johan Baptükbüi Shompü Phongkangbü

¹ Shaang mechem Jisui büpalei nanglom anpünyi kü nyuh-ei kempa, büpai haleipü shahjangmei nyuhhen hatü baonghen shingvaishi jomei chingnyüthülei dai.

² Johan khoklatei nyushi Messiah-i mehe dük, ha jung danei, büpai büpalei nanglom homei shah shomei,

³ büpa kü, “Hük peikahen shei nyupeyü nüng vaipü hi hami lebü hük omdanhen?” shei e.

⁴ Jisui jomphong kü, “Leituh, hatü ammi mehe dan hatü eepa, ha Johan kü hapakei eyeishuoh:

⁵ Mükphüngpathüi eenyüke, la khopüthü kamaoknyüke, ngombüthü daüdainyüke, aangdaipüthü dannyüke, didaipüthü yangei leishihnyüke hatü taopathü kü shahjangmei chongvennyüke.

⁶ Üami ngei kü huluh neshuoh jom moihiman” shei e.

⁷ Jom lüdaiyaki Jisui khongnyü kü Johan nang ehen chongpang: “Amphongi jahpanei mehe kü veinüng shanya? Vanglüki pingu aülaühüpü veinüng hiang?

⁸ Shejema mehe kü veinüng shanya? Hanei ami ow meipü owpü kü veinüng hiang? Veituh, ow meipü owpüthüyü ongshemei nyüke.

⁹ Shejema amphongi mehe kü veinüng shanya? Thibü hük veinüng dainyu je? Hih, ngei am kü enyeih, thibü mao longpü hih.

¹⁰ Hapayü büpa nang nyangpeih: Veituh, ngei nüng shekü ngelei shahjang kobü shomnyeih, büpai nüng shekü nüngei lem temhen.”

¹¹ Hingmei ngei am kü enyeih, nyüi paipü moi khongkü Johan Baptükbü mü longpü nevamangpih, shejao vangsho ongching kü peü mü maanpübayü büpa mao longpüba vaihen.

¹² Johan Baptükbülei nyih kübü shaang thahshi vangsho ongchingü shüveihah-ei peinyüpeih, hatü shüveipai wongi aokhen khenyüke.

¹³ Mehenangkü Johan peishe thahshi mon thihivamthüi hatü shahkungnyüi teteivanei epeih.

¹⁴ Amphongi hapa yahhen mongjema, peikahen nyupü büpayü Elijah hih.

¹⁵ Üpa kü dhaong kohshi nyu, büpai bangtuh.

¹⁶ Shejao ngei mepa mü hapa denhivan sheteiphenhen? Jomphongü bhei leihshingei uoshi nyupü hashihthü leangke, hatü hüki hük kü lenei nyüktü eteinyüke:

¹⁷ “Hami am shing liping vüng, shejao amphongi oei nephauktei; hami mahng kesho lok, shejao ammi mahng nethep.”

¹⁸ Mehenangkü Johanü hah-ao nehah, yingao nenyingi pei, hatü jomi, “Büpa kü kahshih nyüke” shei e.

¹⁹ Shennyak Ha hah-ei yingei pei hatü jomi büpa kü, “Hahnem hatü yiü chokpa, lat thaibüthü hatü mangthülei mongjempa kü veituh!” shei enyüke. Shejao pinnyülei doui kihikonü dahshakhüteke.

Hingnelempü Chingnyüthü

²⁰ Hapheikü büpai ngan homei yashanpü dou dükpü chingnyüthü kü jomi mong neleppü nangkü lohteke.

²¹ Korazin am onyükei! Bethsaida am onyükei! Am kü dükpü yashanpü douthü paoh Tyre hatü Sidon am touei düklangmeyü jomü dhoila ashak ümtü depla nyiotü shelei mebü mang lah-ei mong lephah shepeih.

²² Shejao ngei am kü enyeih, shahphenpü nyih keyü am leimeyü Tyre hatü Sidon am kü-üng nyeinya phahji huhen.

²³ Hatü Kapernaum am! Am vangsho thahshi longei aonghen je? Nevai, amü molo awlei shüei shaamhen. Am kü dükpükei yashanpü douthü Sodom am kü düklangmeyü shinnyih thahshi jom nyuhah shepeih.

²⁴ Shejao ngei am kü enyeih, shahphenpü nyih-ü am leimeyü Sodom kahdok kü-üng nyeinya phahji huhen.

Jisui Chepa kü Men Vihpü

²⁵ Hahepak kü Jisui e, “Ngei nüngei men longnyeih, Opa, vangsho hatü kahdoknyü Shembüpa; mehenangkü nüngi hathü douthü kon kohpü hatü nahpülangpüthü kübü jolang hatü aküngnaühathü kü ha shakei vamhüteke.

²⁶ Hih, Opa, hapayü nüngi mongpü hük nyuteke.

²⁷ Dou peü Opa-i ngei kü lanei shuohteke; hatü Pa mü lenei Ha üpaiyao nenying; hatü Ha mü lenei hatü Ha homei büpa shakei vampü nyinghen shingvaishi jepüthü mü lenei üpaiyao Pa nenying.”

²⁸ Amphong nyiupünangpü hatü hanggovih kopüthü ngei touei peikei, hatü ngei amphong kü nyiushemmei yahphahen.

²⁹ Nüngi ngelei pang paituh, hatü ngei leipü nyinghahtuh; mehenangkü ngeiyü mongdangei nenteiaokpü hatü inyainyemi nyüpeih, hatü nüngei laangha shing nyiumei danghen.

³⁰ Mehenangkü ngelei pangü yoshi, hatü ngelei hanggo-ü shangkhah-i nyüpeih.