MATHI 10 - DAÜLANGPÜ LAIHING (BSI)

Nanglom Anpünyi

¹ Hapheikü Jisui büpalei nanglom anpünyi nyükei jomphong kü mang laanghathü changhen, dinlem hatü tüngpü lemphü meihen wong shuoh.

² Hathüyü nanglom anpünyilei menthü: Shongpü kü Simon, üpa kü Peter sheiyao nyüknya, hatü chenaü Andrew; Zebedeelei cheha Jakob hatü chenaü Johan;

³ Philip hatü Bartholomia; Thomas hatü lat thaibü Mathi; Alpheaslei cheha Jakob hatü Thaddaeus;

⁴ Kanan am Simon, hatü Judas Iskariot, üpai büpa luhahpa.

Anpünyi kü Kangpü Dou

⁵ Jisui jom anpünyi kü hapakei ventü shom: Kung am touei meleiyao tedai, hatü Samaria amei jilalei teshü,

⁶ shejao Israel am phang mahdaipü mithü touei daituh.

⁷ Am daishingkü, “Vangsho ongching yopailei nyüke” shei ha shahjangmei baongeishuoh.

⁸ Tüngpü meihütuh, didaipü yangtuh, ngompüthü daütüktuh, mang laangthü changtüktuh. Amphongi lop neshuoh-i ha dangpeih, lop neyah-i yah-eishuoh.

⁹ Ammi hon, ngin nevaijü laktetnyiam hüei tedai,

¹⁰ khoung teko nevaijü bhagthuh nyi, nevaijü lathuh nyi teko, hatü lenshuoh teno; mehenangkü dou dükbüi laophülei hean danghen shangpeih.

¹¹ Mepa jila nevaijü chingei am peihenshang, üami am mongmeishi yah-aokhen ha veituh, hatü manglei thahshi jom shemei nyutuh.

¹² Ammi shemei shüjü jom kü selam shihtuh.

¹³ Jom shemi am mongongshi yahjema, ammei chingmei selam jom shemei nyemnyu; shejao jomi am mongongshi neyahjema, ammi selam etükpü nyokei leilangtuh.

¹⁴ Shemong hanei-i nevaijü ching am hanei-i am mongongshi neyahjema nevaijü ammei shah nebangjema am leidaishingkü jom shem nevaijü jom ching am kü ammei la kübü bhihla kaongtüktü leidaituh.

¹⁵ Hingmei ngei am kü enyeih, shahphenpü nyih kü hapa ching nevaijü jila leimeyü Sodom hatü Gomorrah am kü-üng nyeinya phahji huhen.

Shüveidoidei Peihen Nang

¹⁶ Veituh, ngei amphongü shuw chi kü mi keiha shomnyeih; hanangkü biü keiha nahshi nyutuh, hatü athuba keiha lapja-i nyutuh.

¹⁷ Amphongi jom kü lituh; mehenangkü jomi am shahphen shingei müei deihen, hatü Sinagoglei jomi am kü bheiphahen;

¹⁸ hatü ngelei men tata kü jom hatü Kung am touei denpü hük vaihen nangkü am governor hatü ongthü touei shüei deihen.

¹⁹ Mechem jomi am lanei shuohhen, ammi mekei ehen, mehe ehen shei mongteshang; ammi mehe ehen ha hepak kü ngei am kü yahphahen.

²⁰ Mehenangkü ha shah-ü ammi enyu nevai, shejao ammei Palei Laanghai ha am homei ehünyeih.

²¹ Jeihinaüi jeihinaü jütükhen nangkü yutükhen, pa-i ha yuhen, hatü hapeüthüi nyühipa khüei yaonghen hatü jütükhen.

²² Ngelei men kü peüi am kü jiühitphahen. Shejao üpai dohpü ngoishi nenaokhenshang yanghen.

²³ Mechem jomi am kü jila hükei shüveiphahen, hükpalei nyaidaituh; mehenangkü hingmei ngei am kü eshah, Shennyak Ha yiüshekü amphong Israel jilathü peü kü daiyei nekemi nyuhen hih.

²⁴ Nanglom hükü nyuhbü dok kübü, nevaijü aa hükü shembü dok kübü nevai;

²⁵ nanglom hüki nyuhbü kei nyuhen, hatü aa hük shembü kei nyuhen changpeih. Shemong kü shangjing hük kü Beelzebul shei nyükjema, aopü shem am keyü ha kao nemeipüba nyükphahen.

Üpa kü Nyemhen

²⁶ Hanangkü jom kü tenyem; mehenangkü shakei nevamhen meheyao küpei neshiü, hatü nenyinghen doujo mepayao nechongkahen.

²⁷ Ngei nyak kü am kü mehe enya, ha nyihnüng eyeishuoh, hatü mehe ammi nümei epü dannya, ha shem adokei aongei leneishuoh.

²⁸ Üami büm mon jütü laangha nejüaok, hathü kü tenyem, shejao üpai laangha hatü büm nyiphen molo aw kü mahtükaok, büpa kü nyemtuh.

²⁹ Poisa phahük kü ajekha nyi neyunyu je? Shejao hathü khongkü hükao ammei Pa-i nemongpü kü kahdokei nevühen.

³⁰ Nüngei shangjing leipü shokuk kemei ietüktü nyüke.

³¹ Hanangkü am tenyem; mehenangkü ajekha longi meyü amphong-üng nyeinya longpüba.

Khrista Lahtü Shao Yaktükpü

³² Hanangkü üpai mih touei ngei lahhenshang, ngeiyao vangsholei nyupü Opa touei büpa lahhen;

³³ shejao üpai mih touei ngei nelahhen, vangsholei nyupü Opa touei ngeiyao büpa nelahhen.

Chingmei Nevai, Shejao Yanlu

³⁴ Ngei kahdoknyülei chingmei koei yiüpeih shei tedeih. Ngei chingmei nevai, shejao yan koei yiüpeih.

³⁵ Mehenangkü ngeiyü hapeüi pa khüei, yiükhai nyü khüei, hatü cheli-i chenyei khüei yaonghen;

³⁶ hatü shennyak hükei vepayü shem am vaihen.

³⁷ Üami ngei mü nyeishi laophülei nyühipa kü bamhenshang, büpa ngelei nanglak vaihen nechang; hatü üami ngei mü nyeishi laophülei hapeüthü kü bamhenshang, büpa ngelei nanglak vaihen nechang,

³⁸ hatü üami shophang paitü ngei pheilei nemü, büpa ngelei nanglak vaihen nechang.

³⁹ Üami laophülei yangnyu dangnya, ha mahtükhen, hatü üami ngelei men kü jomei yangnyu mahtükhen, ha danghen.

Lakleithü

⁴⁰ Üami am mongongshi yah, jomi ngei mongongshi yahnyüke, hatü üami ngei mongongshi yah, jomi ngei shompüba mongongshi yahnyüke.

⁴¹ Üami thibü hükei men kü thibü hük mongongshi yah, thibülei laklei danghen, hatü üami daülangpü shennyakei men kü daülangpü shennyak mongongshi yah, daülangpü shennyakei laklei danghen;

⁴² hatü üami yung shong hük dangkao ngelei nanglom maanpüthü khongkü hük kü dangkao shuohhenshang, ngei hingmei enyeih, hapa laklei nemahhen.