MARK 9 - DAÜLANGPÜ LAIHING (BSI)

¹ Nedoh-i büpai jomphong kü, “Hingmei ngei am kü enyeih, hatouei yaongshi nyupü hanei-i Kahvang ongching ngan kü yiüpü mangee thahshi nedipih” shei e.

Hangbong Jeipü

² Nyih vok pheikü Jisui büpa mü Peter, Jakob hatü Johan hathü müei shaopü kahshangei jomphong mon aong. Büpa jomphong touei hangbong jeile,

³ hatü büpalei büm-ow nyangnyangtoptopshi shoshi kahdoknyü kü üpaiyao hapakei ashak nedhuaokhen mü vam,

⁴ hatü halei jom touei Elijah hatü Mosa nyi vamei Jisu mü shah etei.

⁵ Hahepak kü Peteri Jisu kü, “Nyuhbü, jenphongü hammü nyupü meihen khih; hamphongi tap jem veshah, hük nüng shing, hük Mosa shing, hatü hük Elijah shing” shei e.

⁶ Büpai mehe ehen nenying; mehenangkü jomphong nyemei nyuteke.

⁷ Hahepak kü phum peiyei jomphong kü jüm, hatü phum leipü ngeü hük vamei, “Hapayü ngei bampü Ha: büpa kü bangtuh” shei e.

⁸ Mechem jomphongi hantü shinei veipa, jom mü üpayao nenyu, shejao Jisu mon nyu.

⁹ Jomphong kahshang leipü leishingkü Jisui jomphong kü Shennyak Ha dipü kübü yangei manglei thahshi ha jung üpa kao te-e shei ngeükhüam shuoh.

¹⁰ Hanangkü jomi dipü kübü yangei leipü sheiyü mehe kü lapei enya shei pheyei mongei mon jaoshi tuh.

¹¹ Hapheikü jomi büpa kü, “Shahkung nyuhbüthüi Elijah shong yiükahen shei mehekei enya yo?” shei phe.

¹² Büpai jomphong kü, “Hingmei Elijah shong peikahen, hatü büpai lemphü temhen. Shejema mekei etü Shennyak Ha longi shangponghen hatü nyonghühen shei lai kü nyangpa?

¹³ Shejao ngei am kü enyeih, nyangei nyupükei Elijah yiüteke, hatü büpa kü jomi dükhüpükei dükteke” shei e.

Jisui Mang Laangi Yeppü Hashih Hük Meihüpü

¹⁴ Mechem jomphongi aopü nanglomthü touei peipa, jomphongi hathü shonei khong thaiyei ee, hatü shahkung nyuhbüthü hanei jom mü shah dakteiyei nyu.

¹⁵ Mechem khongnyüi büpa eepa, jomphong longi yashan, hatü mokei heih-ei büpa kü selam shuoh.

¹⁶ Büpai jomphong kü, “Amphongi hathü mü mehe kü shah dakteinya?” shei phe.

¹⁷ Khong chi kübü hanei-i büpa kü, “Nyuhbü, ngei nüng touei mang laanghai yeppü ngelei ha müei deipeih; büpai shah ne-eaoknyih;

¹⁸ mechem hapai yephen, büpa doei shüknyüke, büpalei ju kü yung-op vamei, bha ketei, büm kemei haendainyüke. Ngei nüngei nanglomthü kü ha changtükshih shei eshuohpeih, shejao jomi ha neaoknyu” shei e.

¹⁹ Büpai jomphong kü, “Amphong hingnelempü den, ngei am mü meshük lushi nyukahen? Ngei meshük am mü lushi chongkününg? Büpa ngei touei deikei” shei e.

²⁰ Jomi ha naü Jisu touei dei. Mechem mang laanghai büpa eepa, ngangahük kü ha naü büm kheüei kahdokei doei ju kü yung-op vamei lütei.

²¹ Jisui chepa kü, “Büpa kü ha vampü hepak meshükang?” shei phe. Büpai, “Naü mebü hih.

²² Hapai düngei büpa jütüknüng shei aw kü shühü, hatü yungei shüktüknyüke. Nüngi lemhük dangkao dükaokjema, ham kü shinshangei sheühshih” shei e.

²³ Jisui büpa kü, “Nüngi dükaokjema shei! Hinglempü shennyak shingvaishi peü dükaokhen” shei e.

²⁴ Lomi ha naüei chepai lenei, “Ngei hinglemnyeih! Ngei hingnelempü kü sheühshih” shei e.

²⁵ Mechem Jisui khongnyü chemi mokei heihjapü eepa, büpai mang laangha kü loh-ei, “Hapa naü shah ne-ehüi hatü dhaongi nedani shümlangpü mang laangha, ngei nüng kü shahkung shuohnyeih, büpa kübü vamdaituh, hatü ne-yei büpa kü teshü!” shei e.

²⁶ Hapa mang laanghai vaüei ha naü longi kheühütü vamteke, hatü ha naü-ü mahng kei nyu, hatü longshi shingi, “Ha naü didaiteke” shei e.

²⁷ Shejao Jisui büpa kü lak kü düktü phukei yaonghü, hatü büpa nying yaongaokteke.

²⁸ Jisu shemei shüpheikü büpalei nanglomthüi joei, “Hamphongi mehekei nechangtükaokpa yo?” shei phe.

²⁹ Jisui jomphong kü, “Henüng keipeyü phoppai mon changaokhen” shei e.

Shao Jisui Dihen hatü Yangei Leihen Nang Epü

³⁰ Jom hapa shing tuhtü Galil lemei heih. Büpai üpaiyao ha nyemtenying shei deih;

³¹ mehenangkü büpai büpalei nanglomthü kü, “Shennyak Ha hangkulei lak kü lanei shuohhen, hatü jomi büpa jühen, hatü jüpheikü nyih jem angtü büpa shao yangei leihen” shei nyuh-ei eteke.

³² Shejao büpai ha mehe enya jomi ha nenying, hatü ha jung büpa kü phehen nyemei deih.

Peü mü Longpü Üpaang?

³³ Hapheikü jomphong Kapernaumei heih, hatü büpa shemei nyushi büpai jomphong kü, “Amphong lemei mehe nangkü shah dakteipa?” shei phe.

³⁴ Shejao jomphongi shah ne-e; mehenangkü jomi lemei hüki hük mü üpa longpü vaihen shei shah dakteiteke.

³⁵ Jisui uotü jom anpünyi kü, “Hanei-i shongpü vaihüjema peü mü dohpü hatü peüei chongphobü leihen vongbong” shei e.

³⁶ Jisui maanpü hashih hük deiyei jomphong touei yaonghü. Büpalei lakei ha naü paümtü jomphong kü,

³⁷ “Üami ngelei men kü hapa keipü hashih hük mongongshi yahnya, büpai ngei yahnyüke; hatü üami ngei mongongshi yahnya, ngei yahnyu nevai, shejao üpai ngei shom büpa yahnyüke” shei e.

Jen Nekhüpüthü Jen Shing Nyüke

³⁸ Johani büpa kü, “Nyuhbü, nüngei men kü hanei ami kahshih changei hami eepeih; mehenangkü büpa jen khong mü müpü shennyak nevaipü nangkü hamphongi büpa kü bangshuohpeih” shei e.

³⁹ Shejao Jisui, “Büpa tedohhü” shei e. Üpai ngelei men kü yashanpü dou düknya, hapheikü müshi ngei nangkü ten ne-eküpih.

⁴⁰ Üami jen nekhü, jen shingvaishi nyüke.

⁴¹ Hingmei ngei am kü enyeih, amphong Khristalei vaipü nangkü üami ngelei men kü yinghen yungshong hük dangkao shuohhen, mekei etao jomei laklei nemahdaipih.

Mang Thahhen Dokpü

⁴² Amphong hanei-i ngei kü vaipü hathü maanpü khongkü hük dangkao mang thahhüjema, am shingvaishiyü üng kü yaongba longpü shentü ilangmongei hüngdaipü-üng meipüba.

⁴³ Nüngei laki mang thahhüjema, ha langtüktuh. Nüng shingvaishi lak nyi kohtü mechemao nemetpü molo awlei shülei meyü lak hük neshiüi yangnyuyem touei shüpüüng meipüba.

⁴⁴ Halei jom hahpü laong nedinyih, hatü jom kü bahpü aw mechemao nemetnyih.

⁴⁵ Hatü nüngei la-i nüng mang thahhüjema, ha langtüktuh; la nyi kohtü molo awlei shülei meyü la hük neshiüi yangnyuyem touei shüpü-üng meipüba.

⁴⁶ Halei jom hahpü laong nedinyih, hatü jom kü bahpü aw mechemao nemetnyih.

⁴⁷ Nüngei müki nüng mang thahhüjema, ha luktüktuh; mük nyi kohtü molo awlei shülei meyü mük hük neshiüi yangnyuyem touei shüpü-üng meipüba.

⁴⁸ Halei jom hahpü laong nedinyih hatü aw mechemao nemetnyih.

⁴⁹ Hümi jakpü moila daühüpükei shennyak peü awi daühühen.

⁵⁰ Hüm meinyüpeih, shejao ha hüm kü hapalei vüngpü mahdaijema, nüngi ha mekei etü shao vünghühen? Am kü vüngpü hüm nyuhütuh, hatü hüki hük mü chingmei nyutuh.