MARK 8 - DAÜLANGPÜ LAIHING (BSI)

Jisui Haja Ali Ühyingpü

¹ Hathü nyih kü mechem khongnyü longpü hük meheyao hahhen neshiüi nyupa, büpai laophülei nanglomthü kü nyükei jomphong kü,

² “Ngei khong kü shinshangei deihnyüke; mehenangkü jomphong shaang thahshi nyih jempabü ngei mü nyunyu khih, hatü hahhen meheyao neshiü.

³ Aeidaitü ngei hathü jomei shemei leishihjema, jom lemei shomeiyinghen; haneiyü tailu leipü peiküpü khih” shei e.

⁴ Büpalei nanglomthüi, “Mekei etü shennyak hüki jahpanei hajükpü khongnyü kü ühyingaokhen?” shei e.

⁵ Büpai jomphong kü, “Amphongei aan meshük nyüpa?” shei phe. Jomphongi, “Nyet nyüke” shei e.

⁶ Hahepak kü büpai khongnyü kü kahdokei uohen e, hatü büpai aan nyet yah-ei menvih shuohpheikü ha bhaoktü büpalei nanglomthü kü bhehen shingvaishi shuoh; hatü jomi khong kü bheteke.

⁷ Shao jomei nyah maani nyu, hatü ha kü moihiman pheikü büpai hathüao bhetuh shei e.

⁸ Jomi moh-ei hah, hatü jomi aopünyeipü phuohinu thaishingkü mühdow nyet maei nyu.

⁹ Halei shennyak haja ali hükshing nyuteke. Büpai jom leitükkem.

¹⁰ Shülangi büpai nanglomthü mü ai mongei shü, hatü Dalmanutha lemei heihdai.

Yashanyale Dou

¹¹ Phariseethü peiyei büpa mü shah dakteiyei büpa kü dokei vangsho leipü yashanyale dou hük yüteke.

¹² Büpai ngülu heetü, “Mehekei hapa den shennyakthüi yashanyale yünya? Ngei hingmei am kü enyeih, hapa den kübü shennyakthü kü mepa yashanyale dou-ao nehupih” shei e.

¹³ Büpai jom tuhtü shao ai mongei shütü lebü yungdangei heihdai.

Pharisee hatü Herodei Daw

¹⁴ Shaang nanglomthüi hahying kohen betük, hatü ailei jom mü aan hük mon nyu.

¹⁵ Shaang büpai jomphong kü, “Ammi Pharisee am hatü Herodei daw kü lituh” shei lihen shah e.

¹⁶ Jomphong hüki hük mü, “Hayü jen hahying neshiüpü nangkü enyu khih” shei etei.

¹⁷ Ha nyingei Jisui jomphong kü, “Ammi hahying neshiüpü jung mehekei eteinya? Ammi shaang thahshi ne-ee, hatü nenyingnyu je? Amphongi nedeih-aoknyu je?

¹⁸ Amphongü mük kohtü ne-eeaoknyu je? Dhaong tuhtü nedanaoknyu je? Amphong kü nedeihkünyu je?

¹⁹ Ngei shennyak haja nga shingvaishi aan pha nga bhaokei ühying shingkü amphongi aopünyeipü phuohinu mühdow meshük thaipa?” Jomi büpa kü, “Mühdow anpünyi” shei e,

²⁰ hatü ngei shennyak haja ali shingvaishi aan nyet bhaokei ühying shingkü aopünyeipü phuohinu mühdow meshük thaipa? Jomphongi büpa kü, “Mühdow nyet” shei e.

²¹ Hahepak kü büpai jomphong kü, “Amphong shao-üng nenyingnyu je” shei phe.

Jisui Bethsaidalei Mükphüngpa Meihüpü

²² Jomphong Bethsaidalei pei, hatü shennyak hanei-i büpa touei mükphüngpa hük müei peiyei büpalei mük kü hongtuh shei büpa kü khüm.

²³ Büpai büpalei lak kü düktü ching kübü yanei deitü büpalei yien yah-ei mük kü nyio, hatü büpa kü büpalei laki shüngtü, “Nüngi meheyao eenyüla?” shei phe.

²⁴ Hapa shennyaki ngangei veitü, “Ngei shennyakthü eenyüke, shejao pü kamteipükei eenyüke” shei e.

²⁵ Jisui shao büpalei laki hapa shennyakei mük kü düktü hüngei vei, hatü büpalei mük meidai, hatü büpai lemphü lekei ee.

²⁶ Hapheikü büpai büpa kü, “Chingei nyokei telei” shei etü shemei leishihteke.

Peteri Jisu Nang Epü

²⁷ Jisui büpalei nanglomthü mü Kasarea Philippi kahdok leipü chingthülei dai, hatü dailemei Jisui nanglomthü kü, “Shennyakthüi ngei kü üpa khih shei eteinyüke?” shei phe.

²⁸ Jomphongi büpa kü, “Hanei ami nüngü Johan baptükbü shei, hanei ami Elijah khih shei, hatü shao hanei ami thibüthü khongkü hük khih shei eteinyüke” shei e.

²⁹ Büpai jomphong kü, “Shejema amphongiyao ngeiyü üpa khih shei enya?” shei e. Peteri, “Nüngü Khrista” shei jangei e.

³⁰ Büpai jomphong kü büpa jung üpa kao ne-ehen ngeükhüam wongmü shuoh.

Jisui Büpa Dihen, Yangei Leihen Jung Epü

³¹ Hapheikü büpai jomphong kü nyuhhen pangei, Shennyak Ha longi shangponghen hatü behethü, ngongpathü hatü shahkung nyuhbüthüi büpa yaktükhen, hatü jühen, hatü nyih jem pheikü yangei leihen.

³² Büpai ngaiyei ha e, hatü büpai Peter khaatei deitü büpa kü lohhen pang.

³³ Shejao büpalei nanglomthü philei yaakei veitü büpai Peter kü loh, hatü, “Kahshih, lüdaituh! Nüngei mongei Kahvangei dou nevai, shennyakei douthü deihshi nyüke” shei e.

³⁴ Büpai khongnyü kü büpalei nanglomthü mü nyükei jomphong kü, “Hanei ami ngei phei mühüjema, laophü nyingi maanpü leituh, hatü laophülei shophang paitü ngei pheilei mükei.

³⁵ Mehenangkü üami laophülei yangnyu yanghünya, mahhen, hatü üami ngei shingvaishi hatü shahjangmei nangkü laophülei yangnyu mahnya, yanghen.

³⁶ Shennyak hüki kahdoknyü kemei aoktü laophülei yangnyu mahtükjema mehe nanglei nyüpa?

³⁷ Nevaijü shennyak hüki laophülei yangnyu nangjei mehe shuohhen?

³⁸ Hanei ami hapa mükbongjuyung hatü mang shennyakthü den kü ngelei men hatü ngelei shah kü vin nedejema, Shennyak Ha Palei müknyinshekhang kü daülangpü vangsho phongshanthü mü yiüshingkü jom shingvaishi vin nedehen” shei e.