MARK 7 - DAÜLANGPÜ LAIHING (BSI)

Büyem Vanglem Nyuhpü

¹ Shaang mechem Jerusalem leipü peipü Phariseethü hatü shahkung nyuhbüthü Jisu shonei thaipa,

² jomi büpalei nanglomthüi lak nedaüi hahpü, lappai lak nehüh-i hahpü ee.

³ Mehenangkü Pharisee hatü Jehoda am peüi jomei bü vanglem bangei lak meishi nehühpheikü nehahham;

⁴ hatü hat leipü meheyao nepaüi nehah, hatü jomi dükhi-üm vaüpü lebü vanglem longi noteihamteke.

⁵ Hanangkü Pharisee hatü shahkung nyuhbüthüi büpa kü, “Mehekei nüngei nanglomthüi bü vanglem kü kei nevai-i lak nehüh-i hahnya?” shei phe.

⁶ Büpai jomphong kü, “Am akhümmong-ümthü nang Isaiah-i jiüshi teteivanei tuhteke; ha nyangei nyüke: ‘Hathü shennyakthüi jomei jui mon ngei kü dhüm hunyüke, shejao jomei mong ngei toueipü taishi lüdaiteke;

⁷ Angsha kü jomi ngei khümnyüke; jom nyuhpüvenpeyü hangkulei vanglem nyuhnyüke.

⁸ Ammi Kahvangei shahkung tuhtü hangkulei vanglem kü shongshi nyüke’ ” shei eteke.

⁹ Shao büpai jomphong kü, “Ammi bü vanglem noteihen nangkü Kahvangei shahkung yaktükhen lem meipü dangteke!

¹⁰ Mehenangkü Mosai, ‘Anyü hatü ampa kü dhüm hutuh’ hatü üpai nyühipa khüei thaüvaühenshang dihühen vongbong” shei eteke.

¹¹ Shejao ammi, üpa shennyaki laophülei nyühipa kü, “Ngei nüng kü sheüh-aokhen mü ngeilei lemhük nyüpeih, shejao ngei ha nüng kü sheühhen kü nenoshah. Ngei hayü Kahvang kü shuohtükhen hih” shei etuh shei nyuhnyüke.

¹² Shejema ammi hajük kü nyühipa shingvaishi dükhen meheyao nehannyu.

¹³ Hapa keiha ammi noteipü bü vanglem homei Kahvangei shah kong leitüknyüke, hatü ammi hapa keipü douthü longi düknyüke.

¹⁴ Shao Jisui khongnyü büpa touei nyükei deitü, “Ngei epü bangtuh, am peüi, hatü ha nyinghahtuh:

¹⁵ Shennyak hük kü shakeipü hahying mongei shüpü homei sheihhen meheyao neshiü, shejao mongeipü vampü hapai shennyak hük sheihhünyeih” shei e.

¹⁶ Banghen dhaong kohpüthüi bangtuh.

¹⁷ Mechem büpai khong tuhtü shem mongei shüpa, büpalei nanglomthüi büpa kü shahlap nang phe.

¹⁸ Büpai jomphong kü, “Ammi henüngao nenyingnyu je? Shennyak hük kü shakeipü mongei shüpai nedaüpü neleihünyih shei ammi ne-eenyu je?

¹⁹ Mehenangkü ha mongdangei nevai, vomei shünyeih, hatü büm kübü lüdainyeih” shei e. (Halei epai hahying peü “daülangpü” shei Jisui nyinghü.)

²⁰ Shao büpai nedoh-i, “Shennyak hükei mongeipü mehe vamnya, hapai büpa sheihhünyeih.

²¹ Mehenangkü shennyakei mongeipü ten deihpü, iyjeiphaileipü, gühpü, jüteipü,

²² mükbongjuyung, mop nempü, douten dükpü, lueilempü, levaümaühe, mükhühpü, yuteipü, changmeipü hatü nelinehapü vamnyeih.

²³ Hathü douten peü mongeipü vamnyeih; hapai shennyak hük sheihhünyeih” shei e.

Nyüha Hüki Hinglempü

²⁴ Hatoueipü büpai layaongei Tyre kahmükei dai. Büpai shem hükei shü hatü büpa halei nyüke shei üpaiyao ha nyemtenying shei deih; shejao büpa nyupü nejo-aok.

²⁵ Büpa jung danhinüng nyüha hük pinnyülei yiükha mang laanghai yeppü müei peiyei büpalei la tüngei aümei sha.

²⁶ Hapa nyühayü Greek am Syria kahdok Phoenicialei bühpü nyuteke. Pinnyüi Jisu kü cheha leipü mang laangha changtükhen khümteke.

²⁷ Büpai pinnyü kü, “Shongpüba kü hashihthüi lümpü nyemhah; mehenangkü hashihthülei hahying yah-ei shithü kü shüktükhen jiüpü nevaipih” shei e.

²⁸ Shejao pinnyüi büpa kü, “Hih Shembüpa, shejao shithüiyao hashihthüi hahpü nükdü leipü nükkuk vüpü thaihahnyeih” shei e.

²⁹ Hahepak kü büpai pinnyü kü, “Ha epü nangkü nüng leituh; anha leipü mang laangha lüdaiteke” shei e.

³⁰ Hanangkü pinnyü shemei leijashingkü mang laangha lüdaitü cheha lüngei lemshi ee.

Jisui Aangdaipü Hük Meihüpü

³¹ Hapheikü büpai Tyre leipü nyokei Sidon homei Galil yungching lemeipü Dekapolis kahmük philei heih.

³² Halei shennyak hanei-i büpa touei dhaong aangdaipü hatü shah ne-eaokpü shennyak hük müei peiyei jomi büpa kü hapa shennyak kü laki hongtuh shei khüm.

³³ Büpai hapa shennyak khong toueipü khaatei deitü, Jisui hapa shennyakei dhaong kü büpalei lakjaangi deüteke. Hapheikü büpai yu-op shaotü büpalei yei kü hong.

³⁴ Büpai vangsho philei veitü ngülu heetü, “Ephphatha!” lappai, “Mük vamtuh” shei e.

³⁵ Shaangüng büpalei dhaong ap, büpalei yei shapü lai, hatü büpai neshanghah-i shah ehen chongpang.

³⁶ Jisui jomphong kü üpa kao ha ne-ehen ngeükhüam shuoh. Shejao büpai meshükpa hapakei e, hajükpa jomi ha jung e.

³⁷ Nanglakthü longi thamaei, “Büpai lemphü meihütüknyüke; büpai aangdaipüthü danhünyüke, hatü shah ne-eaokpüthü ehüaoknyüke” shei etei.