MARK 5 - DAÜLANGPÜ LAIHING (BSI)

Mang Laanghai Yeppü Jisui Meihüpü

¹ Jomi yungdang homei Gerasenes kahdokei heih.

² Mechem büpa ai mongeipü vamjapa, ngangahük kü mang laanghai yeppü shennyak hük mahngchong leipü vamei daijapü büpai pong.

³ Büpa mahngchongei mon nyu; üpaiyao büpa nyiamvü shentao yepei netuh-aok;

⁴ mehenangkü büpa düngei yepei shatü hatü nyiamvüi shenei tuhhamteke, shejao büpai nyiamvü phentük, shapü khih mü phenei tükhamteke, hatü üpa wong kohpaiyao büpa neneüaok.

⁵ Nyihnüng yanüng ne-e-i mahngchong hatü kahshangthülei düngei lenei hatü yaongnah yah-ei vethah-ei nyu.

⁶ Mechem büpai tailulei Jisu eepa, büpa mokei heih-ei büpa touei ammei khüm;

⁷ hatü büpai üng mahshi lenei, “Nüngi ngei kü mehe dükphanüngang, Jisu, Chaipüba Kahvang Ha? Ngei Kahvang men kü khümnyeih, ngei kü teshüveipha” shei e.

⁸ Mehenangkü büpai büpa kü, “Hapa shennyak leipü vamdaituh, nüng mang laangha” shei eteke.

⁹ Hapheikü Jisui büpa kü, “Nüngei men üpaang?” shei phe. Büpai, “Ngelei menü Legion hih; mehenangkü ham longi nyüpeih” shei jangei e.

¹⁰ Büpai hathü hapa kahmük kübü nechangtükhen büpa kü khümei e.

¹¹ Shaang shangching philei ook khong hük het hah-ei nyu;

¹² hatü mang laanghathüi büpa kü khümei, “Ham ookei shühen shomtuh” shei e.

¹³ Hanangkü büpai mongshuoh hatü mang laanghathü vamei ookthü kü shü, hatü ookthü bhei-ie haja nyi hükshing yungching yungkung vakei vüei yungei langdaikem.

¹⁴ Hapa ook yombü mokei leiyei chingnyü hatü kahmük peü kü baong. Hahepak kü shennyakthüi mehe vampa shei veinüng pei.

¹⁵ Jomphong Jisu touei peishingkü mang laanghai yeppü hapa shennyak büm-ow yahtü bümei leiyei hatouei uoshi eeyei jom nyemteke.

¹⁶ Üami ha ee, hathüi shennyakthü kü mang laanghai yeppü shennyak hatü ookthü kü mehe vampa, ha jung ejateke.

¹⁷ Hahepak kü jomi Jisu kü jomei kahmük kübü lüdaishih shei khümei e.

¹⁸ Büpa ai mongei shüdai-i nyushingkü ha mang laanghai yeppü shennyaki büpa mü daihen hih shei khümei e.

¹⁹ Shejao Jisui nemong, hatü büpa kü, “Nüngei küphüthü touei shemei leituh, hatü Shembüpa i meshük thahshi nüng kü dükpa, hatü büpai nüng kü phahji hupa, ha jung etuh” shei e.

²⁰ Büpa leiyei Jisui meshük thahshi büpa kü dükpa ha Dekapolislei baonghen chongpang, hatü peüi thamateke.

Jairuslei Yiükha hatü Nyüyong Hük Meihüpü

²¹ Mechem Jisu nyipabü ai kü uoei yungdang hükei heihpa, khongnyü longpü hük büpa shonei thai, hatü büpa yungei nyu.

²² Hahepak kü Sinagog leipü mübü hük, Jairus shei menpü peiyei mechem büpai Jisu eepa, büpalei la tüngei khümei,

²³ büpa kü nedoh-i khümei, “Ngelei yiükha maanpü hük dihen mü nyüpeih. Pinnyü meiyei yanghen shingvaishi peiyei nüngei laki pinnyü kü hongshih” shei e.

²⁴ Hanangkü büpai büpa mü dai. Khongnyü longpü hük büpa phei mü, hatü büpa touei shüngteke.

²⁵ Shaang hatouei bong anpünyi iy yenei tüngpü nyüha hük nyu.

²⁶ Pinnyü meli nyingpüthü longi touei daiyei junghah hatü angpü peü damtük, shejao meipü nedangi nemeipüba lei.

²⁷ Pinnyüi Jisu jung danei khong chi kü büpa phei müei heih-ei büpalei ashakjung kü hong.

²⁸ Pinnyüi, “Ngei heih-ei büpalei ashakjung kü hongjema ngei meishasha” shei e.

²⁹ Pinnyüi honghinüng iy yenpü dohdai, hatü pinnyülei büm kübü din meidaiteke shei nying.

³⁰ Ngangahük kü büpa leipü wong daiteke shei nyingei Jisui khong chi kü yaakei leiyei, “Üpai ngelei ashak kü hongpa?” shei phe.

³¹ Büpalei nanglomthüi büpa kü hajükpü khongnyü nüng touei hungtei hungteitü heihjü, “Ngei kü üpai hongpa shei mekei ekünya?” shei e.

³² Üpai hongpa shei büpai peü lemei shinei vei.

³³ Shejao hapa nyühanyüi pinnyü kü mehe vampa, ha nyingei nyemei kheüyaki heih-ei büpa touei aümei shatü hapa shahhing peü büpa kü eteke.

³⁴ Jisui pinnyü kü, “Lamei, nüng hinglempai nüng meidaiteke; nyiushemmei kü leituh, hatü nüngei din meidaituh” shei e.

³⁵ Mechem büpai shah eyei nyupa, shennyak hanei Jairus amei shem leipü peiyei, “Anha didaiteke. Nyuhbü kü mehekei hajük tok shuohnya?” shei e.

³⁶ Shejao Jisui jomi epü kü nebangi hapa Sinagog mübü kü, “Tenyem, hing mon lemtuh” shei e.

³⁷ Büpai Peter, Jakob, hatü Jakobei chenaü Johan mü lenei üpayao büpa phei nemühah.

³⁸ Mechem jomphong Sinagoglei vanglem lembü Jairuslei shem ngoipa, büpai shennyakthü theppü hatü vaüpü-eepü eeteke.

³⁹ Mechem büpa mongei shüpa, büpai hathü kü, “Amphong mehekei vaüei-eeyei thepnya? Hapa naü dipü nevai, shejao shipü khih” shei e.

⁴⁰ Shejao jomi büpa kü nyishuoh. Büpai shennyakthü peü chingshelei ngaitüktü naüei chepa, chenyü hatü büpa mü nyupüthü mon mütü naü lempü shingei shü.

⁴¹ Büpai pinnyülei lak kü düktü pinnyü kü, “Talitha kum” lappai, “Lamei, paotuh” shei e.

⁴² Chemjalak kü pinnyü yaongei kamnüng chongpang (pinnyü nyübüh bong anpünyi nyuteke). Ha eeyei jomphong yashan.

⁴³ Büpai jomphong kü ha jung üpa kao tenyinghü shei ngeükhüam wong mü shuoh, hatü pinnyü kü hahhen lemhük shuohtuh shei e.