MARK 4 - DAÜLANGPÜ LAIHING (BSI)

Sheili Haibü Hüki Lappü

¹ Shao Jisui Galil yungkungei nyuhhen chongpang. Hapa keiha khongnyü longi büpa shonei thaipü nangkü büpa ai mongei shüei yung shangei uo, hatü khongü yungphaangei nyu.

² Büpai jomphong kü shahlappai douthü longi jung nyuhhen pang, hatü büpai nyuhshingkü büpai jomphong kü e,

³ “Bangtuh! Sheili haibü hük sheili hainüng dai.

⁴ Büpai li haishingkü li hanei lemei vü, hatü hayü outhü peiyei hahtük.

⁵ Lebü li hanei kahdok longi neshiüpü yaong shangkü vü, shejao halei kahdok chüshi nenyupü nangkü lomi nyem phaatei koh.

⁶ Mechem vanghe heyei nyahpüshampü pei, tünglang yiüei nenyupü nangkü ha vandai.

⁷ Lebü li hanei hüh chi kü vü, hatü hüh longei ha lümlang, hatü hapai betjük nejük.

⁸ Lebü li kahmeichong kü vü, hatü ha koh-ei long hatü hapüan, pejem hatü kho lomshi betjük jük.

⁹ Büpai, ‘Banghen dhaong kohpü peüi bangtuh’ shei eteke.”

Hapa Shahlap Mükhong

¹⁰ Mechem büpa monha nyupa, büpa shonei nyupü hatü anpünyi peiyei hapa shahlap nang büpa kü phe.

¹¹ Büpai hathü kü, “Amphong kü payü vangsho ongching shahjo shuohtepih, shejao haolei nyupüthü shingvaishi lemphüli shahlap mü enyeih;

¹² shejüang jomi veihen shejao ne-eehen, banghen shejao nedanaokhen; hei nevaijema jom Kahvang philei lephen hatü mang tükpü danghen” shei e.

¹³ Hapheikü Jisui jomphong kü e, “Ammi hapa shahlap nenyingang je? Shejema ammi mekei etü hathü shahlapthü peü nyingaokhen?

¹⁴ Sheili haibüi shahjangmei hainyüke.

¹⁵ Shennyak haneiyü lemei vüpü sheili keiha shahjangmei haishuohjü jomi ha danhinüng kahshih peiyei jom kü haipü shahjangmei yah-ei lüdainyüke.

¹⁶ Lebüthüyü yaong shangkü vüpü sheili keiha jomi shahjangmei danei mongongpai shülangi yahnyüke.

¹⁷ Shejao jom kü tünglang yiüei nenyupü nangkü jomü hepak kansho hük mon nyunyüke. Hapa shahjangmei nangkü mechem shanghah nevaijü shüveidoidei peihenshang jom lomi dodainyüke.

¹⁸ Shao lebüthüyü hüh chi kü vüpü li keiha shahjangmei dannyüke,

¹⁹ shejao yangnyu chudeih mongshang, mopi yawhpüyangpü hatü peikahen lebü douthü deihpü peinyüke; hapai shahjangmei lümlangtü betjük nejüki leitüknyüke.

²⁰ Lebüthüyü kahmeichong kü vüpü keiha shahjangmei danei ha yahnyüke, hatü hapüan, pejem hatü kho lomei betjük jüknyüke.”

Awdük Jaktü Mühdowi Thuhtükpü

²¹ Büpai jomphong kü, “Am hanei-i awdük jaktü awdük ngenshingei netuh-i mühdowi thuhtü nevaijü lüngbangei tuhnyu hiang?

²² Mehenangkü shakei ngaihen mü lenei joei tuhbenüng meheyao neshiü, nevaijü vangngailei vamhen mü lenei doujo meheyao neshiü.

²³ Banghen dhaong kohpü peüi bangtuh” shei e.

²⁴ Shao büpai jomphong kü, “Ammi mehe kü bangnya, ha kü mong shuohtuh; ammi meshük dokei shuoh, hajük dokei danghen, hatü nyeishiyao am kü shuohhen.

²⁵ Mehenangkü üami ang, hathü kü nyeishi shuohtükhen; hatü üam meheyao ne-ang, jomei maani nyupü dangkao yahlanghen” shei e.

Sheili Haipai Shahlappü

²⁶ Büpai shao e, “Kahvang ongchingü hanei ami kah kü sheili haipü leangke.

²⁷ Yanüng hatü nyihnüng büpa shijao paojao hapa sheili nyem phaatei büpai nenyingjao longnyüke.

²⁸ Kahdoki laophü nyingi shongpüba kü hahlak, hapheikü hah pü, shomshi hahjük vamhünyüke.

²⁹ Shejao mechem hah meanhenshang büpai hahvet hepak ngoipü nangkü hatvet longkhoih noshi vetnyüke.”

Haoyang Vangi Shahlappü

³⁰ Shao büpai jomphong kü e, “Kahvang ongchingü mehe lepeih shei jeni ehenang, nevaijü hapa nihhen shingvaishi mehe shahlap jeni nohenang?

³¹ Hapayü haoyang mepa peü mü maanpü sheili ammi kahlei sheinya ha leangke.

³² Shejao mechem sheihen, ha koh-ei longei pemongei nyupü sheili peü mü longpüba leiyei kao phaakei dainyüke hatü hapalei dhüm kü shangouthüi jep lingnyüke.”

³³ Hapa keipü shahlap longi yah-ei Jisui jomphong danaokpü thahshi ven.

³⁴ Shahlap neomi shei büpai jomphong kü meheyao ne-e. Shejao mechem büpai nanglomthü mü lomja nyupa, büpai lemphü nih-ei eteke.

Jisui Yinglükpalei Nenhüpü

³⁵ Ha nyih mechem om dhüpa, büpai jomphong kü, “Jeni hükphi dangei heishah” shei e.

³⁶ Khongnyü tuhphongtü büpai epükei jomi büpa ai hük kü müei dai. Lebü aithüao nyuteke.

³⁷ Ngangahük kü yinglükpalei vamei yungmok bhuei shü, yungi ai madaihen mü nyu.

³⁸ Shejao büpayü aishongei shole letü shiyei nyu. Jomi büpa kü phuktü, “Nyuhbü, jen mahhen kü nüng mongshangei nedeihnyu je?” shei e.

³⁹ Büpa paoei vanglük kü loh, hatü yungching kü, “Nendaituh” shei e. Hahepak kü vanglük dohdai hatü peü nendai.

⁴⁰ Büpai jomphong kü, “Am mehekei nyemnya? Am shaang thahshi hinglempü neshiüpü je?” shei e.

⁴¹ Jomi nyempü longpai maei, “Vanglük hatü yungchingiyao ven bangpü hayü üpaang?” shei hüki hük mü etei.