MARK 3 - DAÜLANGPÜ LAIHING (BSI)

Lak Didaipü Shennyak Hük

¹ Shao büpa Sinagoglei shüshingkü lak didaipü shennyak hük halei nyu.

² Jomi büpa nyonghününg shei büpai hapa shennyak Sabbath nyih meitüküala shei veishi nyu.

³ Büpai ha lak didaipü shennyak kü, “Shelei heihkei” shei e.

⁴ Hahepak kü büpai jomphong kü, “Sabbath nyih mei dükhen hi ten dükhen, nevaijü yangnyu hük yanghen hi jühen shahkungi mongpa?” shei e. Shejao jomphongi nenmü nyudai.

⁵ Büpai jomphong kü mongshih-ei shineileyei vei; jom mong vaanpü eeyei büpa mong kü tüngei hapa shennyak kü, “Nüngei lak lantuh” shei e. Büpai lak lan, hatü ha meidaitü nyu.

⁶ Phariseethüi laoei daiyei mekei etü büpa jühen shei Herodei nanglakthü mü phaüshah show.

Yungkungei Khongnyü Peijapü

⁷ Jisui büpalei nanglakthü mü yungching lemei dai, hatü Galil leipü khongnyü longpü büpa phei mü;

⁸ büpai dükpü peü danei Judea, Jerusalem, Idumea, Jordan yungdang leipü hatü Tyre hi Sidon shinpü moidoi leipü khong longi büpa touei pei.

⁹ Büpai nanglomthü kü khong ahdaipü nangkü büpa kü nehunghahhen shingvaishi ai hük yemkütuh shei e.

¹⁰ Mehenangkü büpai tüngpü longi meihüpü nangkü din nyupüthü peü büpa kü honghen hungtei hungteitü thai.

¹¹ Mechem mang laanghathüi büpa eehen, jomphong büpa touei doei shatü, “Nüngü Kahvang Ha!” shei len.

¹² Shejao büpai jomphong kü büpa tenyinghü shei wongmü ngeükhüam shuoh.

Jisui Anpünyi Jepü

¹³ Büpa kahshangei aong hatü büpai napü shennyakthü büpa touei nyükei dei, hatü jomphong büpa touei pei.

¹⁴ Büpai jom anpünyi phongshanthü shei mentü büpa mü nyuhen hatü shahjangmei baongei deishihhen,

¹⁵ hatü kahshihthü changhen ngan danghühen shingvaishi je.

¹⁶ Hanangkü büpai hathü anpünyi jeteke: Simon (üpa kü Peter sheiyao nyük);

¹⁷ Zebedeelei cheha Jakob hatü chenaü Johan (üpa kü Boanerges lappai, “Vangmukei Hapeüthü” sheiyao nyük);

¹⁸ hatü Andrew, Philip, Bartholomia, Mathi, Thomas, Alpheaslei cheha Jakob, Alpheas, Thaddaeus, Kanan am Simon,

¹⁹ hatü Jisu luhahpü Judas Iskariot.

Jisu hatü Beelzebul

²⁰ Hapheikü Jisu shemei lei. Shao khongnyü thai; hanangkü Jisu hatü büpalei nanglomthüi nehah neyingaok.

²¹ Mechem shem ami ha danpa, jomi büpa leilanghen heih; mehenangkü nanglakthüi, “Büpayü ngadaiteke!” shei etei.

²² Jerusalem leipü yiüpü shahkung nyuhbüthü hanei-i, “Büpa kü Beelzebul nyüke, hatü kahshih mübülei ngan homei büpai kahshihthü changnyeih” shei e.

²³ Büpai jomphong büpa touei nyükei deitü büpai jomphong kü shahlapei e: “Mekei etü kahshih-i kahshih changaokhen?

²⁴ Ongching hüki laophü kü-üng khüei hanjema, mechemao hapa ongching neyaongaokpih,

²⁵ hatü shemong hük laophü kü-üng laophüi khüei yaongjema mechemao neyaongaokpih.

²⁶ Satani büpa khüei büpa-üng yaongjema, büpa neyaongoakhen, shejao büpa dohshing ngoiteke.

²⁷ Üpaiyao wong kohpü shennyakei shemei hapa shennyak yepei mangshatük thahshi jomei shemei shüei shemdou aetei nedaiaokpih. Hapakei yepei shatükjü mon shemdou aetei daiaokhen.

²⁸ Hingmei ngei am kü enyeih, nanglakthü kü jomei mangthü hatü jomi mepa mepa eelaei ehen hathü mang tükhen,

²⁹ shejao üpai Laangha Daülangpü khüei mang thahhen mechemao mang netükhen, shejao büpa nedohnetenpü mangi pungteke.”

³⁰ “Büpa kü mang laangha nyüke” shei hanei ami eshuohpü nangkü Jisui ha eteke.

Hingshangpü Jisulei Shem am

³¹ Hapheikü Jisulei chenyü hatü chenaü nyi peiyei chingshelei yaongtü shah shomei büpa kü nyük.

³² Büpa shonei khongnyü thaiyei uoshi nyu, hatü jomi büpa kü, “Anyü hatü anaü nyi-i nüng kü chingshelei nyüknyüke” shei e.

³³ Büpai, “Ngelei onyü hatü naüpeüthü üpaang?” shei e,

³⁴ hatü büpai shonei uoshi nyupüthü kü veitü büpai, “Ngelei nyü hatü naüpeüthüyü hamü nyüpeih!

³⁵ Üami Opai mongpü düknya, hathüyü ngelei jeihinaü, nyahinaü hatü nyü hih” shei e.