MARK 15 - DAÜLANGPÜ LAIHING (BSI)

Jisu Pilat Touei Yaongpü

¹ Dhom mü lomi ngongpathüi behethü hatü shahkung nyuhbüthü hatü shahtapei nyupüthü mü shah shetteke. Jomi Jisu yepei shatü müei daiyei Pilat kü lanei shuoh.

² “Nüngü Jehoda amei ongpa je?” shei Pilati phe. “Nüngiang enyüke” shei Jisui jang.

³ Hahepak kü ngongpathüi lebü douthü jung longi eyei Jisu nyonghü.

⁴ Shao Pilati büpa kü, “Nüngi meheyao nelahhen je?” shei phe. Veituh, jomi nüng nyonghüei meshük shah enyüke?

⁵ Shejao Jisui hajük kü jek neshei; hanangkü Pilat yashan.

Pilati Jisu Jühen Lanei Shuohpü

⁶ Shaang mo hepak kü shennyakthüi üpa yühenshang khoklatei nyupü shennyak hük büpai veyei deishihhen vanglem nyuteke.

⁷ Shaang mophicheü vamshingkü shennyak jüpü khong mü ompü Barabbas shei menpü shennyak hük khoklatei küpshi nyu.

⁸ Hanangkü khongnyü peiyei Pilat kü büpalei vanglem aimü jom kü dükshih shei yühen pang.

⁹ Hahepak kü büpai jomphong kü, “Ngei am kü Jehoda amei Ong vephahen hiang?” shei phe.

¹⁰ Mehenangkü büpayü ngongpathüi mükhühpü homei yepei shuohpü khih shei büpai nyingdai.

¹¹ Shejao ngongpathüi Barabbas jeiyei ngaishih shei ehen nanglakthü kü nangthongteke.

¹² Pilati shao jomphong kü, “Shejema ammi Jehoda amei Ongpa shei nyükpü shennyak kü ngei mehe dükhahhünya?” shei phe.

¹³ Jomphongi nyokei, “Büpa shophang kü aptuh” shei len.

¹⁴ Pilati jomphong kü, “Mehekei, büpai mehe ten dükpa?” shei phe. Shejao jomphongi nyeinya lenei, “Büpa shophang kü aptuh” shei len.

¹⁵ Hanangkü Pilati khong mongmeihühen nangkü jom touei Barabbas veteke, hatü Jisu kü bheitü shophang kü aphen lanei shuohtük.

Veshanthüi Jisu kü Yaüeilungpü

¹⁶ Hapheikü veshanthüi ongshem chingkon mongei (hayü governor ongshem) müei shü, hatü veshanthü peü chemi nyük.

¹⁷ Jomi büpa kü manghmepü bümow owhü, hatü hühthang yüpei athen kei lingtü büpalei shangjing kü thenshuoh.

¹⁸ Jomi büpa kü selam shihtü shihtü, “Jehoda amei Ongpa den lushi nyutuh!” shei e.

¹⁹ Jomi büpalei shangjing kü lenshuoh-i bhei, yu-op shao, hatü büpa touei dhüm shuohnyukei aümei sha.

²⁰ Mechem jomi büpa kü yaüeilungpü doh, jomi manghmepü büm-ow nyiukei yahtü büpalei büm-ow owhü. Hapheikü jomi büpa shophang kü aphen müei dai.

Jisu Shophang kü Appü

²¹ Jomphongi ching leipü chingnyülei yiüjapü Cyrene am Alexander hi Rufus nyilei chepa Simon peijapü lemei pongei Jisulei shophang paihen nyeanteke.

²² Jomi Jisu Golgotha (lappai, “Shangvang Shing”) shei nyükpü shingei müei dai.

²³ Jomi büpa kü yiü mü myrrh shei epü meli vuktü shuoh; shejao büpai ha neying.

²⁴ Jomi büpa shophang kü ap, hatü üpa üpai mepa danghen shei jomi phongyomei büpalei ashakviha hantei.

²⁵ Jomi büpa nepnüng shü baji kü shophang kü ap.

²⁶ Büpa khüei nyangpü shah-ü, “Jehoda amei Ongpa” shei nyuteke.

²⁷ Jomi büpa mü gühpa nyi, hük büpalei lakdah lemei, hük laknyong lemei apteke.

²⁸ (“Büpayü shahkung mangpüthü mü chemi ie” shei Laihingi epü ha dhaümteke.)

²⁹ Peihpüshaipü peüi ngaüm dhiyei büpa kü eelaei, “Aha! Nüngi phopshem bentü nyih jem mongkü vehen hih shei epü-ü,

³⁰ nüng nyingi yangtuh, hatü shophang leipü shühkei” shei e.

³¹ Aihük mü ngongpathüao shahkung nyuhbüthü mü chemi büpa kü yaüei, “Büpai mih yangteke, shejao laophü nying neyangaoknyu khih.

³² Khrista, Israel amei Ongpa shaang shophang leipü nyemshühkei, shejüang hami ha eetü büpa kü hinglemhen” shei e. Büpa mü shophang kü appüthüao büpa yaüei eteke.

Jisu Dipü

³³ Haümhahphei kübü om jem baji thahshi kahdoknyü kemei manghdai.

³⁴ Jem baji kü Jisui ngeü longpai lenei, “Eloi, Eloi, lama sabachthani?” lappai, “Ngelei Kahvang, ngelei Kahvang, mehekei nüngi ngei tuhphongnya?” shei e.

³⁵ Mechem yopailei yaongpüthü hanei-i ha danpa, “Bangtuh, büpai Elijah kü nyüknyüke” shei etei.

³⁶ Hanei ami mokei heih-ei yiüthi kü mantem hüng hatü lüng kü japtü anei Jisu kü yinghen shuohtü, “Temanghü, Elijah yiüei büpa yahlangkahen hi neyahkahen veishah” shei e.

³⁷ Hahepak kü Jisui wong mü ngeü antü ngüshom heeyei mongdang shemmdai.

³⁸ Hahepak kü phopshemei haenpü ashak sho kübü la laishi nyi anei shaakdai.

³⁹ Shaang mechem veshan kho hük shak kü mübü hük büpa mü khangteishi yaongshi nyupai büpa vaüpü dan, hatü dipü eepa, büpai, “Hingmei, hapa shennyakü Kahvang Ha vaipü khih!” shei e.

⁴⁰ Nyühathü hanei tailei veishi nyu; hathü khongkü Mary Magdalen hatü Mary Jakob naü-eepa, Joses hatü Salome hathülei chenyüao yaongshi nyu.

⁴¹ Hathüi büpa phei mühamteke, hatü büpa Galilei nyushi büpalei nadang kü sheühhamteke, hatü büpa mü Jerusalemei aongpü lebü nyühathü longi nyuteke.

Jisulei Mahng Vüpü

⁴² Mechem om dhüpa, hapayü Sabbath nyihshong Tempülempü nyih vaipü nangkü,

⁴³ shahtap kü men-e nanglak hük Arimathea am Joseph, üpai Kahvang ongching omdanei nyu, büpa monglongshi Pilat touei peiyei Jisulei mahng yüteke.

⁴⁴ Hahepak kü Pilati büpa diteke shei danei thama. Büpai kho shak kü veshan mübü nyükei büpa dipheikü kanja angla shei phe.

⁴⁵ Mechem büpai hapa veshan mübü homei büpa didaipü shahjang danpa, büpai Joseph kü ha mahng shuoh.

⁴⁶ Hapheikü Joseph-i nyemin ashak shakei mahng yah-ei ha kü jüm, hatü büpai yaong thukei lingpü mahngchongei vüphong, hatü büpai yaong longpü hük ngowei deiyei sha kü küp.

⁴⁷ Jisulei mahng metouei vüpa ha Mary Magdalen hatü Joseslei chenyü Mary nyi-i eeteke.