MARK 14 - DAÜLANGPÜ LAIHING (BSI)

Jisu Jühen Phaüshah Showpü

¹ Hapayü Hompü Mo hatü Daw Neshihpü Mo mohen nyih nyi shekü nyuteke. Ngongpathü hatü shahkung nyuhbüthüi joei Jisu yepei jühen lem yemei nyu;

² mehenangkü jomi, “Mo hepak kü payü nevai, hei nevaijema nanglakthüi mophicheü ngaikahen” shei etei.

Bethanylei Mainga-i Phupü

³ Mechem büpa Bethanylei Simon ngombülei shemei nyupa, büpai bhaong hahhen uoshi nyushingkü nyüha hük longi bhei wongpü vongmei meli shong yahei peiyei ha aptü büpalei shangjing kü cheiteke.

⁴ Shejao halei uopü hanei ami mongshih-ei hüki hük mü, “Vongmei meli mehekei hapakei damtüknya?

⁵ Mehenangkü hapa meliyü nanglat nyih kho jemei bhei kü yuhah shepeih, hatü hapa lop taopathü kü shuohhen vaipeih” shei e, hatü jomphongi pinnyü kü lohteke.

⁶ Shejao Jisui, “Pinnyü hei-üng nyemnyu; mehekei ammi pinnyü shanghahhünya? Pinnyüi ngei kü doumei dükteke.

⁷ Mehenangkü taopathüyü düngei am mü nyüke, hatü ammi dükshuohhüpü hepak kü jom kü bampü doumei dükhen aok, shejao ngei düngei am mü nenyukahen.

⁸ Pinnyüi mehe dükaok ha düknyu khih; pinnyüi ngelei büm mahng vühen shekü ha phunyu khih.

⁹ Hingmei ngei am kü enyeih, melei hapa shahjangmei kahdoknyü kempülei baonghen, pinnyüi mehe dük, ha pinnyü deih-ei dangei eteihen” shei e.

Judas-i Jisu Yuhen Mongpü

¹⁰ Hapheikü Judas Iskariot, üpa anpünyi khongkü hük nyu, büpai jomphong kü Jisu yuhahhen nangkü büpa ngongchongthü touei dai.

¹¹ Mechem jomi ha danpa, jom longi mongong, hatü büpa kü lop shuohhen lah. Hanangkü büpai büpa yuhen hepak meipü yemteke.

Nanglomthü mü Hompü Mo Hahpü

¹² Daw Neshihpü Aan Mo shongpü nyih mechem Hompü Mo mi jüpa, büpalei nanglomthüi büpa kü, “Hamphong metouei daiyei nüng shingvaishi Hompü Mo hahhen temhahhünya?” shei phe.

¹³ Hanangkü büpai nanglom nyi kü hapakei etü shom: “Chingnyülei aongtuh, hatü shennyak hük yungdük hük chantü anji-i ponghen,

¹⁴ hatü büpa melemei shüdaiphahen müei shüei haleipü shem shembü kü, ‘Nyuhbüi ngelei nanglomthü mü Hompü Mo hahhen shingvaishi ngelei yenpaüm dung melei nyüpa shei phenyüke?’ shei ehen e.

¹⁵ Büpai anji kü shangei dung longpü hük jinei temtüktü huphahen. Halei jen shing mo temtuh” shei e.

¹⁶ Hanangkü nanglomthü chingnyülei daijü büpai epükei peü temtüktü nyu, hatü halei jijinyi-i Hompü Mo hahhen tem.

¹⁷ Mechem om dhüpa, büpa nanglomthü mü lei,

¹⁸ hatü mechem jomphong laophü laophüi shing yemei uotü hahyingpa, Jisui, “Hingmei ngei am kü enyeih, amphong khongkü hük, ngei mü hahyingpü hüki ngei luhahhen khih” shei e.

¹⁹ Nanglomthüi mongshangei büpa kü, “Hayü ngei vaila?” shei hük pheikü hüki e.

²⁰ Büpai jomphong kü, “Hayü anpünyi khongkü hük üpai ngei mü shung hük kü lak lünya, büpai luhahhen.

²¹ Mehenangkü Shennyak Hayü nyangei nyupükei daihen, shejao üpa homei Shennyak Ha luhahhenshang onyükei! Büpa shingvaishi nebühpü-üng meipüba” shei e.

Shembüpa Mo

²² Jomphong hahying shingkü büpai aan hük yah, hatü moihiman pheikü büpai ha bhaok, hatü nanglomthü kü shuoh, hatü “Yahtuh, hayü ngelei büm” shei e.

²³ Hapheikü büpai yungshong hük yah, hatü menvih shuohpheikü büpai ha jomphong kü shuoh, hatü jom peüi hapa leipü ying.

²⁴ Büpai jomphong kü, “Hapayü longshi shingvaishi haipü vangteishuwteipü ngelei iy.

²⁵ Hingmei ngei eshah, Kahvang ongching kü amphong mü nyalingngupai yiü ja yinghen nyih mangngoi thahshi ngei amphong mü hapa nyalingngupai yiü neyinghen” shei e.

²⁶ Jomphongi kesho hük loktü Olive Kahshangei aongdai.

Peteri Jisu Nelahpü

²⁷ Jisui jomphong kü, “Ngei mon tuhtü am peü nyaidaikemhen; mehenangkü ha nyangei nyüke: ‘Ngei mi yombü kü bheihen, hatü mithü yandaikemhen.’

²⁸ Shejao ngei yangei leipheikü ngei am shekü Galilei daihen” shei e.

²⁹ Peteri büpa kü, “Peüi tuhphongjao ngei nüng netuhphongpih” shei e.

³⁰ Jisui büpa kü, “Hingmei ngei nüng kü enyeih, shinnyih, sheyaüng ou nyipa gashekü nüngi jempa thahshi ngei nelah-aokpih” shei e.

³¹ Shejao büpai wong kohshi, “Ngei nüng mü dijao, ngei nüng nelah-i nenyupih” shei e. Hapakei khan nanglomthü peüi e.

Jisui Gethsemanelei Phoppü

³² Jomphong Gethsemane shei epü shingei dai, hatü büpai nanglomthü kü, “Ngei phopshingkü hammü uoshi chongkei” shei e.

³³ Büpai büpa mü Peter, Jakob hatü Johan hathü müei dai, hatü mongshangei shangponghen chongpang.

³⁴ Büpai jomphong kü, “Ngei longi dihen mü mongshangnyüke; neshi-i hatouei uoshi chongkei” shei e.

³⁵ Maani yanei heihtü büpai kahdokei aümei shatü, “Aokjema hapa shangpong hepak ngei toueipü chailangshih” shei phop.

³⁶ Büpai, “Abba, Opa, nüng shingvaishi lemphü aokbenüng; hapa shangpong yungshong ngei kübü chailangshih; shejao ngei mongpü nevai, nüngi mongpükei vaituh” shei e.

³⁷ Büpa leijashingkü jom peü shishi nyu, hatü büpai Peter kü, “Simon, nüng shidainyu je? Nüngi ngei mü ghonda hükao yemmü nenyuaokang je?

³⁸ Neshi-i chongkei hatü dokpü kü nevühen phoptuh; laangha kü monghumnyüke, shejao phai kü wong nekoh-ang” shei e.

³⁹ Büpa shao daiyei aihük shah eyei phop.

⁴⁰ Shao chem büpa leijashingkü jom peü shishi nyu; mehenangkü jom mükdok vihdaitü nyu, hatü jomi büpa kü mehe ehen nenying.

⁴¹ Büpa shao jempabü leiyei jomphong kü, “Amphong shaang thahshi shiyei nyiumeinyu je? Hajük-üng! Hepak ngoiteke; Shennyak Ha mangthülei lak kü lanei shuohtükteke.

⁴² Paotuh, jen daishah. Veituh, ngei luhahpüba hatouei peikünyüke!” shei e.

Jisu Yuhahpü hatü Yeppü

⁴³ Büpa shah eyei nyushingkü ngangahük kü Judas, anpünyi khongkü hük heih, hatü büpa mü khongnyü longpü hük yan, hatü miyaung notü ngongchongthü, shahkung nyuhbüthü hatü behethü kübü peiteke.

⁴⁴ Shaang luhahbüi jomphong kü, “Ngei üpa kü ju kü jüpkahen hapa shennyak yeptuh, hatü meishi yomei müei daituh” shei etü nyangeihepü huhen etüktü nyu.

⁴⁵ Hanangkü Judas jiüshangi Jisu touei heih-ei, “Nyuhbü!” shei etü ju kü jüp.

⁴⁶ Hahepak kü jomphongi Jisu kü lak hüng hatü yep.

⁴⁷ Shejao hathü khongkü yopailei yaongpü hüki büpalei yan tukei ngongchongei aa hükei dhaong lüktük.

⁴⁸ Hahepak kü Jisui jomphong kü, “Ngeiyü gühpa hük hih shei amphongi ngei yepnüng yan hi miyaung noshi peiküpü je?

⁴⁹ Nyihjeih ngei am mü phopshemei nyuhei nyutepih, shejao ammi ngei neyep. Shejao lai kü nyupü jiühen vongbong” shei e.

⁵⁰ Jom peü büpa tuhphongtü nyaidaikem.

⁵¹ Nethe hük büpa pheikü nyemin ashak ümtü müteke; mechem jomphongi büpa yeppa,

⁵² büpai ashak hukei yakphongtü bümkong mokdai.

Jisu Shahtapei Yaongpü

⁵³ Jomi Jisu ngongchong touei müei dei, hatü ngongpathü, behethü hatü shahkung nyuhbüthü peü thaiteke.

⁵⁴ Peter payü khaatshi büpa phei müshi daiyei ngongchongei chingkon thahshi heih-ei mongei shüei veyombü mü aw kü wohong meiyei uoshi nyu.

⁵⁵ Shaang ngongpathü hatü shahtapei nyupüthü kemei Jisu jühen shingvaishi büpa khüei denpü yemei nyu, shejao hükao nedang.

⁵⁶ Mehenangkü longshi shingi büpa khüei shahshem denpü shuoh, hatü jomei denpü shahthü nejiütei.

⁵⁷ Hanei ami yaongei büpa khüei shahshem denpü hapakei e,

⁵⁸ “Hami danpeyü, ‘Ngei hapa laki vepü phopshem bentükhen, hatü nyih jem mongkü laki nevepü phopshem hük vehen’ shei eyei danpeih” shei e.

⁵⁹ Shejao hapa thahshiyao jomei denpü nejiütei.

⁶⁰ Hahepak kü ngongchongi jomphong touei yaongtü Jisu kü, “Nüngi ha kü shahnyok neshuohhen je? Jomi nüng khüei denpü shuohpeyü meheang?” shei phe.

⁶¹ Shejao büpai jek neshei, hatü shahnyok neshuoh. Shao ngongchongi büpa kü, “Nüngü Moihimanpü Kahvangei Ha Khrista je?” shei phe.

⁶² Jisui, “Ngei hih, hatü nüngi Shennyak Ha Jeiyong Kahvangei lakdah philei uotü vangsho phum shangkü yiüküpü eehen” shei jangei e.

⁶³ Ha kü ngongchongi büpalei ashak shaaktü, “Ha mü nyeishi mehe denpü nahen?

⁶⁴ Ammi büpa thaüvaüpü danteke. Amphongi mehe temteipa?” shei e. Jom peüi büpayü dihen shangteke shei nyonghü.

⁶⁵ Hanei-i büpa kü yuopi shaohen pang; büpalei mük kü ashaki shaktük, hatü büpa kü ap, hatü büpa kü, “Teteivanei etuh” shei e. Yombüthüi büpa müei deiyei üpteke.

Peteri Jisu Nelahpü

⁶⁶ Peter maishi chingkonei nyushingkü ngongchongei chongphobü nyühanaüthü khongkü hük heih;

⁶⁷ mechem pinnyüi Peter aw kü uoshi nyupü eepa, pinnyüi büpa kü hüngei veitü, “Nüngao hapa Nazareth am Jisu mü shepeih” shei e.

⁶⁸ Shejao büpai, “Nüngi mehe jung enya ha ngei nenying nevaijü danao nedan” shei nelah-aoki e, hatü büpa shaden lemei heih, hatü ou gateke.

⁶⁹ Mechem hapa chongphopü nyühanaüi büpa eepa, shao hatouei yaongpüthü kü, “Hapa shennyakao hathü khongkü hük hih” shei e.

⁷⁰ Shejao büpai ha kao nelah-aok. Hapheikü maani angtü shao yaongpüthüi Peter kü, “Hingmei-üng nüngao hathü khongkü hük hih; mehenangkü nüngü Galil am khih” shei e.

⁷¹ Shejao büpai thaüvaühen pang, hatü büpai vangei, “Amphongi epü hapa shennyakü üpashang ngei nenyingnyih” shei e.

⁷² Hahepak kü nyipabü ou gateke. Hahepak kü Peteri büpa kü Jisui, “Ou nyipa gashekü nüngi ngei jempa thahshi nelah-aokpih” shei eshuohpü deih-ei dang. Büpai ha deih-ei dihen mü thep.