MARK 13 - DAÜLANGPÜ LAIHING (BSI)

Phopshem Benhen Yeihshi Epü

¹ Büpa phopshem mongeipü vamshingkü büpalei nanglomthü khongkü hük peiyei büpa kü, “Veihümao, Nyuhbü, yaong hatü shem mekei longpüang yo!” shei e.

² Hahepak kü Jisui büpa kü, “Nüngi hapa longpü shem eenyüke je? Hatouei yaong hük shangkü hük haüshi nenyupih; peü noei domtükhen” shei e.

Shangpong hatü Shüveidoidei

³ Mechem Jisu Olive Kahshangei phopshem kü khangteishi uoshi nyupa, Peter, Jakob, Johan hatü Andrew hathü büpa touei joei peiyei,

⁴ “Ha mechem vamhen, hatü hathü kemei dhaümhen nyangeihepü mehe nyukahen, ha ham kü eshih” shei e.

⁵ Hahepak kü Jisui jomphong kü, “Amphong üpayao lemnyongei nedaihen lituh.

⁶ Longshi shingi ngelei men kü, ‘Ngeiyü büpa hih’ shei eshi peikahen hatü jomi longi lemnyongei mülanghen.

⁷ Mechem ammi vehok vampü ngeü hatü vamhen shahjang danhenshang, am tenyem; hayü vamküshasha, shejao dohpü ngoihen shao-üng nyüpeih.

⁸ Mehenangkü jati jat khüei, ongchingi ongching khüei vamhen: shingmü shingmü pedi vükpü, hatü münghishaü nyuhen. Shejao hathü peü shangponghen pangpü mon” shei eteke.

⁹ Am laophü nyingi lishi nyutuh; mehenangkü jomi am yepei shahphen shingei lanei shuohhen; hatü amphong kü Sinagoglei üpphahen, hatü amphong ngei nangkü denpü shuohhen governor hatü ongthü touei yaonghen.

¹⁰ Shongpüba kü jat peü touei shahjangmei baonghen.

¹¹ Mechem jomi am shahphen shingei deiyei lanei shuohtükhen, ammi mehe ehen shei yeihshi tenyem; shejao hahepak kü mehe ephahenshang, ha eyeishuoh; mehenangkü hayü ammi enyu nevai, Laangha Daülangpai enyeih.

¹² Jeihinaü hi jeihinaü, pa hi ha, hatü hapeüthüi nyühipa khüei yaonghen hatü jüteihen;

¹³ hatü ngelei men kü am kü peüi jiühithen. Shejao üpai dohpü thahshi nenhenshang yanghen.

Nyembenüng Jiühitnalai

¹⁴ Shejao mechem ammi nyembenüng jiühitnalai neyaonghen shingei yaongshi eehenshang (iepüthüi ha nyingtuh), Judealei nyupüthüi kahshangthülei nyaidaituh;

¹⁵ shem adokei nyupüthüi lemhük yahhen shingvaishi shüh-ei mongei teshü;

¹⁶ kahlei nyupü shennyaki bhagthuh yahnüng nyokei telei.

¹⁷ Hathü nyih kü büm nekongi nyupüthü hatü naüja nyupü nyüthü onyükei!

¹⁸ Ha ünyü hepak kü nejiühen phoptuh.

¹⁹ Mehenangkü hathü nyih kü Kahvangi kahdoknyü linghinüng chemao mangvampü hatü shao mechemao nevamhen shanghah hük nyuhen.

²⁰ Shembüpai hathü nyih shoh-ei neleitüklangmeyü üpayao neyangaokhah shepeih, shejao büpai üam je, hathülei men kü büpai nyih shohtükpeih.

²¹ Hapa hepak kü hanei ami, “Veituh, ‘Khrista hatouei nyüke!’ nevaijü ‘Büpa antolei nyüke!’ shei ephüjü ha kü hingtelem.

²² Shahshem khrista hatü shahshem thibüthü longi vamkahen hatü nyangeihepü hatü yashanyale longi hukahen; aokjema daülangpüthüao lemnyongei mülanghen.

²³ Shejao am lituh; ngei lemphü am kü etepih.”

Shennyak Ha Yiühen Nang

²⁴ Shejao hathü nyih kü shangpongpü peihpheikü, “Vanghenyü manghdaihen, hatü lennyüi laophülei vangngai neshuohhen,

²⁵ hatü lithathü vangsho leipü vühen, hatü vangsho nganthü jenhen.

²⁶ Hahepak kü ngan hatü müknyinshekhang longpü kü Shennyak Ha phum shangkü yiüpü jomi eehen.

²⁷ Hahepak kü büpai kahdoknyü vaungjung ali kü kahdok dohpü kübü vangsho dohpü ngoishi büpalei vangsho phongshanthü shomei büpai jelangpüthü thailanghen.”

Adhapüi Shahlappü

²⁸ Shaang adhapü kübü hapa nyingtuh: Mechem adhapü kü nien neenei phenlak vampü eehenshang ammi shao hepak ngoikünyüke shei nying.

²⁹ Hapa keiha mechem ammi hathü douthü vampü eehenshang, büpa yopailei, hei-üng shem shadenei nyüke shei nyingtuh.

³⁰ Hingmei ngei am kü enyeih, hathü dou peü vamei mangpeih thahshi hapa denhivan peih-ei nedaihen.

³¹ Vangsho hatü kahdok peihdaihen, shejao ngelei shah nepeihdaihen.

Thaeimaei Nyuhen Vongbong

³² Shejao hapa nyih hatü hepak nang Opa mü lenei vangsho phongshani nevaijü Ha-iyao nevaijü üpaiyao nenying.

³³ Lituh, thaeimaei nyutuh; mehenangkü hepak mechem ngoikahen ammi nenying.

³⁴ Hapayü shennyak hük laophülei shem aathü kü veihen dousho hanei, hatü shaden yombü kao mükpaonathaei nyuhen etü yen kü daipü leshi nyüke.

³⁵ Hanangkü thaeimaei nyutuh; mehenangkü ammei shembü om kü hi, nevaijü nyak jiam kü hi, nevaijü ouga-oulüng kü hi nevaijü dhom mü leikahen ammi nenying,

³⁶ hei nevaijema büpa ngangahük kü leishingkü am shishi nyuhen.

³⁷ Ngei mehe am kü enya, ha peü kü enyeih; mükpaonathaei nyutuh.