MARK 11 - DAÜLANGPÜ LAIHING (BSI)

Aokpü Dangei Jerusalemei Yiüpü

¹ Mechem jomphong Jerusalem ngoipa, Olive Kahshang yopai-i Bethphage hatü Bethanylei büpai büpalei nanglom nyi shomei,

² jiji kü, “Anji shekü nyupü chingei daituh, hatü anji shüjahinüng shennyaki chemao manguopü gadu cheha hük shenshi eehen hih. Ha sheyei ankei” shei e.

³ Shennyak hanei-i, “Anji-i mehekei ha yahnya?” shei ephüjema, “Shembüpai ha nanyüke, hatü lomi nyokei leiphahen etuh” shei eteke.

⁴ Jiji daishingkü gadu cheha hük shaden yopailei chingshelei shenshi nyu. Jiji-i ha sheshingkü,

⁵ yaongshi nyupü hanei ami jiji kü, “Anji-i gadu cheha sheyei mehe lingnya?” shei e.

⁶ Jiji-i hathü kü Jisui mehe e, ha eteke, hatü hathüi ha yahhen shuoh.

⁷ Hapheikü jiji-i hapa gadu cheha Jisu touei müei lei, hatü ha kü jomei ashak nyemtü büpa ha shangkü uo.

⁸ Shennyakthü longi lem kü jomei ashak nyem, hatü lebüthüi phenhavunglak bhagei lem kü nyemshuoh.

⁹ Hahepak kü shelei shongpü hatü pheilei müpüthüi, “Hosanna! Shembüpalei men kü üpa peikünya moihiman!

¹⁰ Jenei bü Davidei ongching peipü moihiman! Peü mü shaopüba kü men vihtuh!” shei lenei e.

¹¹ Jisu Jerusalemei peiyei phopshemei shü, hatü büpai shinei veitü pheidaipü nangkü anpünyi mü Bethanylei heihdai.

Jisui Adhapü kü Thaüvaüpü

¹² Nyihphei mechem jomphong Bethany leipü leipa, büpa aeiteke.

¹³ Tailuei büpai adhapü hük phenlak ngetshi eeyei hahhen meheyao nyüla shei heih. Mechem büpai ha ngoiyei heihpa, büpai phenlak mü lenei meheyao nedang; mehenangkü hapayü betjük jükhen dühü nevai-i nyuteke.

¹⁴ Büpai hapa pü kü, “Hajük kü üpaiyao mechemao nüng kübü betjük nyemtehah” shei e, hatü büpalei nanglomthüi ha danteke.

Jisui Phopshem Daühüpü

¹⁵ Hapheikü jomphong Jerusalemei lei, hatü büpa phopshemei shüei phopshem mongei bhei yupü, shakpü am changtükhen pang. Büpai lop jeiteipüthülei haüdü hatü athuba yupüthülei uoshing khüptük;

¹⁶ hatü büpai phopshem konmong homei meheyao kotü lüteihen nehan.

¹⁷ Büpai jomphong kü nyuh-ei e: “Ha nyangei nenyupü je? Ngelei shemü jat peü shingvaishi phoppü shem shei nyükhen, shejao ammi ha gühpathülei dung leitükteke” shei e.

¹⁸ Mechem ngongpathü hatü shahkung nyuhbüthüi ha danpa, jomi büpa jühen lem yem; jomi büpa kü nyem; mehenangkü khongnyüi büpai nyuhpü kü yashan.

¹⁹ Mechem om dhüpa, Jisu hatü büpalei nanglomthü ching leipü lüdai.

Kaudaipü Adhapü Kübü Nyinghen

²⁰ Nepnüng dhom mü jomphong peih-ei daishingkü hapa adhapü tünglang thahshi kaudaitü ee.

²¹ Hahepak kü Peteri ha deih-ei dang hatü büpa kü, “Nyuhbü, veituh! Nüngi thaüvaüphongpü adhapü kaudaiteke” shei e.

²² Jisui jomphong kü, “Kahvang kü hinglemtuh.

²³ Hingmei ngei am kü enyeih, ammi hapa kahshang kü, ‘Daituh, hatü yungchingei hüngdaituh’ shei ammei mong kü nejü-üi ammi mehe e, ha dükkahen shei hinglemei ejema, ha dükkahen.

²⁴ Hanangkü ngei am kü enyeih, mehe shingvaishi ammi phopei yühen, ha dangtepih shei hinglemtuh, hatü ha ammei vaihen.

²⁵ Mechem ammi phopei yaonghen, am hanei am mü nemeitei-i nyujema mang tükeishuoh, shejüang vangsho leipü ammei Pa-i ammei mang tükphahen” shei e.

²⁶ Shejao ammi mih kü mang netükjema, vangsho leipü ammei Pa-iyao ammei mang netükphahen.

Jisulei Wong kü Chengpü

²⁷ Shao jomphong Jerusalemei pei. Büpa phopshemei kamteiyei nyushingkü ngongpathü, shahkung nyuhbüthü hatü behethü büpa touei peiyei,

²⁸ “Nüngi hathü dou dükhen mehe wong nyüpa? Üpai nüng kü hathü dükhen wong shuohpa?” shei phe.

²⁹ Jisui jomphong kü, “Ngeiyao amphong kü shah hük pheshah, hatü ammi ngei kü ha ephüjema ngeiyao amphong kü mehe wongi ngei hathü düknya ephahen hih.

³⁰ Johani baptükpeyü vangsho leipü hi hangku leipü vampa? Ngei kü eshih” shei e.

³¹ Jom hüki hük mü shah dakteiyei, “Jeni, ‘Vangsho leipü’ shei eshuohjema, büpai, ‘Ammi büpa kü mehekei hingnelemnya?’ shei ephahen.

³² Shejao jomi, ‘Hangku leipü vampeih’ shei ehenü jomi khongnyü kü nyem; mehenangkü peüi Johanü hingmei mü thibü hük shei ieyeilem.

³³ Hanangkü jomi Jisu kü, ‘Hami nenyingang’ shei e. Jisui jom kü, ‘Ngeiyao amphong kü mehe wongi hathü düknya ne-ephapih’ ” shei eteke.