MARK 10 - DAÜLANGPÜ LAIHING (BSI)

Awdep Yanpü Nang Jisui Epü

¹ Jisui hapa shing tuhtü Jordan homei Judea kahmükei heih. Shao khongnyü büpa shonei thai, hatü büpalei vanglem kei büpai shao hathü kü nyuh.

² Pharisee am hanei peiyei jomi büpa kü dokei, “Baha hüki laophülei nyüha mü yanhen shahkungi mongpü vaila?” shei phe.

³ Büpai jom kü, “Mosai am kü mehe shahkung shuohpa?” shei e.

⁴ Jomphongi, “Yanhen lai nyangtü pinnyü mü yanhen Mosai epeih” shei e.

⁵ Shejao Jisui jomphong kü e, “Am mong ahshi vaanpü nangkü büpai am kü ha shahkung nyangpeih.

⁶ Shejao kahbhao mebü Kahvangi nyüha hatü baha shei lingpeih.

⁷ Ha vaipü nangkü baha hüki laophülei nyü hatü pa tuhphongtü laophülei nyüha mü mongjemei nyunyeih,

⁸ hatü jijiyü phai hük leihen. Hanangkü jiji hajük kü nyi nevai, shejao hük mon.

⁹ Hanangkü Kahvangi mehe jemhü, shennyaki ha teyantük.”

¹⁰ Mechem jomphong shemei nyupa, nanglomthüi shao büpa kü ha jung phe.

¹¹ Büpai hathü kü e, “Üpai laophülei nyüha mü yanei lebü nyüha mü shem yemnya, büpai pinnyü mü mükbongjuyungnyüke;

¹² hatü üpai laophülei baha mü yanei lebü baha mü shem yemnya, pinnyüi büpa mü mükbongjuyungnyüke.”

Jisui Maanpü Hashihthü Moihimanpü

¹³ Büpai laki honghühen shingvaishi shennyakthüi maanpü hashihthü büpa touei müei pei; hatü nanglomthüi hathü kü loh.

¹⁴ Shejao mechem Jisui ha eepa, büpai jomphong kü mongshih-ei, “Maanpü hashihthü ngei touei peihütuh; jom kü tekhüamshuoh; mehenangkü Kahvang ongchingü hathü keipülei hih.

¹⁵ Hingmei ngei am kü enyeih, maanpü hashih hük kei leitü üami Kahvang ongching neyahhenshang, halei neshüaokpih” shei e,

¹⁶ hatü büpai maanpü hashihthü kü laki khaaitü büpalei laki shüngei moihimanshuoh.

Shemmeipa Hük

¹⁷ Jisu yen daihen layaong shingkü shennyak hük mokei heih-ei aümei shatü büpa kü, “Nyuhbü meipü, vanyangyem mükjüp danghen shingvaishi ngei mehe dükhenang?” shei phe.

¹⁸ Jisui büpa kü, “Mehekei nüngi ngei kü meipü shei nyüknya? Kahvang mü lenei üpayao meipü neshiü.

¹⁹ Nüngi ha shahkung nyingei nyüke: Nüngi tejü; nüngi mükbongjuyung tedük; nüngi tegüh, nüngi shahshem denpü teshuoh; nüngi te-ühing; anyü hatü ampa kü dhüm shuohtuh” shei e.

²⁰ “Nyuhbü, ngei hashih mebü hathü peü dükei heihpeih” shei büpai e.

²¹ Jisui büpa kü bamei veitü, “Nüng lemhüki taoei nyüke; daituh, nüng angpü lemphü yutü ha lop taopathü kü shuohtuh, hatü nüngei mop vangsholei nyuhen; hapheikü huoi, ngei phei mükei” shei e.

²² Mechem hapa shennyaki ha danpa, büpa dhe yim, hatü mongshangei lüdai; mehenangkü büpa mop longi nyuteke.

²³ Hapheikü Jisui shinei veitü büpalei nanglomthü kü, “Shemmeithü Kahvang ongchingei shühenü meshük douwong vaihen!” shei e.

²⁴ Nanglomthüi hathü shah kü thama. Shejao Jisui shao jomphong kü, “Hapeüthü, Kahvang ongchingei shühen meshük wongpüang!

²⁵ Shemmeipa hük Kahvang ongchingei shülei meyü ut hük nyiammet sha kü shomei daipü-üng yopüba” shei e.

²⁶ Ha shah kü nanglomthü longi thamaei hüki hük mü, “Shejema, üpa yangaokhenang?” shei etei.

²⁷ Jisui jomphong kü khangei veitü, “Hangku shingvaishi hayü neaokbenüng, shejao Kahvang shingvaishi nevai; Kahvang shingvaishi dou peü aokbenüng hih” shei e.

²⁸ Peteri büpa kü, “Veituh, hamphongi lemphü tuhphongtü nüng phei müpeih” shei e.

²⁹ Jisui, “Hingmei ngei am kü enyeih, üpai ngelei men hatü shahjangmei nangkü bükhishem, jeihinaüthü, nyahinaüthü, nyü nevaijü pa, hapeüthü nevaijü kahthü tuhphong, jomi ha den kao kho lomei,

³⁰ shemthü, jeihinaüthü, nyahinaüthü, nyü, hapeüthü, hatü kahthü mü shüveidoideiyao omshi hapa den kü danghen, hatü ngoikahen den kü vanyangyem danghen.

³¹ Shejao shongpüthü longshi shing shompü vaihen, hatü shompüthü shongpü vaidaihen” shei e.

Jempabü Jisui Büpa Dihen hatü Yangei Leihen Epü

³² Shaang jomphong Jerusalemei aongpü lemei kamei nyu, hatü Jisu-ü jom shekü kamei nyu; nanglomthü thama, hatü jom phei müpüthü nyemteke. Shao büpai anpünyi hayaoha khaatei dei, hatü büpa kü mehe vamhen ha jomphong kü ehen chongpang.

³³ “Veituh, jenphongü Jerusalemei aongnyu khih, hatü Shennyak Ha ngongpathü hatü shahkung nyuhbüthü kü lanei shuohhen, hatü jomi büpa jühen shingvaishi nyonghühen; hapheikü jomi kung amei lak kü lanei shuohhen;

³⁴ Jomi büpa kü yaühen, yu-opi shaohen, bheihen, hatü jühen; hatü nyih jem pheikü büpa yangei leikahen.”

Jakob hi Johan Nyi-i Yüpü

³⁵ Zebedeelei cheha Jakob hi Johan nyi büpa touei heih-ei büpa kü, “Nyuhbü, henji nyi-i mehe yühenshang ha nüngi dükshih” shei e.

³⁶ “Ngei anji kü mehe dükhahhünya?” shei phe.

³⁷ Jijinyi-i büpa kü, “Nüngei müknyinshekhang kü henji hük nüngei lakdah philei, hük laknyong philei uohen hanshih” shei e.

³⁸ Shejao Jisui jiji kü, “Anjinyi-i mehe yünya ha anji-i nenyingang. Anji-i ngei yingpü yungshong yingaokhen je, nevaijü ngei mepa baptükpai baptükhen hapakei anji-i baptükaokhen je?” shei jangei e.

³⁹ Jijinyi-i, “Aokhen hih” shei jang. Hahepak kü Jisui jiji kü, “Ngei yingpü yungshong anji-i yinghen; ngei mepa baptükpai baptük, hapai anjiyao baptükhen;

⁴⁰ shejao ngelei laknyong hatü lakdah philei uohenü ngei shuohhen nevai, shejao hapayü üam shing temei nyu hathü shing hih” shei jangei e.

⁴¹ Mechem nanglom jom ani ha jung danpa, jomi Jakob hi Johan nyi kü mongshih.

⁴² Hanangkü Jisui jomphong kü nyüktü, “Kung amiyü nanglakthüi üpa kü jomei vanglem lembü shei nyingnya, büpai jom shak kü ong vainyeih, hatü longpüthüyü jom shak kü ong vainyeih.

⁴³ Shejao amphong khongü hapakei nevai; amphong khongkü üpai longpü vaihünya, büpayü ammei chongphobü leihen vongbong,

⁴⁴ hatü amphong khongkü üpai shongpü vaihünya, büpa peüei aa vaihen vongbong.

⁴⁵ Mehenangkü Shennyak Ha chongphohahhen shingvaishi nevai, shejao chongphohen hatü longi angei leihen shingvaishi laophülei yangnyu shuohnüng yiüpeih” shei e.

Jisui Mükphüngpa Bartimas Meihüpü

⁴⁶ Jomphong Jerikolei heih. Büpa, büpalei nanglomthü hatü khongnyüi Jeriko leipü daishingkü Timaeuslei cheha mükphüngdaipü yühahjaiyingpü Bartimas lemkungei uoshi nyu.

⁴⁷ Mechem büpai hapayü Nazareth am Jisu khih shei danpa, büpai lenei, “Jisu, David Ha, ngei kü phahjishih!” shei e.

⁴⁸ Longshi shingi büpa kü nenmü nyutuh shei e, shejao büpai nyeinya wongmü lenei, “David Ha, ngei kü phahjishih!” shei e.

⁴⁹ Jisu shenei yaongtü, “Büpa hatouei nyükei deikei” shei e, hatü jomi büpa nyükei deiyei büpa kü, “Mongmeituh, yaongtuh, büpai nüng kü nyüknyüke” shei e.

⁵⁰ Hanangkü büpai ashak nyiukei shükphongtü büpa yaongei Jisu touei heih.

⁵¹ Jisui büpa kü, “Ngei nüng kü mehe dükhahhünya?” shei phe. Mükphüngpai büpa kü, “Nyuhbü, ngei eehüangke” shei e.

⁵² Jisui büpa kü, “Leituh, nüng hinglempai nüng meidaiteke” shei e. Chemjalak kü büpalei mük ee-aok, hatü Jisu phei mü.