MARK 1 - DAÜLANGPÜ LAIHING (BSI)

Johan Baptükbüi Chongvenpü

¹ Hapayü Kahvang Ha Jisu Khristalei shahjangmei chongpangpü nyüke.

² Hapayü Isaiah thibüi nyangpükei chongpang: “Veituh, ngei ngelei shahjang kobü nüng shekü nüngei lem temhen shomnyeih;

³ jahpanei hüki lenpü ngeü: ‘Amphongi Shembüpalei lem temtuh, büpalei lem kangshangi lingtuh.’ ”

⁴ Hanangkü Johan baptükbüi jahpanei vamei mang tükpü danghen nangkü mong lepei yung kü hüngtuh shei chongven.

⁵ Judea kahmük hatü Jerusalem kübü nanglakthü peü büpa touei peiyei jomei mang lah-ei Jordan yungyenei baptük.

⁶ Shaang Johanü ut mum thuhtü, phaishuw shüngshep shep, hatü shouk hatü phaü nyahjiü hahteke.

⁷ Büpai, “Ngei mao wong kohpü hük ngei pheikü peikünyüke; ngei aümei shatü büpalei lathuhvü laihen dangkao ngei nechang.

⁸ Ngei am kü yungi baptükteke, shejao büpai am kü Laangha Daülangpai baptükphahen” shei e.

Jisu Baptükpü hatü Dokpü

⁹ Hathü nyih kü Jisu Galil kahdok Nazareth leipü pei, hatü Jordan yungyenei Johani baptükshuoh.

¹⁰ Mechem büpa yung mongeipü vamjapa, vangsho jiam yamtü athuba keiha Laangha Daülangpü yiüei büpa kü bakpü büpai ee;

¹¹ hatü vangsho leipü ngeü hük vamei, “Nüngü ngei bampü Ha; ngei nüng kü mong hahnyeih” shei e.

¹² Ngangahük kü Laangha Daülangpai büpa jahpanei müei dei.

¹³ Büpa jahpanei nyih pinyi thahshi Kahshih-i dokei ang; hatü büpayü phaüyemthü mü nyu, hatü vangsho phongshanthüi büpa yomteke.

Jisui Nyah Yeppüthü Nyükpü

¹⁴ Shaang Johan yepei khoklatei tuhpheikü Jisui Galilei Kahvangei shahjangmei chongvenei pei,

¹⁵ hatü, “Hepak ngoiteke, hatü Kahvang ongching yopailei nyüke; mong lepei shahjangmei kü hinglemtuh” shei e.

¹⁶ Jisui Galil yungching phungei daishingkü büpai Simon hatü chenaü Andrew jiji yungchingei shang shepei ee; mehenangkü jijiyü nyah yeppü am nyuteke.

¹⁷ Jisui jiji kü, “Ngei phei mükei hatü ngei anjiyü shennyak yeppü am leihühen hih” shei e.

¹⁸ Shüshülangi jijinyi-i shang tuhphongtü büpa phei mü.

¹⁹ Büpa ajüki yanei heihjü büpai Zebedeelei cheha Jakob hatü chenaü Johan nyi ailei uoshi shang temei ee.

²⁰ Büpai jiji eehinüng jiji kü nyük, hatü jiji-i chepa Zebedee, hatü nanglat shanpü shennyakthü ai mongei tuhphongtü büpa phei mü.

Mang Laanghai Yeppü Shennyak

²¹ Jomphong Kapernaumei heih, hatü mechem Sabbath nyih ngoipa, büpa Sinagoglei shüei nyuhteke.

²² Büpai nyuhpü kü jomi thama; mehenangkü büpai shahkung nyuhbüthü kei nevai, shejao ngan kohpü hük kei nyuhteke.

²³ Hahepak kü mang laanghai yeppü shennyak hük Sinagoglei nyu,

²⁴ hatü büpai, “Nazareth am Jisu, nüngi hamphong kü mehe dükhen nyüpa? Nüngü Kahvangei Daülangpü Phongshan hük shei ngei nyingnyeih” shei lenei e.

²⁵ Shejao Jisui büpa kü loh-ei, “Nüng nenmü nyutuh, hatü büpa leipü vamdaituh” shei e.

²⁶ Mang laanghai wong mü hapa shennyak kü dhi, hatü ngeüwong anei büpa kübü vam.

²⁷ Jom peü thama, hatü jom hüki hük mü pheteiyei, “Hayü meheang yo? Ngan kohshi nyuhpüvenpü ja hük khih! Büpai mang laanghathü kü shahkung shuohjü jomphongiyao büpai epü bangnyüke” shei etei.

²⁸ Chemjalak kü büpai dükpü doumei jung Galil kahmük shonpü peü lemei yaüei dai.

Jisui Longi Meihüpü

²⁹ Jomphong Sinagog leipü vamei daihinüng Simon hi Andrew amei shemei Jakob hi Johan nyi mü shü.

³⁰ Shaang Simonei nyühalei chenyü bheüi tüngei lemshi nyupü jomphongi büpa kü ejateke.

³¹ Büpa heih-ei pinnyülei lak kü düktü phuk. Hahepak küüng tüngpü meidai hatü pinnyüi jomphong kü nemnoei shuoh.

³² Ha ya om vanghe shüpheikü jomphongi büpa touei tüngpü hatü mang laanghai yeppüthü peü müei dei,

³³ hatü ching am kemei chingshelei thaiyei shüngshi nyu.

³⁴ Büpai dinlem laolaoi tüngpüthü meihü, hatü mang laanghathü changtük; hatü büpai mang laanghathü kü meheyao ehen nehan; mehenangkü jomphongi büpa nyingei nyuteke.

Jisui Galilei Chongvenpü

³⁵ Nepphei vangngai pibom kü büpa lomi paoei daiyei vüngmakpü shing hükei phop.

³⁶ Simon hatü büpalei küphüthüi büpa yemei nyu.

³⁷ Mechem jomphongi büpa pongpa, jomphongi büpa kü, “Peüi nüng yemnyüke” shei eshuoh.

³⁸ Büpai, “Jen shinei nyupü chingthü leiyao daishah; shejüang ngei hathü leiyao shahjangmei nyuh-aokhen; mehenangkü ngeiyü ha düknüng yiüpeih” shei e.

³⁹ Büpai Galil peü lemei daiyei Sinagogthülei shahjangmei chongven hatü mang laanghathü changtük.

Jisui Ngombü Hük Meihü

⁴⁰ Ngombü hük büpa kü khümei pei, hatü aümei shatü büpa kü, “Nüngi mongjema nüngi ngei meitükshih” shei e.

⁴¹ Jisui shinshangei deih, hatü büpalei lak deiyei büpa kü haongtü, “Ngei mongnyüpeih, nüng meidaituh!” shei e.

⁴² Chemjalak kü ngomdin daüdai hatü büpa meidai.

⁴³ Büpa kü wongmü shahvüng shuohtü büpai büpa deishih,

⁴⁴ hatü büpa kü, “Nüngi üpa kao hapa jung te-e; shejao daiyei Mosai epükei ngongpa kü hueishuoh, hatü jom touei meidaipü denpü hük vaishi nüngi moila shuohtuh” shei e.

⁴⁵ Shejao hapa shennyak daiyei peü lemei hapa shahjang baongtük. Hanangkü Jisui hapa jilalei ngaihe-i nepeiaok; shejao büpai vüngmakpü shingei nyu, hatü nanglakthü shing peü leipü büpa touei pei.