MALAKI 3 - DAÜLANGPÜ LAIHING (BSI)

¹ Veituh, ngei shekü lem temnüng ngelei phongmokbü shomphahen, hatü Shembüpa, üpa ammi yemnyüpa, ngangahük kü büpalei phopshemei peikahen; vangteishuwteipü phongmokbü, üpa kü am kennya, peikahen shei Shembüpa Kahvangi enyüke.

² Shejao büpa yiüpü nyih kü üpai munenaokhen, hatü büpa peishingkü üpa yaongaokhen? Mehenangkü büpayü nyiam oukbülei aw kei, hatü ashak dhobülei sapon kei nyukahen.

³ Büpayü nyiam jakei hienpü shennyak keiha nyukahen; büpai Levi am daühühen hatü daülangshemshepü kü Shembüpa kü moila shuohhen shingvaishi büpai jom hon hatü ngin kei daühühen.

⁴ Shejüang, Judah hatü Jerusalem amei moilayü shongpü nyihthü kei, hatü peihdaipü bongthü kei Shembüpa tou kü mongongbenüng nyukahen.

⁵ Hanangkü shahphenhen shingvaishi ngei am yopailei peikahen. Phongyompüthü, mükbongjuyungpüthü, shahshem denbüthü, nang shapü kü nanglat shuohhen kü doiteipüthü, vaümnyü hatü hashihha kü, hatü kung shennyak kü depünaampüthü khüei ngei lomi denpü shuohhen, shejao am payü ngei kü tenyem shei Shembüpa Kahvangi enyüke.

Kahvangei Moila Gühpü

⁶ Ngeiyü Shembüpa, ngei nejeileinyih. Hanangkü, Oh Jakobei hühihathü, ngei am nemahtükpih.

⁷ Ambü ampa amei hepak mebü am ngelei shahkungnyü kübü yandaipeih, hatü hathü nedükpeih. Ngei touei mong lepei leikei, hatü ngei am touei lepküshah shei Shembüpa Kahvangi enyüke. Shejao “Ham mekei mong lephen?” shei ammi enyüke.

⁸ “Shennyaki Kahvang leipü gühhen je?” Shejao ammi ngei leipü gühteke. Shejao, “Hami mekei nüng leipü gühpa?” shei ammi phenyüke. “Ankhong moila hatü moilathü gühteke.”

⁹ Thaüvaü hüki am thaüvaütükteke; mehenangkü am jatlithü kemei ngei leipü gühteke.

¹⁰ Ngelei shemei hahying changshi nyuhen shingvaishi ammei ankhong moila peü tuhshingei yah-ei peikei, hatü ammi hapa tuhshing neshiüi manglei thahshi vangsho shaden aptü moihiman bhuh-eilinei yahphahen hi neyahphahen shangkü ngei kü doktuh hatü veituh shei Shembüpa Kahvangi enyüke.

¹¹ Yemhimaki ammei sheilivungla mangtükhen kübü ngei yangei tuhphahen, hatü ammei nyalingngupai kah kübü betjük niha mü nekaongdaipih shei Shembüpa Kahvangi enyüke.

¹² Hahepak kü jat peüi am kü moihimanpü am shei nyükhen; mehenangkü ammei kahdok nyuhübenüng vaikahen shei Jeiyong Shembüpa Kahvangi enyüke.

Nedaünelangpü kü Daülangpai Aokpü

¹³ Ammi ngei khüei shahlong eteke shei Shembüpai enyüke. Shejao, “Hami nüng khüei mekei shahlong epa?” shei ammi enyüke.

¹⁴ “Kahvang chongphoteipeyü angsha khih. Büpai epü dükjü ham mehe nanglei, nevaijü mahng theppü am kei heihjajao mehe danghen?

¹⁵ Changmeipüthüang moihiman dangnyüke shei shaang jeni ehen mü hetteke. Douten dükpüthüang bamei shemmei leinyüke, shejao mechem jomi Kahvang mü dokteinya, jom-ang yangdainyüke” shei ammi enyüke.

¹⁶ Hahepak kü üami Shembüpa kü nyemnya, jom hüki hük mü eteinyüke, hatü Shembüpai bang, hatü ha danteke. Büpa nyupü shingei deihen shingvaishi laitap hük kü Shembüpa kü nyempüthü hatü büpa kü dhüm shuohpüthülei men nyangteke.

¹⁷ “Jomü ngelei nanglakthü, hatü hapa nyih jomü ngelei thushong dounyü vaihen, hatü pa hüki laophü chongphopü hapeü yangpükei ngei jom yanghen” shei Shembüpa Kahvangi enyüke.

¹⁸ Shao chem, ammi daülangpüthü hatü nedaünelangpüthü aa kü, hatü Kahvang chongphopüthü hatü büpa chongnephopüthü aa kü baong hanei eehen.