MALAKI 2 - DAÜLANGPÜ LAIHING (BSI)

Ngongpathü kü Kangpü

¹ Shaang, Oh ngongpathü, hapa kangpeyü am shingvaishi nyüke.

² Ammi ha nebangjema, hatü ngelei men müknyinshekhanghen ammei mong kü nelejema, ngei am kü thaüvaü shomhen, hatü ammei moihimanthü thaüvaütükhen. Hih, ammei mongkü ngelei men müknyinshekhanghen nelepü nangkü ngei hathü peü thaüvaütüktepih shei Shembüpa Kahvangi enyüke.

³ Ngei ammei dhe kü ammi moilapü yemhimakei nühinami nyiohen, hatü am hapa nühinam shingei yah-ei daihen.

⁴ Hanangkü Levi am mü ngei vangteipü nedoh-i dükhen shingvaishi ngei am kü hapa kangpü shompü khih shei ammi nyinghen shei Shembüpa Kahvangi enyüke.

⁵ Ngei jom mü vangteipeyü yangnyu hatü chingmeivangmei vangpüshuwpü nyuhampeih; jomi ngei kü nyemhen hatü dhüm shuohhen hatü ngelei men kü nyemhen shingvaishi ngei ha jom kü shuohpeih.

⁶ Jomei ju kü shahhing nyuhpü nyüke, hatü jomei jubenyeijaang kü meheyao nejiüpü neshiü. Büpa ngei mü chingmei kü hatü kangshangi kam, hatü mang kübü longi müei lei.

⁷ Mehenangkü ngongpa hükei jubenyeijaang kü kihikon anghen vongbong, hatü büpalei ju kübü shennyakthüi nyuhpü venpü yemhen vongbong; mehenangkü büpayü Shembüpa Kahvangei shahjang kobü nyüke.

⁸ Shejao amphong jiüpü lem kübü biendai, hatü ammi nyuhpü venpai longi huluh shuohteke; ngei mü am Levi ami vangpüshuwpü mangtükteke shei Shembüpa Kahvangi enyüke.

⁹ Hanangkü hangkuli peüei shesha kü ngei am vüshihpeih, hatü maanpü am leihüpeih; mehenangkü ammi ngelei lemthü kü nekam, shejao shahkungnyü noshingkü baong hanei noteke.

Hingnelempü Judah am

¹⁰ Jen peüei pa hük nyüpü nevaipü je? Kahvang hüki jen peü nelingangpü je? Shejema mehekei jenei bühipathüi Kahvang mü vangeishuwpü mangei hüki hük khüei luteilemteinya?

¹¹ Judah ami lahtükpü shaitükteke, Israel kü hatü Jerusalem kü jiühitbenüng mang thahteke; mehenangkü Judah ami kung amei kahvangei yiükha mü shem yempai Shembüpai kenpü phopshem sheihtükteke.

¹² Üpai ha düknya, büpai moila koei peijao Shembüpa Kahvangi Israel am khong kübü katitükhen.

¹³ Ammi hayao düknyüke: Ammi Shembüpalei moidü theppü youngpai, mükphi oushangi matüknyüke; mehenangkü büpai hajük kü ammei moila kü mong neshuohnyu nevaijü ammei lak kübü moila mongongshi neyahnyu.

¹⁴ “Büpai mehekei neyahnya?” shei ammi phenyüke. Mehenangkü am nethe hepak ammei nyüha mü lahtükpü mangtük. Pinnyü ammei nyüha nyuteke, hatü ammi pinnyü mü jiüshangi nyuhen shei Kahvang toumü lahtükpü shaitükteke.

¹⁵ Kahvangi am pinnyü mü büm hük hatü laangha hük shei nelingangpü je? Hapa kü Kahvangei mükhong mehe nyüpa? Mehenangkü Kahvangi büpa nyingpü hühiha yemteke. Hanangkü am nethe hepak kü lümei yahpü nyüha mü shahhing ne-e-i nenyuhen am nyingi yomtuh.

¹⁶ Ngei shemong yanpü kü jiühitnyeih, hatü dehilao kü ashaki jümtü nyupü kü jiühitnyeih shei Shembüpa Kahvangi enyüke. Hanangkü am nyingi lituh, hatü shahhing ne-e-i tenyu.

Shahphenpü Nyih

¹⁷ Am langmaanshapshüpai Shembüpa nyiuhüteke. “Hami mekei Shembüpa nyiuhüpa?” shei ammi enyüke. “Üami mang düknya, Shembüpai ha lümnyüpeih, hatü büpai hathü kü mongongnyeih” shei epai nevaijü “Shahhing Kahvang melei nyüpa?” shei phepai Shembüpa nyiuhüteke.