MALAKI 1 - DAÜLANGPÜ LAIHING (BSI)

¹ Malaki thibü homei Israel am touei peipü Shembüpalei shah:

Shembüpa i Israel am kü Bampü

² Shembüpai enyüke, “Ngei am kü bamnyüpeih.” Shejao, “Nüngi ham kü mekei bamnya?” shei ammi enyüke. Esau-ü Jakobei chejei nevaipü je? shei Shembüpai enyüke. Halangmao ngei Jakob kü bam,

³ shejao ngei Esau kü jiühit, hatü ngei büpalei phaüshang kahmük yaktükpeih, hatü büpalei mükjüp shahhishuw chi kü tuhphongpeih.

⁴ Edom ami, “Hamü ngümei mangtükjao shao lingei leihen” shei ejema, Shembüpa Kahvangi hapakei enyüke: “Jomi linghen aok, shejao ngei ha bentükhen. Jom kü mang kahdok, Shembüpalei mongshih phangkü nyupü nanglakthü shei nyükhen.

⁵ Ammei müki lekei ha eehen, hatü ammi, ‘Shembüpayü Israel amei viong peih-eiyao ong khih’ ” shei ehen.

Moila kü Kawhikang Kohpü

⁶ Hapeü hüki laophülei pa kü, hatü aa hüki laophülei shembü kü dhüm shuohnyüpeih. Ngei ammei pa vaijema, ngei kü melei dhüm shuohnya? Ngei ammei shembü vaijema, ngei kü nyempü melei nyüpa? shei Shembüpa Kahvangi enyüke. Oh ngongpathü, ammi ngelei men ne-ienelemnyu, shejao ammi, “Hami nüngei men mekei ne-ienelemi nopa?” shei phenyüke.

⁷ Ngelei moidülei ammi nedaünelangpü hahying haünyüke, hatü ammi, “Hami mekei hapa sheihtükpa?” shei enyüke. Hapai ngelei moidü ne-ienelemnyu.

⁸ Mechem ammi mükphüngdaipü yemhimak moila shuohhenshang, hayü nejiüpü nevaipü je? Mechem ammi la khodaipü nevaijü tüngpü yemhimakthü moila shuohhenshang, hayü nejiüpü nevaipü je? Governor hük kü hapa keipü thintho yahshuohjü büpai am kü bampü dou dükphahen je? shei Shembüpa Kahvangi enyüke.

⁹ Shaang, jen kü jangphahen shingvaishi Kahvang kü phopeishuoh. Henüng keipü moila shuohjü büpai am yahhen je? Büpai ammi phoppü kü nejangphapih, hatü hayü am pungpü vaikahen. Büpai am kü phahji huphahen je? shei Shembüpa Kahvangi enyüke.

¹⁰ Ngelei moidü kü yahlak neshiüpü aw nejakteihen shingvaishi Oh, amphong khongkü hüki phopshem sha küptüktuh! “Ngei amphong kü mongneongnyih hatü ngei ammei lak leipü moila neyahpih” shei Shembüpa Kahvangi enyüke.

¹¹ Mehenangkü heong kübü heshü thahshi jatthü peü mü ngelei men longpü vaihen, hatü shing peü kü ngelei men kü vong meipü ayingshü, hatü daülangpü moila koei peihen; mehenangkü ngelei menü jatthü shak kü longpü nyüke shei Shembüpa Kahvangi enyüke.

¹² Shejao ammi Shembüpalei moidü sheihdaiteke shei epai, hatü yaktükpü hahying moila shuohpai ngelei men tentükteke.

¹³ Ammi, “Hathüi ham kü hanggo vihteke” shei enyüke, hatü ammi ngei vüshihnyüke shei Shembüpa Kahvangi enyüke. Ammi ammei moilayü aetpüshepü dou, la khodaipü nevaijü mük mangdaipü yemhimakthü yah-ei peinyüke. Ammei lak kübü ngei henüng yahhen je? shei Shembüpai enyüke.

¹⁴ Mi khongkü meipü mi chebaong nyüpeih, hatü ha shuohhen shei lahtü üpai lueilemei kawhikang kohpü yem Shembüpa kü moilanya, büpa thaüvaüthemthetuh. Mehenangkü ngeiyü longpü ongpa hatü jatthü peüi ngelei men kü nyemhen shei Shembüpa Kahvangi enyüke.