LUK SHAHSHA APPÜ 8 - DAÜLANGPÜ LAIHING (BSI)

Nyüha Hanei Jisu mü Daipü

¹ Hapheikü müshi büpai chingnyü chinghathülei Kahvang ongching shahjangmei baongei dai. Nanglom anpünyi büpa mü nyu,

² hatü mang laanghai yeppü hatü tüngpü meitükshuohpü nyühathüao nyu: Magdalen menpü Mary, üpa leipü mang laangha nyet changtük,

³ hatü Herodei kheibü Chuzalei chenyüha Joanna, hatü Susanna, hatü lebü longi nyu. Hathü nyühathüi jomi angpü yah-ei Jisu hatü büpalei nanglomthü kü sheühteke.

Sheili Haibü Hüki Shahlappü

⁴ Mechem khongnyü longpü thai hatü jila hük pheikü hük kübü nanglakthü büpa touei peijapa, büpai shahlap hük e:

⁵ “Sheili haibü hük sheili haihen dai; hatü büpai sheili haishingkü sheili hanei lemei vü, hatü la-i shoup, hatü hanei shangouthü peiyei hahtük.

⁶ Sheili hanei yaong shangkü vü, hatü ha long, shejao yung neshiüpü nangkü ha vandai.

⁷ Sheili hanei hüh chi kü vü, hatü hüh longei ha luplang.

⁸ Sheili hanei kahmeichong kü vü, hatü ha longei kho lomei betjük jük.” Büpai ha etü, “Banghen dhaong nyupü peüi bangtuh” shei e.

Shahlapei Mükhong

⁹ Hapheikü büpalei nanglomthüi büpa kü hapa shahlap mehe lappüang shei phe.

¹⁰ Büpai, “Amphong kü hapa Kahvang ongching shahjo nyinghen shuohtepih; shejao lebüthü kü ngei shahlapi enyeih, shejüang ‘Veijao jomi ne-eehen, hatü danjao jomi ha nenyinghen’ ” shei e.

Jisui Shahlap Nih-ei Epü

¹¹ Shahlap lappeyü ha hih: Sheiliyü Kahvang shah.

¹² Lemei vüpü sheiliyü ha danpüthü; hapheikü kahshih peiyei jomei mongeipü ha shah yah-ei lüdainyüke, hanangkü jom hingnelemhen hatü neyanghen.

¹³ Yaong shangkü vüpüthüyü mechem jomi shah danhen, mongongpai ha yahnyüke. Shejao hathü kü tünglang neyiüpü nangkü jomi kansho hük shing mon hinglemtü dokpü ngoijü vüdainyeih.

¹⁴ Hüh chi kü vüpeyü hathü, jomi shah dannyüke, shejao jomi jomei lem kü kamshingkü jomphongü yangnyu mongshang, mophimo hatü yangnyu mongongmongle kü kenpai luplangtü betjük liyei neshümnyu.

¹⁵ Shejao kahmeichong kü vüpeyü hathü, mechem jomi shah danhen, hingshangpai hatü mongdang meipai ha kü wongshongi shongnyüke, hatü nenteiaokpai betjük jüknyüke.

Awdük Hük Dük Mongei

¹⁶ Üpaiyao awdük jaktü dük mongei nejonyih, nevaijü lüngbangei netuhnyih, shejao mongei shüpü peü kü vangngai shuohhen awdük phaak kü ngenei tuhnyeih.

¹⁷ Mehenangkü shakei nevamhen mü meheyao joei neshiü, nevaijü nenyinghen mü hatü vangngailei nevamhen mü meheyao doujo neshiü.

¹⁸ Hanangkü nüngi mekei bangnya kenhingei deihtuh; mehenangkü üami ang, hathü kü nyeishi shuohhen; hatü üami ne-ang, jomi mehe anghen shei deih, hayao yahlanghen.

Jisulei Hingshangpü Shem am

¹⁹ Hapheikü chenyü hatü chenaüthü büpa touei pei, shejao khong longi nyupü nangkü büpa thah-ei neheih-aok.

²⁰ “Nüng mü ponghüei anyü hatü anaüthü chingshelei yaongshi nyüke” shei büpa kü e.

²¹ Shejao büpai jomphong kü, “Üpai Kahvangei shah bangei ha düknya, hayü ngelei nyü, hatü cheihinaüthü” shei jangei e.

Jisui Yinglükpalei Nenhüpü

²² Nyih hük büpai büpalei nanglomthü mü ai mongei shütü büpai jomphong kü, “Jeni yung homei yungdangei heihshah” shei e. Hanangkü jomphong ai mongei shütü layaong.

²³ Jomphong yung kü daishingkü büpa shidai. Yungei vanglükpalei pei, hatü ai mongei yung madai, hatü jomphong vongshüh kü nyu.

²⁴ Jomphong büpa touei heih-ei büpa kü phuktü, “Shembüpa, Shembüpa, jen mahdainyu khih!” shei len. Büpa paoei vanglük hatü mangpü yungmok kü loh; vanglük doh, hatü peü nendai.

²⁵ “Amphong hinglempü melei nyüpa?” shei büpai nanglomthü kü e. Jomphong nyem, hatü thamaei hüki hük mü, “Büpai vanglük hatü yung kü ngeükhüam shuohjü büpa kü banghen mü büpayü üpaang yo?” shei etei.

Mang Laangi Yeppü Meihüpü

²⁶ Hapheikü jomphong Galil mü khangteishi nyupü Gerasenes kahmük ngoi.

²⁷ Büpa kahdokei shüh-ei heihshingkü mang laangi yeppü ching am shennyak hük pong. Mehenangkü hepak luangi büpai büm-ow neyah, shemei nenyui mahngchongei nyu.

²⁸ Mechem büpai Jisu eepa, büpa Jisu touei doei shatü, “Nüngi ngei kü mehe dükphahenang, Jisu, Chaipüba Kahvang Ha? Nüngi ngei kü teshüveipha shei ngei khümnyeih” shei ngeü mahshi len;

²⁹ mehenangkü Jisui hapa shennyak leipü mang laangha kü vamhen ngeükhüam shuoh. (Mehenangkü hepak ieshi hapai büpa yep; büpa kü nyiamvüi shatü yomei tuh, shejao büpai hapa shapü phenei phaülei kahshih-i müei daihamteke).

³⁰ Hahepak kü Jisui büpa kü, “Nüngei men mekeiang?” shei phe. Büpai, “Legion” shei e; mehenangkü büpa kü mang laangha longi shüei nyuteke.

³¹ Jomphongi büpa kü bangh mongei shühen te-epha shei khümei e.

³² Shaang shangching lemei ook khong longpü hük het hah-ei nyu, hatü mang laanghathüi Jisu kü hathü ookei shühen khümei e. Hanangkü büpai hathü kü mongteke.

³³ Hahepak kü mang laanghathü hapa shennyak leipü vamei ookthülei shü, hatü ookthü yaongvakei yiüei yung kü langdaikem.

³⁴ Mehe vam, ha mechem ook yompüthüi eepa, jom mokei leiyei ching, hatü kahmük peülei baongteke.

³⁵ Mehe vampa shei ha veinüng shennyakthü vam, hatü mechem jom Jisu touei peipa, jomi üpa shennyak leipü mang laanghathü vamdaipa, büpa Jisu touei ashakviha owtü bümei leiyei uoshi ee, hatü jomphong nyem.

³⁶ Ha eepüthüi mekei etü hapa mang laanghai yeppü meidaipa, ha jung shennyakthü kü eteke.

³⁷ Hahepak kü Gerasenes kahmük kü nyupü shennyakthü peü Jisu kü jom toueipü lüdaishih shei e; mehenangkü jom nyempai maei nyu. Hanangkü büpa ai mongei shütü lüdai.

³⁸ Üpa shennyak leipü mang laanghathü lüdai, büpai Jisu mü daihen phe, shejao Jisui büpa kü,

³⁹ “Shemei leituh, hatü Kahvangi meshük thahshi nüng kü dükpa, ha etuh” shei etü büpa leitük. Hanangkü Jisui büpa kü meshük thahshi dükpa, ha chingnyü kempü kü baongei leiteke.

Jairuslei Yiükha Yangpü hatü Nyüha Hük Meihüpü

⁴⁰ Shaang mechem Jisu nyokei leipa, khongnyüi büpa mongongei yah; mehenangkü jomi büpa danei nyu.

⁴¹ Hahepak kü Jairus shei menpü shennyak Sinagog kü mübü hük peiyei Jisulei la tüngei lemtü jomei shemei heihkütuh shei khüm;

⁴² mehenangkü bong anpünyi hükshing lompü büpalei yiükha halom dihen mü nyu. Jisu daishingkü khongnyü büpa philei theetei heih.

⁴³ Shaang hatouei bong anpünyi iy yenei tüngpü nyüha hük nyu, hatü pinnyüi angpü peü meli nobü kü shuoh-ei kemjao üpaiyao pinnyü tüngpü nemeihüaok.

⁴⁴ Pinnyüi büpa phei heih-ei büpalei ashakjung kü hong, hatü ngangahük kü iy yenpü dohdai.

⁴⁵ “Üpai ngei kü hongpa?” shei Jisui phe. Üpaiyao ha kü nejang. Peteri, “Shembüpa, nüng shinei nyupüthüi hongpü vaihen hih” shei e.

⁴⁶ Shejao Jisui, “Hanei ami ngei kü hongtepih; mehenangkü ngei kübü ngan daipü ngei nyingtepih” shei e.

⁴⁷ Mechem hapa nyühai hei-üng joshi nenyuaok-ü shei veiaokpa, pinnyü kheüyaki heih-ei büpa touei aümei shatü nanglakthü peü nyushi pinnyüi mehekei büpa kü hongpa, hatü mekei ngangahük kü pinnyü meidaipa, ha ngaiyei eteke.

⁴⁸ Büpai pinnyü kü, “Lamei, nüng hinglempai nüng meiteke, nyiushemmei kü leituh” shei e.

⁴⁹ Mechem Jisu shah eyei nyupa, Sinagog kü mübü Jairuslei shem leipü hanei am peiyei, “Nüngei yiükha didaiteke” shei e. “Nyuhbü kü hajükü tekainaishuoh” shei e.

⁵⁰ Ha danei Jisui Jairus kü, “Tenyem, hinglemei mon nyutuh, hatü pinnyü meidaihen hih” shei e.

⁵¹ Mechem büpa shemei peipa, büpai Peter, Johan, Jakob hatü naüei chepa hi chenyü mü lenei üpa kao shemei büpa mü shühen nehan.

⁵² Jom peü pinnyü kü mahng thepei nyu, shejao büpai, “Am tethep; pinnyü-ü dipü nevai, shipü khih” shei e.

⁵³ Pinnyü didaiphei shei nyingei jomphongi büpa kü nyishuoh.

⁵⁴ Shejao büpai pinnyülei lak kü düktü, “Hapeü, paotuh!” shei nyük.

⁵⁵ Pinnyülei laangha nyokei lei, hatü ngangahük kü pao. Hapheikü büpai jomphong kü lemhük hahhen pinnyü kü shuohtuh shei e.

⁵⁶ Pinnyülei nyühipa nyi thama, shejao mehe vam, ha üpa kao te-e shei büpai jomphong kü e.