LUK SHAHSHA APPÜ 5 - DAÜLANGPÜ LAIHING (BSI)

Jisui Shongpü Nanglom Nyükpü

¹ Nyih hük mechem Jisu Gennesaret Shemyungei yaongshi nyupa, büpa shinei khongnyü longpü hük Kahvang shah banghen pei.

² Büpai hapa shemyung yungkungei ai nyi leipü nyah yeppü am vamei jomei shang paüei ee.

³ Büpai ai nyi khongkü Simonei ai kü uotü yungphaang leipü maani yanei hungshih shei büpai e. Hahepak kü büpa halei uotü khongnyü kü ai leipü nyuhteke.

⁴ Mechem büpai shah eyei kempa, büpai Simon kü, “Yung chüpülei heihtuh, hatü shang sheptuh” shei e.

⁵ Simoni, “Shembüpa, hamphong vangnyak shang shepei paümpeih shejao meheyao neyepangpih. Shejao nüngi epü nangkü ngei shang shepshahma” shei e.

⁶ Mechem jomi shang sheppa, jomi nyah longi manpü nangkü shang shaakdaihen mü nyu.

⁷ Hanangkü jomi lebü ai leipü küphüthü kü peiyei sheühshih shei e, hatü jomphong peiyei ai nyiphen kü nyah maei shihpü nangkü yungmongei hüngdaihen mü nyuteke.

⁸ Mechem Simon Peteri ha eepa, büpai Jisulei la tüngei aümei shatü, “Ngei toueipü lüdaishih, Shembüpa, ngeiyü mang shennyak!” shei e.

⁹ Mehenangkü büpa hatü büpa mü nyupüthü peü jomphongi yeppü nyah kü thama;

¹⁰ hapa keiha Simon mü nyupü Zebedeelei ha Jakob hi Johan nyiyao nyuteke. Hapheikü Jisui Simon kü, “Nüng tenyem, shaang mü leitü nüng shennyak yeppü am leihühen” shei e.

¹¹ Mechem jomi yungphaangei ai müei leipa, jomi lemphü tuhphongtü büpa phei mü.

Jisui Ngombü Hük Meihüpü

¹² Mechem büpa chingnyü hükei nyupa, shennyak hük ngomma-i büm lüpei daitü pei. Mechem büpai Jisu eepa, büpai kahdokei dhe aümei shatü büpa kü, “Shembüpa, nüngi mongjema ngei meitükshih” shei khümei e.

¹³ Jisui büpalei lak deiyei hapa shennyak kü düktü, “Ngei mongnyüpeih, nüng daüdaituh” shei e, hatü lak mü leihshi hapa ngomma meidai.

¹⁴ Hapheikü Jisui büpa kü, “Üpa kao hapa jung te-e, shejao daiyei nüng nyingi ngongpa kü hueishuoh, hatü denpü hük vaishi nüng daüdaipü shing Mosai epükei moila shuohtuh” shei eteke.

¹⁵ Shejao nyeinya büpa jung shahjang yanei dai, hanangkü büpai epü banghen hatü tüngpü meitükhahhen shingvaishi büpa touei pei.

¹⁶ Shejao chengei Jisui vüngmakpü shingei daiyei phop.

Büm Bhaoei Didaipü Meihüpü

¹⁷ Nyih hük büpa nyuh-ei nyushingkü Galil, Judea hatü Jerusalem leipü peipü Pharisee am hatü shahkung nyuhbüthü büpa yopailei uoshi nyu, hatü tüngpüthü meihühen ngan Shembüpa kü nyu.

¹⁸ Shennyak hanei-i bümphi didaipü shennyak hük lüng kü lemtü paiyei Jisu touei lemhühen shem mongei shühen khe,

¹⁹ shejao khong chi kü shühen lem nedangi jomphongi shem adokei aongtü khong chi kü Jisu touei adok yamtü büpa shanshihteke.

²⁰ Mechem büpai hathüi hinglempü eepa, büpai, “Mongjem, nüng kü nüngei mang tüktepih” shei e.

²¹ Hahepak kü shahkung nyuhbüthü hatü Phariseethüi, “Kahvang eelaei epü hayü üpaang? Kahvang mü lenei üpai mang tükei aokhen?” shei phehen pang.

²² Mechem jomi deihpü Jisui nyingpa, büpai jomphong kü, “Ammei mongei mehekei ammi hapakei deihnya?

²³ ‘Nüngei mang tüktepih’ shei ehen yopü hi, ‘Yaongtuh hatü kamtuh’ shei ehen yopüba ang?

²⁴ Shejao hapai kahdoknyü kü Shennyak Ha kü mang tükhen wong nyüke shei ammi nyinghen” shei e. Büpai bümphi dipü shennyak kü, “Ngei nüng kü enyeih, nüng lüng paitü shemei leidaituh” shei e.

²⁵ Chemjalak kü jom touei büpa paoei yaong, hatü büpa lempü lüng paitü Kahvang men longei shemei lei.

²⁶ Peüi thamaei Kahvang men long. Jomphong nyempai maei, “Hamphongi shinnyih yashanbenüng dou eetepih” shei e.

Jisui Levi kü Nyükpü

²⁷ Hapheikü büpa daishingkü lat thaibü hük Levi shei mentü lat thaishingei uoshi ee, hatü büpai büpa kü, “Ngei phei mükei” shei e.

²⁸ Büpa yaongei lemphü tuhphongtü büpa phei mü.

²⁹ Hapheikü Levi-i büpalei shemei büpa shing mo longpü hük üh; halei lat thaibüthü khongnyü longpü hük mü lebüthü jomphong mü nükdülei uoshi nyu.

³⁰ Pharisee hatü shahkung nyuhbüthüi büpalei nanglomthü kü eelaei, “Mehekei amphongi lat thaibüthü hatü mangthü mü hahyingnya?” shei e.

³¹ Jisui jomphong kü, “Meishi nyupüthü shingvaishi meli nobü napü neshiü, shejao tüngpüthü shingvaishi nadang;

³² Ngeiyü daülangpüthü nevai, mangthü mong lephen nyüknüng peipeih” shei jangei e.

Shüaeiyunglehen Nang Phepü

³³ Hahepak kü jomi büpa kü, “Johanei nanglomthüao Pharisee amei nanglomthü kei chengei shüaeiyungleyei phopnyüke, shejao nüngei nanglomthü hah-ei yingei mon nyunyüke” shei e.

³⁴ Jisui jomphong kü, “Yiükyahpa jom mü nyupü thahshi yiükjing mo leipü yenthü nehah-i nyuhen je, vaila?

³⁵ Jomphong toueipü yiükyahpa yahlanghen nyih ngoikahen, shejüang jomphongao hathü nyih kü shüaeiyunglehen” shei e.

³⁶ Büpai shao jomphong kü shahlap hük e: “Üpaiyao ashak ja kübü shaakei ashak chang kü nethapnyih, hei nevaijema ja shaakei vamkahen, hatü ashak chang kü ja shihpai nekükahen.

³⁷ Üpaiyao phaishuw khoung chang kü yiüja neshihnyih; hei nevaijema phaishuw khoung bhaoei haleipü yiü yendainyeih, hatü phaishuw khoung mangdainyeih.

³⁸ Shejao yiüja yah-ei phaishuw khoung ja kü shihhen vongbong.

³⁹ Üpaiyao yiü chang yingpheikü yiü ja nenanyih, shejao ‘Yiü chang meipü khih’ shei enyeih.”