LUK SHAHSHA APPÜ 4 - DAÜLANGPÜ LAIHING (BSI)

Jisu kü Dokpü

¹ Jisu, Laangha Daülangpai maei Jordan leipü nyokei lei, hatü Laanghai büpa jahpanei müei dai.

² Halei büpa nyih pinyi kahshih-i büpa kü dok. Büpai hathü nyihyang kü meheyao nehah, hatü mechem hathü nyih peihpa, büpa aeiteke.

³ Kahshih-i büpa kü, “Nüng Kahvang Ha vaijema, hapa yaong kü aan leihen eyeishuoh” shei e.

⁴ Jisui, “Ha nyangei nyüke: Shennyaki aani mon yangnyu nenyunyih” shei jangei e.

⁵ Hapheikü kahshih-i büpa müei an, hatü büpa kü kahdoknyü ongchingthü peü hutü,

⁶ kahshih-i büpa kü, “Ngei nüng kü hathülei müknyinshekhang hatü wong peü shuohhen hih; mehenangkü hapayü ngei kü shuohpeih, hatü ngei hayü ngei mong hahpüba kü shuohhen.

⁷ Nüngi ngei kü khümjema, ha peü nüngei vaihen” shei eteke.

⁸ Jisui büpa kü, “Ha nyangei nyüke: Shembüpa, nüngei Kahvang kü mon khümtuh, hatü büpa mon chongphotuh” shei jangei e.

⁹ Hapheikü kahshih-i Jerusalemei müei deiyei phopshem adokei müei antü büpa kü e, “Nüng Kahvang Ha vaijema, haleipü nüng nyingi laongtuh;

¹⁰ mehenangkü ha nyangei nyüke: ‘Büpai nüng nangkü laophülei vangsho phongshan kü nüng yomhen nangkü shahkung shuohhen,

¹¹ hatü nüngei la yaong kü neshouphen shingvaishi jomi nüng jomei lakei yeplanghen’ ” shei e.

¹² Jisui büpa kü, “Lai-i ha enyüke: ‘Nüngi Shembüpa, nüngei Kahvang kü mong tedok’ ” shei jangei e.

¹³ Mechem kahshih-i lemphü dokei tempa, büpai büpa kansho hük shingvaishi tuhphong.

Galilei Jisui Dousho Pangpü

¹⁴ Hapheikü Jisui Laangha Daülangpai maei Galilei nyokei lei, hatü büpa jung shinpü kahmük peü lemei yanei dai.

¹⁵ Büpai jomei Sinagoglei nyuhhen pang, hatü peüi büpa vihteke.

Nazarethlei Jisu Neyahpü

¹⁶ Mechem büpa longpü shing Nazarethlei büpa nyokei leipa, büpalei yemya keiha Sabbath nyih büpa Sinagoglei pei,

¹⁷ hatü Isaiah thibüi nyangpü laidü büpa kü shuoh. Büpai hapa laidü apshingkü hapa nyangpü shing dangteke:

¹⁸ “Shembüpalei Laangha ngei kü nyüpeih, mehenangkü büpai ngei kü taopathü kü shahjangmei kohen thiteiphuei jepeih. Büpai ngei khoklatei nyupüthü kü bümei baonghen, mükphüngpathü kü mük aphen, hatü hanghipüthü bümei leihühen,

¹⁹ Shembüpai bampü bongthü baonghen ngei shompeih.”

²⁰ Hapheikü büpai hapa laidü dütü halei chongphopüthü kü shuohtüktü uo. Sinagoglei nyupüthü peüi büpa kü hüngei veiteke,

²¹ hapheikü büpai jomphong kü ehen chongpangei, “Shinnyih amphongi danshi ha laihing dhaümteke” shei e.

²² Peüi büpa jung meishi e, hatü büpalei ju kübü vampü shahmei kü thama. Jomi, “Hapayü Josephei ha nevaipü je?” shei e.

²³ Jisui jomphong kü, “Hingmei amphongi ha kandok shah ngei kü ehen, ‘Meli nobü, nüng nyingi meituh!’ Hatü amphongi, ‘Nüngi Kapernaumei dükpü jung hami danpükei nüngei chingeiyao hathü dükkütuh’ shei ehen” shei eteke.

²⁴ Büpai jomphong kü nedoh-i e, “Ngei am kü shahhing enyeih. Üpa thibüao laophülei chingei vihshi neyahnyih.

²⁵ Ngei hingmei enyeih, Elijahlei hepak kü Israel kü vaümnyü longi nyu; hahepak kü vangsho küplangtü vang nekei-i vangbong jem mü bhaoei nyu, hatü kahdok peü kü münghishaü nemei-i nyuteke;

²⁶ shejao Sidon kahmük Zarephath leipü vaümnyü touei shompü mü lenei Elijah üpa toueiyao neshom.

²⁷ Elisha thibü hepak kao Israel kü ngombüthü longi nyu, shejao Syria am Naaman mü lenei üpayao nemeihü.”

²⁸ Mechem jomi ha danpa, Sinagoglei nyupüthü peüi mongshih.

²⁹ Jom yaongei ching leipü büpa changtük, hatü jomei ching nyupü shangchingei deiyei yaongvak kü vütüknüng shei müei dai.

³⁰ Shejao büpa jomphong chi yamei lükei lüdai.

Mang Laangha Kohpü Shennyak

³¹ Galil kü chingnyü hük Kapernaumei büpa yiü, hatü Sabbath kü jom kü nyuh-ei nyu.

³² Büpai nyuhpü kü jom thama; mehenangkü büpai wong kohshi nyuhteke.

³³ Sinagoglei shennyak hük mang laanghai yeptü nyu, hatü büpai ngeüwong anei,

³⁴ “Ah, Nazareth am Jisu, nüngi hamphong kü mehe dükhüpa? Nüngi hamphong mahtükhen peiküpü je? Nüng üpashang hami nyingnyeih– Kahvangei Daülangpü Hük!” shei e.

³⁵ Shejao Jisui büpa kü loh-ei, “Nenmü nyutuh, hatü büpa kübü vamdaituh” shei e. Hahepak kü kahshih-i jomphong touei büpa dowei shükphongtü büpa ma neyahhüi vamdai.

³⁶ Shennyakthü peüi thamaei hüki hük mü, “Hapa nyuhpüvenpeyü meheang? Wong hatü ngani büpai mang laangthü kü ngeükhüam shuohjü jom vamei lüdainyüke” shei etei,

³⁷ hatü büpa jung moidoi shinpü kemeilei shahjang yanei dai.

Simonei Shemei Meihüpü

³⁸ Büpai Sinagog tuhtü daiyei Simonei shemei shü. Shaang Simonei chenyühalei chenyü mihbheüi tüngei nyu, hatü jomi pinnyü nang Jisu kü ejateke.

³⁹ Hahepak kü büpai pinnyü touei yaongtü hapa mihbheü kü loh, hatü tüngpü meidai. Pinnyü hahepak kü-üng paoei jomphong kü nemnoei shuoh.

⁴⁰ Vanghe shüdaiyaki dinlem laolaoi tüngpü shennyakthü peü büpa touei müei dei, hatü büpai jom ieyei kü laki shüngei jom peü meihütük.

⁴¹ Anyei vaishi shennyak longi kübü mang laanghathüi, “Nüngü Kahvang Ha” shei lenyaki vamei dai. Shejao büpai hathü kü loh, hatü shah ehen nehan; mehenangkü jomphongi büpayü Khrista shei nyingei nyu.

Jisui Sinagoglei Chongvenpü

⁴² Mechem vangngaipa, büpai vüngmakpü shing hükei dai. Nanglakthüi büpa yemei nyu, hatü mechem jomi büpa nyupü shingei peipa, jomi büpa yanei nedeishihhen khe.

⁴³ Shejao büpai jomphong kü, “Ngei lebü chingnyüthü kao hapa Kahvang ongching shahjangmei baonghen vongbong; mehenangkü ngeiyü hapa mükhong kü shompeih” shei e.

⁴⁴ Hanangkü büpai Judea kübü Sinagogthülei nedoh-i shahjangmei baongteke.