LUK SHAHSHA APPÜ 24 - DAÜLANGPÜ LAIHING (BSI)

Jisu Yangei Leipü

¹ Shejao hapta kü shongpü nyih dhom mü lomi jomi tempü vong büpü meli notü mahngchongei heih.

² Jomi mahngchong kü küppü yaong ngowdaitü ee,

³ shejao mechem jomphong mongei shüpa jomi mahng ne-ee.

⁴ Mechem jomi ha kü thamaei nyupa, ngangahük kü shennyak nyi nyangnyangpü ashak ümtü jomphong touei peiyei yaong.

⁵ Jomi nyemei kahdokei dhe aümei sha, shejao ha shennyak nyi-i jomphong kü e, “Mehekei ammi dipüthü khong mü yemmü nyupü hük yemnya? Büpa hatouei nenyu, shejao yangei leidaitih.

⁶ Büpa Galilei nyushi am kü epü deihhümao:

⁷ Shennyak Ha mangthülei lak kü lanei shuohhen, hatü shophang kü aphen, hatü nyih jempabü kü yangei leihen.”

⁸ Hahepak küang jomphongi büpalei shah deih-ei dang,

⁹ hatü mahngchong leipü nyokei leiyei jomi ha jung peü anpühük hatü lebüthü peü kü eteke.

¹⁰ Shaang hapayü Mary Magdalen, Joanna, Jakobei chenyü Mary, hatü jomphong mü nyupü nyühathüi phongshanthü kü ha jung eteke.

¹¹ Shejao hapa shah-ü jomphong keyü ngahiyoi shah kei leidai, hatü jomi ha kü hingnelem.

¹² Shejao Peter yaongei mahngchongei mokei heih; büpai aümei shatü veiyei shüshihjü büpai nyemin ashak mon ee; hapheikü büpai hapa vampü kü thamaei shemei lei.

Emmaus Lemei Kampü

¹³ Shaang hapa nyih-üng shennyak nyi Jerusalem kübü mile nyet hükshing yanei Emmaus shei epü chingei leilemei kamei nyu,

¹⁴ hatü mehe douthü vampa ha jung hüki hük mü eteiyei nyu.

¹⁵ Mechem jiji shah eteiyei hatü shah shükteiyei nyupa, Jisu jiji yopailei peiyei jiji mü kamei nyu,

¹⁶ shejao büpa khih shei nenyinghen mü jijilei mük küptüktü nyu.

¹⁷ Büpai jiji kü, “Anji kamyaki hüki hük mü mehe jung eteinya?” shei e. Jijinyi mongmang dhe kohtü sheanei yaong.

¹⁸ Jiji khongkü Kleopas shei menpü shennyaki büpa kü, “Hathü nyih kü mehe douthü vampa, ha nenyinghen mü nüngü Jerusalemei yenthüng vaishi nyupü je?” shei e.

¹⁹ “Mehe douthü?” shei büpai jiji kü phe. Jijinyi-i, “Nazareth am Jisu nang” shei e. “Büpayü thibü hük, shah kü hatü dou kü Kahvang hatü nanglak peü touei wong kohshi nyuhampeih,

²⁰ hatü hamei ngongpathü hatü mübüthüi büpa jühen nangkü nyonghühen lanei shuoh, hatü büpa shophang kü apei jütükpeih.

²¹ Shejao Israel am angei leihenü büpa shei monglempeih. Hih, ha mü lenei hathü douthü vampheikü shaangpai nyih jempabü khih.

²² Anyei vaishi hamphong khong kübü nyühathü hanei ami ham thamahüpeih. Jomphong shenep dhom mü mahngchongei heihteke,

²³ shejao jomi büpalei mahng ne-ee, shejao jomphong nyokei leiyei hamphong kü vangsho phongshan eepeih, hatü hathüi büpa yangei leidaitih shei eshuohpü jung eküpeih.

²⁴ Hanangkü hamphong khong kübü hanei am mahngchongei heihjajü nyühathüi epükei chongjateke, shejao jomphongi büpa ne-ee.”

²⁵ Büpai jiji kü, “Oh ngadaiphei nyi, thibüthüi epü shahthü kü hinglemhen mong chetpüthü!

²⁶ Messiah-i hathü shangpong heühen hatü büpalei müknyinshekhang kü shühen nadang nenyuhampü hiang?” shei e.

²⁷ Hapheikü Mosa kübü pangei thibüthüi nyangpü laithü kübü büpa jung epü peü nih-eikhoei eteke.

²⁸ Jiji daipü ching yoei ngoiyaki Jisu-ü tailulei daihen keiha she yeiyei kam.

²⁹ Shejao jiji-i büpa kü kangei, “Henji mü paümdaishah, mehenangkü om dhüdaiteke hatü hepak lüdaiteke” shei e. Hanangkü büpa jiji mü paümnüng dai.

³⁰ Mechem büpa jiji mü nükdülei uopa, büpai aan yah-ei moihiman, hatü ha bhaoktü jiji kü shuoh.

³¹ Hahepak kü jijilei mük ap, hatü jiji-i büpa nying, hatü büpa jiji toueipü mahdai.

³² Jiji hüki hük mü, “Büpai ji kü lemei shah eshingkü hatü büpai laihing aptü nih-ei ephüshingkü mong kü aw bahnyukei shaamküla?” shei etei.

³³ Hahepak kü-üng jiji layaongei Jerusalemei nyokei dai, hatü jiji-i anpühük hatü küphüthü chemi thaiyei heüteke.

³⁴ Jomphongi, “Shembüpa yangei leidaiteke, hatü büpa Simon kü vamei hushuohpüja” shei eteiyei nyu.

³⁵ Hahepak kü jijinyiyao lemei mehe heüpa, hatü aan bhaokei hahshingkü jiji kü büpa nyinghüpü ejateke.

Jisui Nanglomthü Touei Vampü

³⁶ Mechem jomi ha jung eteiyei nyupa, Jisu büpa nyingi jom touei peiyei yaong, hatü jomphong kü, “Amphong mü chingmei nyutuh” shei e.

³⁷ Jomphongi nyemei top, hatü jomi laangha eenyu vaaishang shei deih.

³⁸ Shejao büpai jomphong kü, “Amphong mehekei nyemnya hatü mehekei ammei mong kü jü-üpü peihünya?

³⁹ Ngelei lak hatü la kü veituh; veituh, hayü ngei hih. Ngei kü laki dükei veituh; mehenangkü ngei kü nyupü ammi eepükei laangha kü phai hatü vang nenyunyih” shei e.

⁴⁰ Büpai ha etü büpai jomphong kü büpalei lak hatü la hushuoh.

⁴¹ Jomphong mongongpü hatü yashanpai hingnelemaoki nyu, hanangkü büpai jomphong kü, “Hatouei hahhen meheyao nyüla?” shei e.

⁴² Jomi büpa kü nyahlang phuo hük shuoh,

⁴³ hatü büpai ha yah-ei jomphong touei hah.

⁴⁴ Hapheikü büpai jomphong kü, “Hathüyü ngei amphong mü nyushi am kü epü shahthü hih– Mosa shahkung, thihivam laithü hatü menvih kesho kü ngei nang nyangei nyupü peü dhaümkahen” shei eteke.

⁴⁵ Hapheikü laihing nyingaokhen büpai jomei mong aphü,

⁴⁶ hatü büpai jomphong kü, “Hapakei nyangei nyüke, Messiah shangponghen hatü nyih jempabü kü yangei leihen,

⁴⁷ hatü Jerusalem kübü pangei jatthü peü kü mong leppü hatü mang tükpü jung baonghen.

⁴⁸ Amphongü hathü jung denbüthü.

⁴⁹ Veituh, ngelei Pa-i mehe lah, ha ngei am kü shomhen; hanangkü amphong shangeipü ngani am kü mangbak thahshi chingnyülei nyutuh” shei e.

Jisu Vangsholei Aongdaipü

⁵⁰ Hapheikü büpai jomphong müei Bethany thahshi dai, hatü büpalei lak haongei jomphong kü moihiman.

⁵¹ Büpai jom kü moihimanei nyushingkü büpa jomphong toueipü yanei vangsholei anlang.

⁵² Jomi büpa kü khüm, hatü longi mongongpai Jerusalemei nyokei lei;

⁵³ hatü jomphong nedoh-i phopshemei Kahvang men longei nyu.