LUK SHAHSHA APPÜ 23 - DAÜLANGPÜ LAIHING (BSI)

Jisu Pilat Touei Yaongpü

¹ Hapheikü khong kemei yaongei Jisu Pilat touei müei dei.

² Jomi büpa kü thaüvaüei, “Hapa shennyaki hamei jat nyongnyongi leitükteke. Büpai ongpa kü lat teshuoh, büpapa Messiah, ongpa hih shei ehahteke” shei e.

³ Hanangkü Pilati büpa kü, “Nüngü Jehoda amei ongpa je?” shei phe. Büpai, “Nüngiang hapakei enyüke” shei jangei e.

⁴ Hahepak kü Pilati ngongpathü hatü khongnyü kü, “Hapa shennyak khüei thaüvaühen mü ngei mehe pungpeyao neyep-ang” shei e.

⁵ Shejao jomi anyei ngangei, “Büpai nyuhpüvenpü homei Judea kempülei mophicheü vamhüteke. Büpai ha Galilei pangpü hatou thahteke” shei e.

Jisu Herod Touei Yaongpü

⁶ Mechem Pilati ha danpa, büpai hapa shennyakü Galil am vaila shei phe.

⁷ Mechem büpai hapa shennyakü Herod phang kü nyupü moidoi kü nyüpeih shei danpa, büpai Herod touei büpa shom; büpa hahepak kü Jerusalemei nyuteke.

⁸ Mechem Herodi Jisu eepa, büpa longi mongong; mehenangkü hepak luangi büpai büpa mü ponghüei nyu; mehenangkü büpai büpa jung danei nyu, hatü büpai yashanpü dou dükpü kü veihen omdanei nyu.

⁹ Büpai büpa kü hepak yah-ei shah phe, shejao Jisui büpa kü shahnyok neshuoh.

¹⁰ Ngongpathü hatü shahkung nyuhbüthü shonei yaongtü büpa kü eelaei eyei nyu.

¹¹ Herodi dangkao büpalei veshanthü mü büpa nyonghü, hatü yaüeilungei e; hapheikü büpai büpa kü bhagthuh meipü hük thuhhütü Pilat touei nyokei shom.

¹² Ha nyih-ang Herod hi Pilat nyi hüki hük mü küphümei lei; sheleiyü jiji ve vaishi nyu.

Jisu Jühen Lanei Shuohpü

¹³ Hahepak kü Pilati ngongpathü, mübüthü hatü nanglakthü chemi nyükei thaihü,

¹⁴ hatü jomphong kü, “Nanglakthü lemnyong kü münyüke shei amphongi hapa shennyak ngei touei deiküteke; hatü amphongi eeshi ngei hapa shennyak dokei veiteke, hatü ammi büpa khüei epü kü hapa shennyaki pungpü meheyao neyep-ang.

¹⁵ Herodiyao büpa pungpü neyep; hanangkü büpai büpa jen touei nyokei shompü khih; ammiyao eenyüke, büpa dihen shangei pungpü meheyao neshiü.

¹⁶ Hanangkü ngei büpa kü bheitü vetükshah” shei e.

¹⁷ Shaang büpai mo kü jom touei hanei am veyei deishihhen vanglem nyuteke.

¹⁸ Hahepak kü jom peüi chemi lenei, “Ha shennyak jütuh! Ham kü Barabbas veshih!” shei e.

¹⁹ (Hapa shennyakü chingnyülei mophicheü vamhüpü hatü shennyak jüpü nangkü khoklatei küpshi nyuteke).

²⁰ Pilati Jisu vetükhüpü nangkü shao büpai jomphong kü khümei e.

²¹ Shejao jomphongi nedoh-i, “Shophang kü aptuh, büpa shophang kü aptuh!” shei len.

²² Pilati jempabü jomphong kü, “Mehekei, büpai mehe nejiüpü dükpa? Büpa dihen mü ngei meheyao büpa pungpü nedangang; ngei büpa kü bheitü vetükshah” shei e.

²³ Shejao jomi üng mahshi lenei shülangi büpa shophang kü aphütuh shei len, hatü jomei ngeüi aokteke.

²⁴ Hanangkü jomi yüpü kü Pilati mongpü shuoh.

²⁵ Chingnyülei mophicheü vamhüpü hatü shennyak jüpü shennyak khoklat leipü jomi yüpükei veyei deishih, hatü jomi napükei büpai Jisu jomphong kü lanei shuoh.

Jisu Shophang kü Appü

²⁶ Jomi büpa müei daishingkü jomi Cyrene am Simon yepteke. Büpayü jomei kahdok leipü chingnyülei peijaei nyu. Jomi büpa kü Jisu pheikü shophang paihü.

²⁷ Büpa phei nanglak longi müei dai, hatü hathü khongkü nyühathü jaaba kü daüpei thepei mü.

²⁸ Shejao Jisui jomphong lemei yaakei veitü e, “Jerusalem nelathü, ngei nangkü am tethep, shejao am shing hatü ammei hapeüthü shing theptuh.

²⁹ ‘Nyülanthü, hatü hapeü nekopü naü uoshing, hatü mechemao naü kü amma neyingpüthü moihiman’ shei jomi ehen nyih hingmei ngoikünyüke.

³⁰ Hahepak kü jomi kahshangthü kü, ‘Ham shangkü laamei chetshih’ hatü shangtaothü kü, ‘Ham küplangtuh’ shei ehen.

³¹ Mehenangkü jomi püthüng kü ha dükjema, püdi kü mehe dükhen?”

³² Nemeipü dükpü lebü shennyak nyiyao Jisu mü jühen müei dai.

³³ Mechem jomi, “Shangvang” shei epü shing ngoipa, jomi ten dükpü pa nyi Jisu mü lakdah lemei hük hatü laknyong lemei hük shophang kü ap.

³⁴ Hahepak kü Jisui, “Opa, jom kü mang tükeishuoh; mehenangkü jomi mehe düknya, jomi nenying” shei e. Jomi büpalei ashakviha hanteihen phongyom.

³⁵ Nanglakthü veiyei yaongshi nyu, shejao mübüthüi büpa kü yaüeilungei, “Büpai mih yangteke; büpayü Kahvangei Messiah, jelangpü hük vaijema büpa nyingi nyemyang” shei e.

³⁶ Büpa kü eelapü veshanthü peiyei büpa kü yiüthi shuoh,

³⁷ hatü, “Nüngü Jehoda amei Ong vaijema, nüng nyingi yangtuh” shei e.

³⁸ Büpa dok kü hapa shah nyangtü khaümteke: “Hapayü Jehoda amei Ongpa.”

³⁹ Büpa mü shophang kü appü ten dükpü shennyak hüki büpa kü thaüvaüei, “Nüngü Messiah nevaipü je? Nüng yangtü henjiyao yangshih!” shei e.

⁴⁰ Shejao lebü hükpai büpa kü loh-ei, “Nüngi Kahvang kü nenyemnyu je? Nüngao aihük mü dihen nyüke.

⁴¹ Jiyü jiüpü kü ponghahnyeih, mehenangkü jilei doui shangpü dangpeih. Shejao hapa shennyaki meheyao nejiüpü nedük” shei eteke.

⁴² Hapheikü büpai, “Jisu, nüngei ongchingei peishingkü ngei deih-ei dangtuh” shei e.

⁴³ Jisui büpa kü, “Ngei nüng kü shahhing enyeih, shinnyih nüng ngei mü paradiselei nyuhen” shei e.

Jisu Dipü

⁴⁴ Shaang hapayü anpünyi baji kübü jem baji thahshi kahdoknyü kempülei vangnyak pei;

⁴⁵ mehenangkü vanghe nenya-i manghdai, hatü Jerusalemei haenpü ashak nyi anei shaakdai.

⁴⁶ Hahepak kü Jisui ngeüwong anei, “Opa, nüngei lak kü ngei ngelei laangha lanei shuohnyeih” shei e. Ha etü büpa ngüshom heeyei mongdang shemm.

⁴⁷ Mechem veshan kho hük shak kü mübüi mehe vam, ha eepa, büpai Kahvang kü menvih shuoh, hatü “Hingmei, hapa shennyakü daülangpü vaipü khih” shei e.

⁴⁸ Mechem hapa kü veinüng thaipü shennyakthüi mehe vam, ha eepa, jomi jaaba kü daüpyaki shemei leiteke.

⁴⁹ Shejao büpalei küphüthü, hatü Galil leipü büpa phei müei peipü nyühathü peü tailei yaongshi ha douthü kü veishi nyu.

Jisulei Mahng Vüpü

⁵⁰ Shaang meipü hatü daülangpü shennyak hük Joseph shei menpü nyu. Büpa shahtap kü nanglak hük vaijao,

⁵¹ büpai jomei küpjan hatü dou kü nemong. Büpa Jehoda kahdok kü Arimathea jila leipü pei, hatü Kahvang ongching omdanei nyuteke.

⁵² Hapa shennyak Pilat touei peiyei Jisulei mahng yüteke.

⁵³ Büpai mahng yah-ei ha kü nyemin ashaki jümtü üpayao chemao mahng mangvüpü yaongsha vaüpei lingpü mahngchongei vüteke.

⁵⁴ Hapayü Tempülempü nyih, hatü Sabbath panghen ngoidaitü nyu.

⁵⁵ Büpa mü peipü Galil leipü nyühathüi müei daiyei mekei büpalei mahng vüpa, ha mahngchong jomi eeteke.

⁵⁶ Hapheikü jomphong nyokei leiyei nyiohen meli hatü vong büpü meli tem. Shejao shahkung kü nyupükei jomi Sabbath themteke.