LUK SHAHSHA APPÜ 22 - DAÜLANGPÜ LAIHING (BSI)

Jisu Jühen Showpü

¹ Shaang Daw Neshihpü Aan Mo mepa kü Hompü Mo shei nyük, ha yopailei nyu.

² Ngongpathü hatü shahkung nyuhbüthüi Jisu jühen lem yemei nyu; mehenangkü jomi nanglak kü nyemei nyu.

³ Hahepak kü Judas, üpa kü Iskariot shei nyük, büpa anpünyi khongkü hük, büpa kü kahshih shüteke.

⁴ Büpa daiyei ngongpathü hatü phopshem leipü veshan lakchongpathü mü mekei etü büpai jomphong kü büpa luhahhen shah shetteke.

⁵ Jomphong longi mongongei büpa kü lop shuohhen etei.

⁶ Hanangkü büpai ha kü mongei khongnyü neshiüpü hepak kü jom kü büpa yepei yuhen hepak meipü veiyei pangteke.

Hompü Mo Tempülempü

⁷ Hahepak kü Hompü mi jakpü moila shuohhen Daw Neshihpü Aan Mo ngoiteke.

⁸ Hanangkü Jisui Peter hi Johan nyi kü, “Daituh, jen shingvaishi Hompü Mo hahhen temtuh” shei etü shom.

⁹ Jiji-i büpa kü, “Henji-i hayü melei nyemtemkei shei deihpa?” shei phe.

¹⁰ Büpai jiji kü, “Bangtuh, mechem anji chingnyülei peihenshang, shennyak hük yungdük chantü anji-i heühen; büpa shüpü shemei müei shütuh,

¹¹ hatü shem shembü kü, ‘Ngei ngelei nanglomthü mü Hompü Mo hahhen yen ngoiteipü dung melei nyüpa? shei nyuhbüi phenyüke?’ shei etuh” shei eteke.

¹² “Büpai anji kü jaandokei dung hük meishi temtüktü huphahen. Jen shing halei mo temtuh” shei e.

¹³ Hanangkü jiji daishingkü büpai jiji kü epükei lemphü dangteke hatü halei Hompü Mo tem.

Shembüpa Mo

¹⁴ Mechem hepak ngoipa, Jisui büpalei nanglomthü mü nükdülei uo.

¹⁵ Büpai jomphong kü, “Ngei shangponghen shekü amphong mü hapa Hompü Mo hahhen naei nyupeih.

¹⁶ Mehenangkü ngei am kü enyeih, Kahvang ongching kü ha mangdhaüm thahshi ngei neyei ha nehahhen” shei e.

¹⁷ Büpai yungshong yah, hatü menvih shuohpheikü büpai e, “Ha yahtuh, hatü amphongi hanteituh;

¹⁸ mehenangkü ngei am kü enyeih, shaang mü leitü Kahvang ongching mangpei thahshi ngei nyalingngupai yiü neyinghen.”

¹⁹ Hapheikü büpai aan hük yah, hatü büpai menvih shuohpheikü büpai ha bhaok, hatü jomphong kü ha shuoh-ei e, “Hapayü am shingvaishi shuohpü ngelei büm. Ngei deih-ei dangei hahtuh.”

²⁰ Hapa hahpheikü aihük mü büpai yungshong yah-ei e, “Hapa yungshongü amphong shingvaishi yenpü ngelei iy kü vangteishuwteipü ja hük.

²¹ Shejao veituh, üpai ngei luhahhen, büpa ngei mü nükdülei hahnyüke.

²² Mehenangkü Shennyak Hayü temei nyupükei daihen, shejao üpai büpa luhahhen büpa onyükei!”

²³ Hapa dükhenü jomphong khongkü üpaang shei jomphongi pheteiyei pang.

Longpü Vaihen Dokteipü

²⁴ Jomphong khongkü üpapa peü mü longpü vaihen shei jom jom shah dakteiyei nyu.

²⁵ Shejao büpai jomphong kü, “Kung amei ongthüi nanglak shak kü shembü vainyeih, hatü jom shak kü vanglem lempüthü kü, ‘Sheühbü’ shei nyüknyeih.

²⁶ Shejao amphong keyü hapakei nevai; amphong khongkü peü mü longpübayü peü mü naü-eepa leihen, hatü mübüyü chongphobü kei leihen vongbong.

²⁷ Nükdülei uopü shennyak hi nevaijü nemnopü shennyak üpapa longpüang? Nükdülei uopüba nevaipü je? Shejao ngeiyü amphong mü nemnobü hük kei nyüpeih” shei e.

²⁸ Ngei shanghahpü yangkü ngei mü nyupeyü amphong;

²⁹ Opa-i ngei kü ongching hük shuohpü keiha ngeiyao amphong kü ha shuohnyeih;

³⁰ shejüang ammi ngelei ongching kü ngelei nükdülei hahhen yinghen aokhen, hatü ammi Israel jat anpünyi kü shahphenei uohen.

Peteri Jisu Nelahhen Jung Tetnyüke

³¹ “Simon, Simon, bangtuh! Kahling ami hahbhang shaaptükpükei amphong kü dokhen Kahshih-i mongpü yahlangtih,

³² shejao nüng vaipü kübü nevüdaihen shingvaishi ngei phoptepih, hatü mechem nüng ngei touei lepei leihenshang nüngi jeihinaüthü wong kohhütuh.”

³³ Büpai büpa kü, “Shembüpa, ngei nüng mü khoklat hatü dipü thahshi daihen temei nyüpeih” shei e.

³⁴ Jisui büpa kü, “Ngei nüng kü enyeih, nüngi ngei nenying shei jempa manglah thahshi sheya ou nekapih” shei e.

Loptuw, Khoung hatü Yanlu

³⁵ Hahepak kü Jisui nanglomthü kü, “Mechem ngei amphong loptuw, khoung hatü yanlu neshiüi shompa, amphong mepaiyao taoei nyula?” shei phe. Jomphongi “Meheyao taoei nenyu” shei e.

³⁶ Büpai jomphong kü e, “Shejao shaangü üpai loptuw ang, büpai ha yahtuh hatü khoungao kotuh, hatü üpai yanlu ne-ang büpai laophülei ashak yutao hük shaktuh.

³⁷ Mehenangkü ngei am kü enyeih, ‘Büpayü shahkung mangpüthü mü chemi ieteke’ shei laihingi epü hayü ngei kü dhaümhen, hatü ngei jung mehe nyangei nyu, ha dhaümteke.”

³⁸ Jomphongi, “Shembüpa, hatouei yanlu nyi nyüke” shei e. Büpai, “Hapai changteke” shei e.

Jisui Olive Kahshangei Phoppü

³⁹ Büpalei vanglem keiha büpai ching tuhtü daiyei Olive Kahshangei aong, hatü büpalei nanglomthü büpa phei mü.

⁴⁰ Mechem büpai shing ngoipa, büpai jomphong kü, “Dohpü hepak kü nevühen shingvaishi amphongi phoptuh” shei e.

⁴¹ Yaong shükjü daipüshük büpa jomphong toueipü yanei daiyei aümei shatü phopei,

⁴² “Opa, nüngi mongjema hapa yungshong ngei kübü chailangshih; shejao ngei mongpü nevai, nüngi mongpü düktuh” shei e.

⁴³ Hahepak kü vangsho leipü vangsho phongshan hük büpa touei vamei büpa kü wong shouh.

⁴⁴ Büpa mongshangpai nyeinya lanei shuoh-ei phop, hatü büpalei lem-ow kahdokei iy shühpükei leiteke.

⁴⁵ Mechem büpa phoppü kübü yaongei nanglomthü touei leijapa, mongshangpai jom peü shidaitü nyu,

⁴⁶ hatü büpai jomphong kü, “Amphong mehekei shinya? Paotuh, hatü amphong dokpü hepak kü nevühen shingvaishi phoptuh” shei e.

Jisu Yeppü

⁴⁷ Mechem büpa shah eyei nyupa, khongnyü longpü hük pei, hatü anpünyi khong kü hük, Judas shei menpü shennyaki jomphong müei pei. Büpai Jisu touei heih-ei büpa kü ju kü jüp,

⁴⁸ shejao Jisui büpa kü, “Judas, ju kü jüptü nüngi Shennyak Ha yuhahnyu je?” shei e.

⁴⁹ Mechem büpa phei müpüthüi mehe vamhen ha eepa, jomi büpa kü, “Shembüpa, hami yani bapshahnyu?” shei phe.

⁵⁰ Hahepak kü jomphong khongkü hüki ngongchongei aalei lakdahphi dhaong yani lüktük.

⁵¹ Shejao Jisui, “Hajük kü tah!” shei e, hatü büpai büpalei dhaong kü düktü meihü.

⁵² Hahepak kü Jisui ngongpathü, phopshem leipü veshan lakchongbüthü hatü büpa touei peipü behethü kü, “Ngeiyü gühpa hük keiha amphongü yanlu hatü miyaung notü peikünyu je?

⁵³ Mechem ngei nyihjeih am mü phopshemei nyupa, ammi ngei kü lak neshih. Shejao hayü ammi dou dükhen hepak hatü shangmangei wong” shei eteke.

Peteri Jisu Nelahpü

⁵⁴ Hapheikü jomphongi büpa yepei ngongchongei shemei müei dei. Shejao Peter payü khaatshi müei dai.

⁵⁵ Mechem jomi chingkon jiamei aw jaktü chemi uopa, Peter-ao jomphong mü nyu.

⁵⁶ Hahepak kü chongphopü nela hüki awha kü büpa uoshi eeyei pinnyüi büpa kü hüngei veitü, “Hapa shennyakao Jisu mü nyuhampeih” shei e.

⁵⁷ Shejao Peteri, “Nyüha, ngei büpa nenyingnyih” shei nelahaoki e.

⁵⁸ Kansho hük angpheikü hanei ami Peter nyingei, “Nüngao jomphong khong kü hük hih” shei e. Shejao Peteri, “Shennyak, ngeiyü nevaipih” shei e.

⁵⁹ Hapheikü ghonda hükshing angpheikü shao-üng lebü hüki nedoh-i, “Hingmei, hapa shennyakao jomphong khong kü hük hih; mehenangkü büpayü Galil am khih” shei e.

⁶⁰ Shejao Peteri, “Shennyak, nüngi mehe jung enya, ngei ha jung nenying!” shei e. Hahepak kü büpai ha shah eyei nyushingkü ou gateke.

⁶¹ Shembüpai yaakei Peter kü hüngei vei. Hahepak kü Shembüpai büpa kü, “Ou gashekü nüngi jempa thahshi ngei nelah-aokpih” shei eshuohpü shah deih-ei dang.

⁶² Peter vamei daiyei shahyaki thep.

Jisu kü Eelapü hatü Üppü

⁶³ Shaang üamphong Jisu yomei nyu, hathüi büpa kü eela hatü üpteke;

⁶⁴ Jomi büpalei mük shümtüktü, “Nüng kü üppü üpashang nyingtuh” shei eteke.

⁶⁵ Jomi büpa kü lebü yaüshah longi e.

Jisu Shahtapei Yaongpü

⁶⁶ Mechem vangngaipa, behethü, ngongpathü hatü shahkung nyuhbüthü chemi thai, hatü jomi büpa shahtapei müei dei.

⁶⁷ Jomi büpa kü, “Nüngü Messiah vaijema ham kü eshih” shei e. Büpai, “Ngei ephüjao ammi ha kü hingnelemhen;

⁶⁸ hatü ngei am kü phejao ammi ngei kü shahnyok neleihen.

⁶⁹ Shejao shaang mü leitü Shennyak Ha Kahvangei ngan kü lakdah philei uohen” shei e.

⁷⁰ Jom peüi büpa kü, “Shejema, nüngü Kahvang Ha je?” shei phe. Büpai jomphong kü, “Ngeiyü ha khih shei ammi enyüke” shei e.

⁷¹ Hahepak kü jomi, “Ha mü lenei mehe denpü nahen? Büpalei ju kübü epü jeni danteke” shei eteke.