LUK SHAHSHA APPÜ 20 - DAÜLANGPÜ LAIHING (BSI)

Jisulei Wong kü Chengpü

¹ Nyih hük büpa phopshemei nanglakthü kü nyuh-ei shahjang meipü chongvenei nyushingkü ngongpathü hatü shahkung nyuhbüthü, hatü behethü peiyei,

² büpa kü, “Nüngi mepa wong homei hathü dou düknya? Nüng kü ha wong shuohpeyü üpaang ha ham kü eshih?” shei e.

³ Jisui jomphong kü, “Ngeiyao amphong kü shah hük pheshah, hatü amphongiyao ngei kü ha eshih:

⁴ Johani baptükpeyü vangsho leipü peipü hi hangku leipü vampa?” shei phe.

⁵ Jom jom shah shükteiyei, “Jeni mehe ehenang? Jeni ‘Vangsho leipü’ shei eshuohjü büpai jen kü, ‘Shejema mehekei ammi büpa kü hingnelemnya?’ shei ephahen.

⁶ Shejao jeni, ‘Hangku leipü’ shei ejü hatouei nyupü khongi jen kü yaongi shükphahen; mehehangkü jom peüi Johanü thibü shei nyingei nyüke” shei etei.

⁷ Hanangkü jomphongi ha meleipü peipa nenying shei jangei e.

⁸ Hahepak kü Jisui jomphong kü, “Ngeiyao mepa wongi hathü dou düknya ne-ephapih” shei e.

Kah Phuoei Lingpü Shahlap

⁹ Büpai nanglakthü kü hapa shahlap ehen chongpang: Shennyak hüki nyalingngupai kah lingtü hapa kah kah phuoei lingpü am kü shuohphong, hatü hepak luangi nyuhen shingvaishi lebü kahmükei dai.

¹⁰ Mechem dühü ngoipa, büpai kah phuopüthü touei kah kübü vampü jomei phaihan yahhen shingvaishi chongphobü shom, shejao kah phuoei lingpüthüi büpa kü üptü lakkong leishih.

¹¹ Büpai shao lebü chongphobü hük shom, shejao jomi büpa kao üptü veüshi ling hatü lakkong leishih.

¹² Shao-üng büpai jempabü shom; jomi büpa kü ma shahü hatü shüei shüktük.

¹³ Hahepak kü kah shembüi, “Ngei mehe dükhenang? Ngei bampü ngelei hapeü shomshah; jomi büpa kü dhüm shuoh-aipih” shei e.

¹⁴ Shejao mechem kah phuopüthüi büpa eepa, jomi ha jung etei. Jomi, “Mükjüp yahhenü büpa hih. Jeni büpa jütükshah, hatü hapa mükjüpü jenei vaidaihen” shei eteiteke.

¹⁵ Hanangkü jomi kah haolei büpa shüei shüktü jütük. “Shejema kah shembüi jomphong kü mehe linghenang?

¹⁶ Büpa peiyei kah phuopüthü jütüktü hapa kah lebüthü kü shuohtükhen.” Mechem jomi ha danpa, “Hapakeiyü nevaiküpih!” shei e.

¹⁷ Shejao büpai jomphong kü veitü, “Lai kü nyangei nyupü hapayü mehe lappüang?” “Shem vepüthüi yaktükpü yaong shemshouk kü shongnyü yaong leipeih.”

¹⁸ “Üpai hapa yaong shangkü vühen, khih mü nihdaihen, hatü üpa kü hapa yaong vühenshang ngümtükhen” shei e.

¹⁹ Mechem shahkung nyuhbüthü hatü ngongpathüi hapa shahlapü jomphong kü epü khih shei nyingpa, jomi büpa kü hapa hepak kü-üng lak shihhen yem, shejao jomi nanglakthü kü nyem.

Lat Shuohhen Nangkü Phepü

²⁰ Hanangkü jomi büpa kü mükhingshi vei, hatü hingshangpüthü keiha yawhdou shuohtü büpai epü shah kü mang yephen hatü jomi büpa governorlei wong kü lanei shuohhen gühshukpüthü shom.

²¹ Hanangkü jomi büpa kü, “Nyuhbü, nüngi epü hatü nyuhpü jiüangke shei hami nyingnyüke, hatü nüngi üpa kao baong hanei nenonyu, shejao shahhing kü Kahvangei lem nyuhnyüke.

²² Hami ongpa kü lat shuohhenü shahkungi mongpü hi nemongpa?” shei phe.

²³ Shejao Jisui jomei kon nyingei büpai jomphong kü,

²⁴ “Ngei kü poisa hük hushih. Hapa kü üpalei shangjing hatü men nyüke?” shei e. Jomphongi, “Ongpalei” shei e.

²⁵ “Shejema ongpa kü shuohhen jiüpü ongpa kü, hatü Kahvang kü shuohhen jiüpü Kahvang kü shuohtuh” shei e.

²⁶ Büpai epü shah kü nanglakthü touei jomi meheyao neyep-aok; büpalei shah kü jom thama hatü jek neshei.

Dipü Kübü Yangei Leipü Nang Phepü

²⁷ Hahepak kü yangei neleinyih shei epü Sadduke am hanei büpa touei peiyei,

²⁸ büpa kü, “Shennyak hük nyüha tuhtü hapeü netuhphongi didaijü büpalei cheihinaü hanei hapa nyüha mü shem yemhen, hatü didaipü shennyak shing hapeü nyuhühen shei Mosai ham kü nyangteke.

²⁹ Shaang cheihinaüthü jom nyet nyu; shongpübai nyüha hük mü shem yem, shejao hapeü netuh-i didai;

³⁰ hapheikü nyipabüi hatü

³¹ jempabüi pinnyü mü shem yem, hatü hapa keiha jom peüi pinnyü mü shem yemtü hapeü netuhphongi didaikem.

³² Shompülei hapa nyühaao didai.

³³ Shejema yangei leishingkü hapa nyühayü üpalei shembünyü vaihenang? Mehenangkü jom peüi pinnyü mü shem yemteke” shei phe.

³⁴ Jisui jomphong kü, “Hapa den kübü shennyakthüi shem yemnyeih hatü doi deishihnyeih.

³⁵ Shejao üamphong ngoikahen den kü yangei leipü kü hean yahhen shangei nyu, yangei leishingkü jom shem neyemhen, nevaijü doi nedeishihhen.

³⁶ Jom hajük kü nedihen; mehenangkü jomphongü vangsho phongshanthü kei nyuhen. Jomü yangei leipülei hapeüthü vaipü nangkü jomü Kahvangei hathü.

³⁷ Aw bahpü pünien kübü büshah homei Mosai dipü kübü yangei leinyeih shei denpü shuohnyüke; mehenangkü büpai Shembüpa kü, ‘Abraham Kahvang, Isak Kahvang, Jakob Kahvang’ shei enyüke.

³⁸ Shaang büpayü dipü amei Kahvang nevai; mehenangkü büpa kü peü yemmü nyüke” shei e.

³⁹ Hahepak kü shahkung nyühbüthü hanei ami, “Nüngi meishi eteke” shei e.

⁴⁰ Hajük kü jomi büpa kü shah pheteihen mong nelong.

Messiah Jung Phepü

⁴¹ Hapheikü büpai jomphong kü, “Mekei etü jomphongi Messiahyü Davidei ha shei eaoknya?” shei e.

⁴² Mehenangkü Davidi louphü nyingi Menvih Kesho kü hapakei enyüke: Shembüpai ngelei Shembüpa kü,

⁴³ “Ngei nüngei vepa nüngei la phangei mangtuh thahshi nüng ngelei lakdah philei uotuh” shei e.

⁴⁴ Davidi büpa kü Shembüpa shei nyük; shejema mekei etü büpayü büpalei ha vaihenang? shei e.

Jisui Shahkung Nyuhbüthü Khüei Shahvüng

⁴⁵ Nanglakthü peüi danshi büpai nanglomthü kü,

⁴⁶ “Shahkung nyuhbüthü kü lituh; mehenangkü jomi bhagthuh lula thuhtü bheileih shing peülei mih-i selam shihhah-ei, Sinagog hatü mohitap kü meipü hatü dhüm kohpü uoshing kü uohünyüke.

⁴⁷ Jomi vaümnyüthülei shem bomei yahnyüke, hatü eehen shingvaishi luangi phopnyüke. Jomphong nyeinya nemeipü hanghi danghen” shei e.