LUK SHAHSHA APPÜ 2 - DAÜLANGPÜ LAIHING (BSI)

Jisu Bühpü

¹ Hathü nyih kü Augustus ongpai kahdoknyü peü kübü men nyanghen shingvaishi ngeükhüam hük shuoh.

² Hapayü shongpü men nyangpü hatü hayü Syria kü Quirinias-i governor vaipü hepak kü nyuteke.

³ Shennyak peü laophü laophülei jilalei men nyanghen dai.

⁴ Joseph-ao Galil kahdok Nazareth leipü Judea kahdok kübü David Chingnyü Bethlehemei dai; mehenangkü büpayü David am shahishem kübü phaakpü nyuteke.

⁵ Büpayü men nyanghen shingvaishi büpai yahhen doi phepü Mary mü dai, hatü hapeü anghen ngoidaitü nyu.

⁶ Mechem jom halei nyupa, pinnyüi hapeü anghen hepak ngoi.

⁷ Pinnyüi yeshang hük angei büpa kü ashaki jümtü mohoh hetshung kü lemhü; mehenangkü jom ngoipü khaokei dung neshiüi nyuteke.

Mi Yombüthü hatü Vangsho Phongshanthü

⁸ Hapa kahmükei mi yombüthü yanüng nyak kü mi yomei nyu.

⁹ Hahepak kü Shembüpalei vangsho phongshan hük peiyei jomphong touei yaong, hatü Shembüpalei müknyinshekhang jomphong shinei khang, hatü jomphong nyem.

¹⁰ Shejao vangsho phongshani jomphong kü, “Amphong tenyem; mehenangkü veituh, ngei am touei nanglak peü shingvaishi mongong longpü shahjang meipü koei peikünyeih:

¹¹ Shinnyih David chingnyü kü am touei Yemleipüba, üpa Khrista, Shembüpa nyüpa, büpa angei nyüke.

¹² Hapayü am shingvaishi nyangeihepü hük nyukahen: amphongi naü hük ashaki jümtü mohoh hetshungei lemshi eehen” shei e.

¹³ Ngangahük kü vangsho phongshan mü vangsho shanthü khong longpü hük Kahvang men longei eteke:

¹⁴ “Shaopüba vangsho leipü Kahvang müknyinshekhangtuh, hatü kahdoknyü kü büpalei phahji nyupü shennyakthü touei chingmei nyutuh.”

¹⁵ Mechem vangsho phongshanthüi jomphong tuhphongtü vangsholei aongdaipa, mi yombüthü hüki hük mü, “Jeni shaang Bethlehemei daishah hatü Shembüpai jen kü nyinghüpükei mehe dou vampa, ha kü jeni veishah” shei etei.

¹⁶ Hanangkü jomphong mokei daijashingkü Mary hi Joseph nyi hatü naü mohoh hetshungei lemshi ee.

¹⁷ Mechem jomi ha eepa, hapa naü nang jomphong kü mehe eshuohpa, ha jung baongeiyaüei e;

¹⁸ hatü mi yombüthüi jomphong kü epü danpüthü peüi thama.

¹⁹ Shejao Mary-i hathü shah peü mongei chüloh-i jaoei tuh.

²⁰ Jomphong kü epükei mi yombüthüi hathü peü danei eepü nangkü jomi Kahvang müknyinshekhangei men longei nyokei lei.

Jisu kü Men Menpü

²¹ Nyih shet peihpheikü naü kü shuw japhen hepak ngoi, hatü büpa naü uoshingei mangko shekü vangsho phongshani shuohpü men keiha büpa kü Jisu shei menteke.

Jisu Phopshemei Deipü

²² Mosa shahkung kü nyupükei mechem jom daühen hepak ngoipa, jomi büpa Jerusalemei Shembüpa kü lanei shuohhen yah-ei an,

²³ (Shembüpalei shahkung kü, “Shongpü hashongpathü peü Shembüpa kü daühütuh” shei nyangei nyupükei dük),

²⁴ hatü Shembüpalei shahkung kü, “Adhuba jora hük nevaijü khakhi ouha nyi” shei nyangei nyupükei jomi jakpü moila shuoh.

²⁵ Shaang Jerusalemei shennyak hük meni Simeon shei mentü nyu; hapa shennyakü daülangpü hatü Kahvang nyempü shennyak, Israel am nyiushem meihühen omdanei nyu, hatü büpa kü Laangha Daülangpü bak.

²⁶ Büpa kü Laangha Daülangpü homei büpai Shembüpalei Messiah mang-ee thahshi büpa nedipih shei shakei vamei eshuoh-ei nyuteke.

²⁷ Laanghai müei Simeon phopshemei pei, hatü mechem nyühipai shahkung kübü vanglem aimü büpa kü dükhen yah-ei nyujapa,

²⁸ Simeoni laophülei lakei yah-ei paümtü Kahvang men vih-ei e:

²⁹ Jeiyong Shembüpa, nüngi lahpükei shaang nüngei chongphobü nyiushemmei kü dihütuh.

³⁰ Mehenangkü ngelei müki nüngei yemleipü eetepih,

³¹ hayü nüngi nanglak peü nyushi tempeih,

³² Kung am shakei vamhühen shingvaishi vangngai, hatü nüngei Israel nanglak shingvaishi müknyinshekhang.

³³ Naüei chenyü chepa nyi-i naü nang mehe e, ha danei thama.

³⁴ Hapheikü Simeoni jomphong kü moihimanei chenyü Mary kü, “Hapa naü-ü Israel kü longshi shing dohühen, hatü phukhen nyangeihepü hük vaihen nangkü jepeih,

³⁵ shejüang longshi shingi mongei deihpü shakei vamhühen, hatü ammei mongdang kü aokpü yanlui kei vethen” shei e.

³⁶ Halei Asher am phang Phanuelei yiükha Anna shei mentü thibülanyü hük nyu. Pinnyü longi behe leidai; pinnyü shem yempheikü chepaha mü bong nyet nyu,

³⁷ hatü pinnyü bong büalipüali ngoipü thahshi vaümnyü nyuteke. Pinnyüi mechemao phopshem leipü nedai shejao halei nyakhingai thüngei shüaeiyungleyei phopei khümei nyu.

³⁸ Hahepak kü pinnyü peiyei Kahvang kü menvih shuoh-ei hatü Jerusalem yemleihen nangkü omdanpüthü peü kü hapa naü jung eyei nyu.

Nazarethlei Nyokei Leipü

³⁹ Shembüpalei shahkungi yüpü lemphü dükei tempheikü Galil kü jomei jila Nazarethlei jom nyokei lei.

⁴⁰ Ha naü long, hatü wong koh-ei kihikoni maei nyu, hatü Kahvang phahji büpa kü nyu.

Hashih Jisu Phopshemei

⁴¹ Shaang bong ieyei chenyü chepai Jerusalemei Hompü Mo kü peihamteke.

⁴² Mechem büpa bong anpünyi lompa, nyingnyoi kü kei jomphong molei dai.

⁴³ Mechem mo dohpa, jom nyokei leihen layaong, hashih Jisu-ü Jerusalemei nelei-i nyu, shejao chenyü chepai ha nenying.

⁴⁴ Jom chemi yen daipü khong mü nyüpeih shei deihshi jom nyih hük lem kü leiyei nyu. Hapheikü jomi shem am hatü küphüthü mü büpa nyüla shei yemhen pang.

⁴⁵ Jomi büpa nedangpü nangkü jom Jerusalemei büpa yemnüng nyokei lei.

⁴⁶ Nyih jem pheikü jomi büpa Jerusalemei nyuhbüthü mü uoshi jomphongi epü bangei hatü shah pheteiyei nyu,

⁴⁷ hatü büpai epü danpüthü peüi büpalei kihikon hatü büpai shahnyok shuohpü kü yashanei nyu.

⁴⁸ Mechem chenyü chepa ami büpa eepa, jom thama. Chenyüi büpa kü, “Hapeü, mehekei nüngi henji kü hapakei lingnya? Ampa henji longi mongshangei nüng yemei nyupeih” shei e.

⁴⁹ Büpai jiji kü, “Anjinyi-i mehekei ngei yempa? Ngeiyü Opalei shemei nyuhen shei anji-i nenyingpü je?” shei e.

⁵⁰ Shejao büpai mehe e, ha jijinyi-i nenyingaok.

⁵¹ Hapheikü büpa jiji mü leiyei Nazareth ngoi, hatü jiji-i epü ven bangei nyu. Chenyüi lemphü mongei jaoshi ang.

⁵² Jisu kihikon hatü bümhishao kü, hatü Kahvang hatü hangku touei bampü kü longteke.