LUK SHAHSHA APPÜ 19 - DAÜLANGPÜ LAIHING (BSI)

Jisu hatü Zakhaeus

¹ Jisu Jerikolei peitü homei dai.

² Halei Zakhaeus shei menpü shennyak hük nyu; büpayü lat thaibü longpü hatü shemmeipa nyu.

³ Büpai Jisu-ü üpaang shei veihen khe, shejao khongnyü longi nyupü nangkü büpai ne-eeaok; mehenangkü büpayü shaohi-ang shohshi nyu.

⁴ Hanangkü büpa she philei mokei heih-ei büpa kü veinüng shei bhukpü hükei aong; mehenangkü büpa hapa lemei peih-ei daihen nyuteke.

⁵ Mechem Jisu hapa shing ngoijapa, büpai ngangei veitü büpa kü “Zakhaeus, shülangi shühkei; mehenangkü ngei nüngei shemei ngoihen hih” shei e.

⁶ Hanangkü büpa shülangi shühteke, hatü büpa mongongshi yah.

⁷ Ha eepüthü peüi nümnümei, “Büpayü mang shennyakei shemei yen vaihen ngoidaitih” shei etei.

⁸ Zakhaeus yaongei Shembüpa kü, “Veituh, Shembüpa, ngelei mop hükkeishing taopathü kü shuohhen hih, hatü ngei hanei am kü lueilemei lemhük dangkao yah-ei nyujema, ngei shing ali nyeishi shemhen hih” shei e.

⁹ Hahepak kü Jisui büpa kü, “Shinnyih hapa shemei yemleipü peiyei nyüke; mehenangkü büpaao Abrahamei ha.

¹⁰ Mehenangkü Shennyak Hayü mahdaipüthü yemhen hatü yanghen peipeih” shei e.

Hon Lopthüi Shahlappü

¹¹ Jomphong hapa kü bangei nyushingkü büpai nedoh-i shahlap hük e; mehenangkü büpa Jerusalem yopailei nyu, hatü Kahvang ongchingü shülangi peikahen vaaishang shei jomi deih.

¹² Hanangkü büpai, “Longhivang hük tailu kahdokei laophü shing ong hükei wong yah-ei leihen dai.

¹³ Büpai büpalei chongphobüthü jom an nyükei hon lop anbaong shuohtü jomphong kü e, ‘Ngei mangleikei thahshi hapai bhei leih-ei chongkei.’

¹⁴ Shejao laophülei nanglaki büpa kü jiühit, hatü büpa pheikü phongmokbüthü shomei, ‘Hami hapa shennyak ham shak kü vanglem lemkahen nenanyih’ ” shei e.

¹⁵ Mechem büpa ong vaitü nyokei leipa, büpai lop shuohpü chongphobüthü kü jomphong bhei leihpai mehe nanglei dangpa ha henghen büpai jomphong kü ngeükhüam shuoh.

¹⁶ Shongpüba peiyei, “Shembüpa, nüngei lop shao lop an nyeinya dapeih” shei e.

¹⁷ Büpalei shembüi “Meiteke, chongphobü meipü! Mehenangkü nüngi maanpü dou kü mong shuohpü nangkü nüngi chingnyü an kü veituh” shei e.

¹⁸ Nyipabü peiyei, “Shembüpa, nüngei lopi shao nga nyeishi dapeih” shei e.

¹⁹ Büpai büpa kü, “Nüngi chingnyü nga shak kü vanglem lemtuh” shei e.

²⁰ Hapheikü hükpa peiyei, “Shembüpa, nüngei lopü ha khih. Ngei ha ashaki meishi jümtü tuhpeih;

²¹ mehenangkü ngei nüng kü nyemei deihpeih; mehenangkü nüngü shihmangpü shennyak; nüngi melei thaiyei netuh, haleipü yahnyüke, hatü nüngi mehe nehai, haleipü vetnyüke” shei eteke.

²² Büpalei shembüi büpa kü, “Nüngei shah kü-üng ngei nüng shahphenhen, nüng nemeipü chongphobü! Nüngi ngeiyü shihmangpü shennyak; ngei melei nethai haleipü yahnyeih, hatü melei nehai, haleipü vetnyeih shei nyingei nyüke.

²³ Shejema mehekei nüngi ngelei lop lop jaoshingei netuhpa? Hapakei vailangmeyü ngei leijü lop kü lop bhüpü omshi danghen vaipeih” shei e.

²⁴ Hahepak kü büpai hatouei yaongpüthü kü, “Büpa leipü lop yah-ei lop an angpüba kü shuohtüktuh” shei e.

²⁵ Jomphongi büpa kü, “Shembüpa, büpaleiyü lop an tuhtü je” shei e.

²⁶ Büpai jangei, “Ngei am kü enyeih, üam ang, jom kü nyeishi shuohhen, shejao üpalei meheyao ne-ang, büpalei mehe nyu, hayao yahlanghen.

²⁷ Shejao ngelei vepathü üami jom shak kü ngei ong nevaihahhü, hathü hatouei deiyei ngei touei jütuh” shei eteke.

Jisui Aokpü Dangei Jerusalemei Yiüpü

²⁸ Büpai ha epheikü jomphong shekü Jerusalemei aong.

²⁹ Büpai Olive Kahshang shei epü Bethphage hatü Bethany shangjing ngoi, hatü büpai nanglom nyi deishih-ei jiji kü,

³⁰ “Anji shelei eepü chingei heihtuh, hatü anji shüjajü üpaiyao chemao manguopü gadu cheha shenshi eehen hih. Hapa sheyei halei leikei.

³¹ Hanei ami anji kü, ‘Ha mehekei shenya?’ shei ephüjü büpa kü, ‘Shembüpai ha nanyüke’ shei etuh” shei e.

³² Yeihshi shompü nyi dai, hatü büpai jiji kü epükei heüteke.

³³ Jijinyi-i ha gadu sheyei nyushingkü hapalei shembüi jiji kü, “Mehekei anji-i gadu shenya?” shei phe.

³⁴ Jiji-i, “Shembüpai ha nanyüke” shei e.

³⁵ Hapheikü jijinyi-i ha Jisu touei müei lei, hatü gadu kü jomei ashak nyemtü hapa kü Jisu uohü.

³⁶ Büpa ha kü uoei daishingkü nanglakthüi lem kü jomei ashakviha nyemteke.

³⁷ Olive Kahshang lemei yiüpü lem ngoishingkü nanglom khongnyü kemei jomi eepü yashanyale shingvaishi mongongpü ngeüwong anei Kahvang men vihteke:

³⁸ “Shembüpalei men kü peipü ongpa moihimanpü! Vangsholei chingmei, hatü shaopüba kü müknyinshekhang!”

³⁹ Khongnyü leipü Pharisee am hanei büpa kü, “Nyuhbü, nüngei nanglomthü kü dohtuh shei ngeükhüam shuohtuh” shei e.

⁴⁰ Büpai jangei, “Ngei am kü enyeih, hathü nendaijao yaongthüi lenkahen” shei e.

Jisui Jerusalem Nangkü Theppü

⁴¹ Büpai Jerusalem ngoijü chingnyü eeyei ha nangkü thep,

⁴² hatü, “Chingmei shingvaishi lingpü hapa nyih ammi dangkao nyinglang meyo– Shejao shaang hapayü ammei mük kübü jolangteke.

⁴³ Hingmei, ammei vepathüi kahdok shaokei bham linghen, hatü am kü shontü shing peü philei lünglei nemei-i khüamhen.

⁴⁴ Jomi am hatü ammei hapeüthü yepei kahdok kü hathühen, hatü jomi yaong hük shangkü hük dheanei netuhphonghen; mehenangkü Kahvang am touei peihen hepak ammi nenying” shei e.

Jisui Phopshem Daüpü

⁴⁵ Hapheikü büpa phopshemei shüei halei dou yupüthü peü changtük;

⁴⁶ hatü büpai e: “Ha nyangei nyüke, ‘Ngelei shemü phoppü shem shei nyükhen; shejao ammi hayü gühpathülei dung leitükteke.’ ”

⁴⁷ Nyihjeih büpai phopshemei nyuh-ei nyu. Ngongpathü, shahkung nyuhbüthü, nanglak mübüthü peüi büpa jühen lem yemei nyu;

⁴⁸ shejao jomi dükaokhen mü meheyao nedang; mehenangkü nanglakthü peüi büpalei shah hükao ne-ami bangei nyuteke.