LUK SHAHSHA APPÜ 15 - DAÜLANGPÜ LAIHING (BSI)

Mahdaipü Mi-i Shahlappü

¹ Shaang lat thaibüthü hatü mangthü peü büpai epü banghen yopailei pei.

² Pharisee hatü shahkung nyuhbüthüi langmaanei, “Hapa shennyaki mangthü yahnyüke hatü jom mü hahyingnyüke” shei e.

³ Hanangkü büpai jomphong kü hapa shahlap e:

⁴ “Amphong khongkü üpai mi kho hük angpü khongkü hük mahdaijü büalipü anpüshü jahpanei tuhphongtü mahdaipü hük mangdang thahshi yemnüng nedainya?

⁵ Mechem büpai ha danghenshang büpai bhagchongei paitü mongongnyüke,

⁶ hatü mechem büpa shemei leihenshang, büpai küphüthü hatü chingyowthü nyükei jomphong kü, ‘Ngei mü mongongtuh; mehenangkü ngei mahdaipü mi dangteke’ shei enyüke.

⁷ Hapakei ngei am kü enyeih, mong lephen nadang nevaipü daülangpü shennyak büalipüanpüshü leimeyü mechem mang shennyak hük mong lepei leihenshang vangsholei nyeinya mongongpü nyuhen.”

Mahdaipü Poisa-i Shahlappü

⁸ “Nevaijü nyüha hüki lop an angpü kübü hük mahdaijü pinnyüi ha mangdang thahshi awdük jaktü shemnyüp maoei meishi neyemnyu je?

⁹ Mechem pinnyüi ha danghenshang, pinnyüi küphüthü hatü chingyowthü nyükei, ‘Ngei mü mongongtuh; mehenangkü ngei mahdaipü lop dangteke’ shei enyüke.

¹⁰ Hapakei ngei am kü enyeih, mang shennyak hük mong lepei leijü Kahvangei vangsho phongshanthü nyupü shingei mongong longpü nyüke.”

Mahdaipü Yeshang Hüki Shahlappü

¹¹ Jisui e: “Shennyak hükei ha yeshang nyi nyu.

¹² Naü-eepai chepa kü, ‘Opa, ngei kü shuohhen mükjüp hean yahshih’ shei e. Hanangkü büpai cheihinaü nyi aa kü mükjüp hanei shuoh.

¹³ Nyih maani angpheikü naü-eepai büpai angpü peü yah-ei tailu kahdokei dai, hatü mechem halei büpai nebahnevai-i lemphü kemtükpa, hapa kahmükei mangpü shaühile hük pei, hatü büpa taoei sha.

¹⁴ Mechem büpai angpü lemphü kemdaipa, hapa kahmük kü münghishaü mangpü hük pei, hatü büpa meheyao neshiüi lei.

¹⁵ Hanangkü büpai daiyei hapa kahdokei nyupü bühü shennyak hük amei lathah-ei nyu, hatü büpai ook yomhen jomei kahlei büpa shanshih.

¹⁶ Büpai ooki hahpü kolüng shoup hahhüei deih, shejao üpaiyao büpa kü meheyao neshuoh.”

¹⁷ Shejao mechem büpa mong hüngei deihpa, büpai laophü nyingi e, “Opalei shemei nang shapüthüyü hahtao aoei nyüpeih, shejao ngeiyü hatouei aeipai dinyu khih!

¹⁸ Ngei layaongei opa touei leishah, hatü ngei büpa kü, ‘Opa, ngei vangsho hatü nüng khüei mang thahteke;

¹⁹ ngei sheyü nüngei ha shei nyükhen neshang; nüngei shemei lathahpüthü hük kei ngei tuhtuh’ shei ehen hih shei eteke.”

²⁰ Hanangkü büpa layaongei chepa touei lei. Shejao büpa tailei nyushi-üng chepai büpa eeyei shinshangei deih, hatü büpa mokei heih-ei büpa kü khaaitü ju kü jüp.

²¹ Hahepak kü chehai büpa kü, “Opa, ngei vangsho hatü nüng khüei mang thahteke, ngei hajük kü nüngei ha shei nyükhen neshang” shei e.

²² Shejao chepai büpalei chongphobüthü kü, “Peü mü meipü bhagthuh deikei, hatü ha büpa kü thuh-eishuoh; büpalei lakjaang kü anguti shepeishuoh, hatü lathuh thuh-eishuoh,

²³ hatü nitshüpü mohoh cheha deiyei jütuh, hatü jeni mo hah-ei mongongshah;

²⁴ mehenangkü ngelei hapa hapeü didai-i nyuteke, hatü yangei leiteke; büpa mahdai-i nyuteke, hatü dangteke!” shei e. Hapheikü jomphong mo mohen pang.

²⁵ Shaang cheha behepa kahlei shadaitü nyu, hatü mechem büpa aongei shem ngoipa, büpai kesho lokpü hatü opühupü ngeü dan.

²⁶ Büpai chongphobü hük nyükei mehe vaipa shei phe.

²⁷ “Anaü leiteke, hatü büpa meishi yangei leijapü nangkü ampai nitshüpü mohoh cheha jüteke” shei jangei e.

²⁸ Hahepak kü büpa mongshih, hatü shem mongei shühen nemong. Hanangkü chepa vamei büpa kü khümei e.

²⁹ Shejao büpai chepa kü, “Bangtuh, bong hajük ngei nüngei aa keiha dou dükei nyuhampeih, hatü ngei chemao nüngi epü nebangi nenyu; shejao nüngi yum cheha hükao ngelei küphüthü mü mo hahhen neshuoh.

³⁰ Shejao mechem anhai nüngei mop kemei büm yupüthü mü hah-ei kemtüktü nyokei leiküpa, nüngi büpa kü nitshüpü mohoh cheha jüteke” shei e.

³¹ Hahepak kü chepai büpa kü, “Hapeü, nüngü düngei ngei mü nyüke, hatü ngei angpü peü nüngei khan.

³² Shejao jeni mo hah-ei mongongshah; mehenangkü nüngei naüpeü didai-i nyuteke, hatü yem leiteke; büpa mahdai-i nyuteke, shejao dangteke” shei e.