LUK SHAHSHA APPÜ 11 - DAÜLANGPÜ LAIHING (BSI)

Phophen Jung Nyuhpü

¹ Nyih hük Jisu shing hükei phopei nyu, hatü büpai phoppü dohpheikü büpalei nanglomthü khongkü hüki büpa kü, “Shembüpa, Johani büpalei nanglomthü kü nyuhpükei hamphong kao phophen nyuhshih” shei e.

² Büpai jomphong kü e, “Opa, nüngei men daülangpü vaituh. Nüngei ongching peikei.

³ Nyihjeih hahying nyih ieyei ham kü yahshihma.

⁴ Ham khüei mang thahpüthü kü hami mang tükshuohpükei hamei mang tükshihma, hatü dokpülei ham temühü.”

⁵ Hapheikü büpai jomphong kü e, “Lappü hüki amphong khongkü hüki küphülei shemei nyak jiam kü heih-ei büpa kü, ‘Mongjem, ngei kü aan jem lushih;

⁶ mehenangkü ngelei küphü hük ngoiyei nyüke, hatü ngei büpa kü ühhen meheyao neshiü’ shei eshuohjü,

⁷ büpai shem mongeipü jangei, ‘Ngei kü tebaokkei, sha küptükteke, hatü hapeüthü peü shidaiteke; ngei paoei nüng kü meheyao neshuoh-aok-ü’ shei enyüke.

⁸ Ngei am kü enyeih, mongjem vaipai shei büpai paoei büpa kü meheyao neshuohjao büpai nyeanpü nangkü büpa paoei mehe büpai na ha shuohhen.”

⁹ Hanangkü ngei am kü enyeih: Yütuh, hatü ha am kü shuohhen; yemtuh, hatü ha ammi danghen; kaongtuh, hatü ha am kü apphahen.

¹⁰ Mehenangkü yüpü peüi dangnyeih, hatü yempü peüi dangnyeih, hatü kaongpüthü peü kü apshuohnyeih.

¹¹ Am pathü üpai laophülei hapeüi nyah yüjü büpa kü biü jeiyei shuohhen?

¹² Nevaijü büpai ati yüjü büpa kü yiüjikaungkang shuohhen?

¹³ Amphong shennyakten vaijao laophülei hapeüthü kü thintho meipü shuohhen nyingjema, ammei vangsho leipü Pa-i büpa kü yüpüthü kü meshük nyeinya shuohhenang!

Jisu hatü Beelzebul

¹⁴ Shah ne-eaokbenüng mang laangha hük Jisui changtük. Mechem mang laangha vamdaipa, shah ne-e-i nyupü shennyaki shah e, hatü khongnyüi thama.

¹⁵ Shejao jomphong hanei-i, “Kahshihlei vanglem lembü Beelzebul homei büpai mang laangha changnyeih” shei e.

¹⁶ Lebüthüi büpa kü dokei vangsho leipü nyangeihepü nedoh-i yüteke.

¹⁷ Shejao jomi mehe deih ha büpai nyingei jomphong kü, “Ongching hüki laophü khüei hanjema bendainyeih, hatü shem hük laophü khüei hanjema dodainyeih.

¹⁸ Hapakei Satanao laophü khüei hanjema, mekei etü büpalei ongching yaongaokhen? Ngei Beelzebul homei mang laangha changpeih shei ammi epü nangkü ngei ha enyeih.

¹⁹ Shaang ngei Beelzebul homei mang laangha changjema, üpa homei am phei müpüthüi jom changtüknya? Hanangkü am phei müpüthüi ammei shahphenbü vaihen.

²⁰ Shejao ngei Kahvangei ngani mang laanghathü changtükjema, Kahvang ongching am touei peiteke.

²¹ Mechem wong kohpü shennyaki lahhilaong changshi notü shem yomhenshang, büpalei mopthü yangei tuhnyüke.

²² Shejao mechem büpa mao wong kohpübai büpa neühen, büpai büpalei lahhilaong yah-ei lüdainyeih hatü büpalei mop-ao hanei lüdainyeih.

²³ Üpa ngei mü nenyu ngei khüei nyüke, hatü üpa ngei mü nethai, haitüknyeih” shei e.

Mang Laangha Nyokei Leipü

²⁴ “Mechem shennyak hük leipü mang laangha vamei daihen, büpa yung neshiüpü kahmükei nyiumei shing yemei longteinyeih, shejao meheyao nedangi büpai, ‘Ngei vamei lüdaipü shemei-üng nyokei leihen hih’ shei enyeih.

²⁵ Mechem büpa nyokei leihen, nyüp maotüktü shüpeikengtüktü eenyüke.

²⁶ Hapheikü büpa daiyei büpa mao nemeipü laangha nyet müei leinyeih, hatü jom shüei halei nyunyeih; hatü hapa shennyakei laphenü shongpü mü pheishi-üng nemeipüba leidainyeih.”

Hingshangpü Mongong

²⁷ Mechem Jisui ha eyei nyupa, khong leipü nyüha hük ngeü vamei büpa kü, “Nüng kopü naü uoshing hatü nüngi yingpü amma moihimantuh” shei e.

²⁸ Shejao büpai, “Üami Kahvangei shah danei düknya, hathüang moihiman!” shei e.

Yashanyale Yüpü

²⁹ Mechem khongnyü nyeinya daei leipa, büpai, “Hapayü nemeipü denhivan; hapai yashanyalepü yünyüke, shejao Jonah homei nyangeihepü mü lenei mehe nyangeihepüyao neshuohpih.

³⁰ Mehenangkü Jonah-i Nineveh kü nyangeihepü leipü keiha Shennyak Hayao hapa den kü nyangeihepü vaihen.

³¹ Sheba leipü onglanyüi shahphenpü nyih hapa denhivan shennyakthü khüei yaonghen hatü jom nyonghühen; mehenangkü pinnyüi kahdok dohpü leipü Solomonei kihikon kü banghen peipeih, hatü veituh, Solomon mao longpü lemhük hatouei nyüke.

³² Nineveh nanglakthüi shahphenpü nyih hapa denhivan khüei yaonghen hatü nyongtükhen; mehenangkü Jonah-i chongvenpü kü jomi mong lep, hatü veituh, Jonah mao longpü lemhük hatouei nyüke” shei e.

Büm kü Vangngai

³³ Üpaiyao awdük jaktü mühdow mongei netuhnyih, shejao mongei shüpü peüi vangngai eehen shingvaishi awdük ngenshingei ngenei tuhnyeih.

³⁴ Nüngei mükü nüngei büm kü awdük. Nüngei mük meishi nyujema, nüngei büm kü vangngai-i maei nyüke; shejao ha meishi nenyujema, nüngei bümü shangmangi maei nyüke.

³⁵ Hanangkü vangngaiyü shangmang leidaimangkü nüng kenhingtuh.

³⁶ Hanangkü nüngei büm vangngai-i maei nyujema, hatü mepa shingao shangmang kü nenyujema, awdük vangngai-i nüng kü khangpükei chemjalak kü vangngai leidaihen.

Jisui Pharisee hatü Shahkung Nyuhbüthü Nyonghüpü

³⁷ Mechem büpa shah eyei nyupa, Pharisee am hüki büpa mü hahyinghen büpa kü nyük; hanangkü büpa daiyei nükdü touei uo.

³⁸ Bhaong hahshekü büpai lak nehühpü eeyei hapa Pharisee shennyaki thama.

³⁹ Hahepak kü Shembüpai büpa kü, “Shaang am Pharisee amü nükshung pati shakdok mon daünyüke, shejao mongeiyü hahnempü, hatü mangi maei nyüke.

⁴⁰ Amphong ngapathü! Shakdok lingpübai mongao nelingangpü je?

⁴¹ Hanangkü mongei mehe nyu, ha taopathü kü shuohtuh, hatü lemphü daüdaihen” shei e.

⁴² Shejao am Pharisee am onyükei! Mehenangkü ammi chühüng hatü chünem hatü lebü phenlakthü peü yah-ei ankhong shuohnyüke, shejao ammi shahhing hatü Kahvang bampü yakphongnyüke. Ammi shongpü netuhphongi shompü dükhen vaipeih.

⁴³ Am Pharisee am onyükei! Mehenangkü ammi Sinagoglei dhüm kohpü uoshing kü uohünyüke, hatü bhei leihshing peüei mih-i selam shihhahhünyüke.

⁴⁴ Am onyükei! Mehenangkü amphongü joshi nyupü mahngchong leangke; shennyakthüi nenyingi ha shangkü kamnyüke.

⁴⁵ Shahkung nyuhbü hüki büpa kü, “Nyuhbü, mechem nüngi hathü ehenshang, nüngi hamphong kao naamei enyüke” shei e.

⁴⁶ Jisui büpa kü e, “Amphong shahkung nyuhbüthü, amphongao onyükei! Mehenangkü ammi nanglakthü kü neko-aokhen mü hanggovih kohünyüke, hatü ammi jom kü lakjaang hükiyao noei nesheühnyu.

⁴⁷ Amphong onyükei! Mehenangkü ammi ammei bühipathüi jütükpü thibüthülei mahngchong lingnyüke.

⁴⁸ Hanangkü ammei bühipathüi dükpü douthü kü ammi denpü shuohnyüke, hatü ha jiüpükei yahnyüke; mehenangkü jomi jü, ammi mahngchong lingnyüke

⁴⁹ Hanangkü Kahvangi büpalei kihikoni, ‘Ngei jom touei thibüthü hatü phongshanthü shomhen, jomi hathü hanei jühen hatü shüveihen’ shei eteke;

⁵⁰ shejüang kahdoknyü linghinüng thibüthülei iy yenhüpü kemei hapa denhivan kü yühen;

⁵¹ Abelei iy kübü moidü hi Daülangpü Shing nyi aa kü jüpü Zekhariah thahshi. Hih, ngei am kü enyeih, hapa denhivan kü ha yühen.

⁵² Am shahkung nyuhbüthü onyükei! Mehenangkü ammi nyingpühingpü sabi yah-ei lüdai; am nyingiyao neshü, mih shühenthü kao ammi bangtük.”

⁵³ Mechem büpa haleipü vamei daipa, shahkung nyuhbüthü hatü Pharisee ami büpa kü nemei-i khühen, douthü longi kü dokei veihen pang,

⁵⁴ büpai epü lemhük kü nongshi büpa yephen danei nyu.