LUK SHAHSHA APPÜ 1 - DAÜLANGPÜ LAIHING (BSI)

Theophilus kü Nyangpü

¹ Bampü Theophilus! Longshi shingi jen touei dhaümpü douthü jung dheanei nyanghen pangteke,

² chongpangpülei müki eeyei denpüthü hatü hapa shah baongpüthüi jomi mehe eetepa, ha jen kü epükei,

³ lemphü chongpangpü leipü longi kenhingshi dokei yempheikü ngeiyao nüng shing ha dheanei nyanghen shei tempeih,

⁴ shejüang nüngi mehe shahhing nyuhtepa, ha douthü nüngi lekei nyinghen.

Johan Baptükbü Bühhen Epü

⁵ Judea kü Herod ongpalei nyih kü Abijah ngong phang kübü ngongpa hük Zekhariah shei mentü nyu. Chenyühayü Aaronei hühhiha nyu hatü pinnyü kü Elizabeth shei men.

⁶ Jijinyiphen Kahvang touei daülangi nyu, hatü Shembüpalei shahkung hatü vanglemthü aimü eela neshiüi nyu.

⁷ Shejao jiji hapeü nenyu; mehenangkü Elizabeth-ü nyülan nyu, hatü jijiphen vangbongi behe leidaitü nyu.

⁸ Chem büpa kü beanpü hepak kü Zekhariahyü Kahvang touei ngongdou dükei nyu,

⁹ ngong vanglem kü nyupükei phongyomei jepü nangkü Shembüpalei daülangpü shingei shüei ayingshü jakei nyu.

¹⁰ Shaang ayingshü jakei moilapü hepak kü khongnyü-ü chingshelei phopei nyu.

¹¹ Hahepak kü Shembüpalei phongshan peiyei ayingshü jakpü moidü lakdah lemei yaong.

¹² Mechem Zekhariah-i büpa eepa, büpa han, hatü nyempai mateke.

¹³ Shejao vangsho phongshani büpa kü, “Zekhariah, nüng tenyem; mehenangkü nüngi phoppü danteke. Anyüha Elizabeth-i yeshang hük angkahen, hatü nüngi büpa kü Johan shei menhen.

¹⁴ Nüng mongongpü hatü mongmeipü nyuhen, hatü büpa angpü nangkü longshi shing mongonghen;

¹⁵ mehenangkü büpayü Shembüpa touei longpü nyuhen. Büpai yiü nevaijü wong kohpü yiü neyinghen; büpa bühshekü-üng Laangha Daülangpai maei nyuhen.

¹⁶ Büpai Israel nanglakthü longi Shembüpa, jomei Kahvang touei müei leihen.

¹⁷ Elijahlei laangha hatü ngani büpai büpa shekü daiyei nyühipathülei mongdang hapeüthü philei, hatü ven nedanpüthü daülangpüthülei kihikon lemei nyokei leihen; hapa keiha Shembüpa shingvaishi nanglakthü temhen” shei e.

¹⁸ Zekhariah-i vangsho phongshan kü, “Ha vamkahen shei ngei mekei etü nyinghen? Mehenangkü ngei sheyü viüdai, hatü ngelei nyühayao vangbongi behe leidaiteke” shei e.

¹⁹ Vangsho phongshani büpa kü, “Ngeiyü Gabriel hih. Ngeiyü Kahvang touei yaongshi nyunyeih, hatü ngeiyü nüng kü ha ehen hatü nüng kü hapa shahjangmei kohen shompeih.

²⁰ Shejao hapa jiüpü hepak kü ha dhaümhen shei epü ngelei shah kü nüngi hingnelempü nangkü ha dhaümpü nyih mangngoi thahshi nüngi shah ne-eaoki nyuhen” shei jangei e.

²¹ Hahepak kü nanglakthüyü Zekhariah danei nyu, hatü phopshem leipü büpa mehekei pheinya shei thamaei nyu.

²² Mechem büpa vampa, büpai jomphong kü shah ne-eaok, hatü büpai phopshemei manghkhang hük eeteke shei deihei dang. Büpai jomphong kü laki nyuh-ei hu, shejao shah ne-eaoki nyu.

²³ Mechem büpa chongphopü hepak peihpa, büpa shemei leidai.

²⁴ Hathü nyih pheikü chenyüha Elizabeth büm nekongi lei, hatü lenyang nga thahshi shemei küpshi nyudai.

²⁵ “Shembüpai ngei kü ha dükpeih, hatü büpai ngei kü phahjiyei vei, hatü ngelei nanglak khongkü ngei ponghahpü mongmang büpai yahlang” shei pinnyüi e.

Jisu Bühhen Epü

²⁶ Len vokpabü kü Kahvangi Galil kü jila hük Nazarethlei Gabriel phongshan shom;

²⁷ hatü David am phang Joseph-i doi pheyei nyupü nela Mary touei pei.

²⁸ Büpai pinnyü touei peiyei, “Selam! Shembüpa nüng mü nyüke, hatü nüng kü longi moihimanteke” shei e.

²⁹ Shejao büpalei shah kü pinnyüi shanghah-ei deih hatü hayü menüng keipü selam shah enya shei deih.

³⁰ Shejao vangsho phongshani pinnyü kü, “Nüng tenyem, Mary; mehenangkü Kahvangi nüng kü phahjiteke.

³¹ Shaang nüngi büm nekongi leihen hatü yeshang hük bühhen, hatü nüngi büpa kü Jisu shei menhen.

³² Büpayü longpü nyuhen hatü büpayü Chaipübalei Ha shei nyükhen, hatü Shembüpa Kahvangi büpa kü chebü Davidei ong uoshing shuohhen.

³³ Büpai den kü Jakob am phang shak kü vanglem lemhen, hatü büpalei ongching dohpü neshiühen” shei e.

³⁴ Mary-i vangsho phongshan kü, “Hayü mekei aokhen? Mehenangkü ngeiyü pai mü ngühpü nela hih” shei e.

³⁵ Vangsho phongshani pinnyü kü, “Laangha Daülangpü nüng shak kü peikahen, hatü Chaipübalei ngani nüng kü dhümhen; hanangkü nüngi anghen naü-ü daülangpü nyuhen; büpa kü Kahvang Ha shei nyükhen.

³⁶ Shaang, nüngei shem am Elizabeth-ao behe leidaitü yeshang hük koshi nyüke; hatü üpa kü nyülan shei ehampa, pinnyü hapeü nyupheikü shaangpai lenyang vokpabü hih.

³⁷ Mehenangkü Kahvang mü meheyao ne-aokhen neshiü” shei e.

³⁸ Hahepak kü Mary-i, “Shembüpa chongphobü ngei hamü nyüpeih; nüngei shah aimü ngei kü nyemjiükei” shei e. Hapheikü vangsho phongshan pinnyü toueipü lüdai.

Mary-i Elizabeth Thümpü

³⁹ Hathü nyih kü Mary-i layaongei shülangi phaüshang kahmük Judea amei jila hükei dai;

⁴⁰ hatü halei pinnyüi Zekhariahlei shemei shüei Elizabeth kü selam shihteke.

⁴¹ Mechem Mary-i selam epü Elizabeth-i danpa, vom mongeipü naüi mongongpai pheü, hatü Elizabeth-ü Laangha Daülangpai mateke.

⁴² Ngeü longpai pinnyüi lenteke: “Nyüha khongkü nüng moihimanpü, hatü nüngei naü uoshing kübü betjük moihimantuh.

⁴³ Ngelei Shembüpalei nyü leihen mü ha ngei kü mehekei hetpa?

⁴⁴ Mehenangkü nüngi ngei kü selam epü danhinüng ngelei naü uoshing kübü naü mongongpai pheüteke.

⁴⁵ Shembüpai pinnyü kü mehe etepa ha jiükahen shei hinglempü pinnyü moihiman!”

Marylei Menvih Kesho

⁴⁶ Mary-i eteke: “Ngelei mongi Shembüpa müknyinshekhangnyeih;

⁴⁷ hatü ngelei laanghai Kahvang, ngei yemleipü kü mongongnyeih;

⁴⁸ mehenangkü büpai laophülei chongphobü maanpü leipü kü phahjiyei veiteke. Hingmei, shaang mü leitü den peü kü ngei kü moihimanpü shei nyükphahen;

⁴⁹ mehenangkü Jeiyong Kahvangi ngei kü dou longpü dükteke, hatü büpalei men daülangpü vaituh.

⁵⁰ Büpalei phahjiyü büpa kü nyempüthü shing hüdenhalenshi nyüke.

⁵¹ Büpai laophülei laki büpalei wong huteke; büpai jomei mongei changmeiyei deihpüthü yantük.

⁵² Büpai wong kohpüthü ong uoshing kübü shüei vütük, hatü maanpüthü longei anshihteke.

⁵³ Büpai aeipüthü doumei-i mahü, hatü shemmeithü lakkong deitük.

⁵⁴ Büpai laophülei phahji deih-ei dangtü laophülei chongphobü Israel am kü sheüh;

⁵⁵ büpai hamei bühipa Abraham, hatü büpalei hüpeüthü shing den shingvaishi lahpükei dükteke.”

⁵⁶ Mary pinnyü mü lenyang jem hükshing nyutü pinnyülei shemei nyokei leidai.

Johan Baptükbü Bühpü

⁵⁷ Shaang Elizabeth-i hapeü anghen hepak ngoi, hatü pinnyüi yeshang hük büh.

⁵⁸ Pinnyülei chingyowthü hatü shem ami pinnyü kü Shembüpai phahji longpü hupü jung danei jom longi pinnyü mü mongong.

⁵⁹ Nyih shetpabü jomi naü kü shuw japhen thai, hatü jomi naü kü chepalei men leiyei Zekhariah shei menhen nyu.

⁶⁰ Shejao chenyüi, “Nevai, naü keyü Johan shei menhen” shei e.

⁶¹ Jomi pinnyü kü, “ammei shem am üpa kao hapa men menei neshiüpih” shei e.

⁶² Hanangkü jomi chepa kü naü kü mehe men menhen shei laki nyuh-ei e.

⁶³ Büpai yaongshung hük yahkei shei e, hatü, “Büpalei menü Johan” shei nyang. Ha kü jom peü thama.

⁶⁴ Ngangahük kü büpalei ju ap, hatü büpalei yei laiyei Kahvang men longei shah ehen chongpang.

⁶⁵ Jomei chingyowthü peü kü nyempü pei, hatü ha douthü jung phaüshang kahmük Judea kempülei etei.

⁶⁶ Ha jung danpü peüi, “Hapa naü mehe leikahen?” shei thamaei etei. Mehenangkü Shembüpalei lak büpa mü nyuteke.

Zekhariah-i Tetpüvanpü

⁶⁷ Hahepak kü chepa Zekhariah-i Laangha Daülangpai maei hapa tetpüvanpü shah eteke:

⁶⁸ Shembüpa, Israel Kahvang moihimantuh; mehenangkü büpai laophülei nanglak kü phahjiyei veiteke, hatü jom angei leiteke.

⁶⁹ Büpai ham shing yemleipü vaung hük büpalei chongphobü David am phang kübü vamhüteke.

⁷⁰ Büpai aivang den mebü büpalei daülangpü thibüthülei ju homei,

⁷¹ hamei vepathü kübü yanghen, hatü ham kü jiühitpüthülei lak kübü ham yanghen epü jiüteke.

⁷² Hapakei hamei bühipa kü büpai lahpü phahji huteke, hatü büpalei daülangpü vangpüshuwpü deih-ei dangteke.

⁷³ Büpai hamei bühipa Abraham kü lahpü:

⁷⁴ Hamei vepathülei lak kübü ham yanghen,

⁷⁵ hatü nyempü neshiüi daülangpü, hatü daülangshemshepü kü hamei nyihthü kemei büpa chongpho-aokhen.

⁷⁶ Hatü nüng keyü, ngelei hapeü, Chaipübalei thibü shei nyükhen; mehenangkü nüngi Shembüpa shekü büpa shing lem temnüng daihen,

⁷⁷ Jomei mang tükpü homei büpalei nanglakthü kü yemleipü nyinghühen,

⁷⁸ mehenangkü jenei Kahvangi phahji yahyangpü homei, ha homei vangsho leipü vanghe vangngai jen kü khanghen,

⁷⁹ shangmang hatü dipü vangdhüm kü nyupüthü kü vangngai shuohhen, hamei la chingmei lem kü mühen.

⁸⁰ Naü long, hatü laangha kü wong koh, hatü Israel kü shakei vamei huhen nyih mangngoi thahshi büpa jahpanei nyu.