LEVI 8 - DAÜLANGPÜ LAIHING (BSI)

Aaron hatü Chehathü Jepü

¹ Shembüpai Mosa kü,

² “Aaron hatü chehathü, owhiai, nyiohen mainga, mang moila shuohhen mohohbaong, mi cheha nyi, hatü daw neshihpü aan mühdow deikei,

³ hatü ashakshem shadenei khong kemei thaituh” shei eteke.

⁴ Shembüpai büpa kü epükei Mosai dük. Mechem khong kemei ashakshem shadenei thaijapa,

⁵ Mosai khong kü, “Shembüpai hapa dükhen shingvaishi epü khih” shei eteke.

⁶ Hahepak kü Mosai Aaron hatü chehathü shelei deiyei yung kü jom paühüteke.

⁷ Büpai Aaron kü hiupü bhagthuh hatü laklu bhagthuh thuhhü hatü shüng kü shüngshep shepshuohteke.

⁸ Büpai büpa kü jaküpnyiam yükshuoh, hatü ha kü Urim hatü Thummim shihteke.

⁹ Büpai shangshak shakshuoh, hatü hapa shelemei daülangpü hon-ow athen Shembüpai büpa kü epükei thenshuohteke.

¹⁰ Mosai nyiohen mainga yah, hatü haleipü lemphü dou kü mainga nyioei Shembüpa kü daühüteke.

¹¹ Büpai mainga hanei yah-ei moidü kü nyetpa hai, hatü moidü hatü haleipü dükhi-ümthü, hatü chilimji hatü hapa haüshing kü nyioei peü daühüteke.

¹² Büpai mainga hanei yah-ei Aaronei shangjing phuei daühü.

¹³ Hapheikü büpai Aaronei chehathü shelemei deiyei Shembüpai epükei jomphong kü bhagthuh thuhhü, shüngshep shephü, hatü shangshak shakshuohteke.

¹⁴ Hapheikü Mosai mang moila shuohhen mohohbaong müei deiyei Aaron hatü chehathüi hapalei shangjing kü jomei laki dükhü.

¹⁵ Mosai mohoh jü, hatü iy hanei yah-ei büpalei lakjaangi moidü daühen moidü leipü vaung kü nyioteke. Aopü iy kemei büpai moidü chongei lang; hapheikü büpai hapa daütük.

¹⁶ Mosai thenleimongphang kübü cheü, dhen kü jümpü cheü, hatü she nyiphen mü hapalei cheü kemei, hapalei shuw, phai hatü thenleimongphang kemei Shembüpai epükei baümtap haolei yah-ei daiyei jakteke.

¹⁷ Shejao hapa mohohbaong, hapalei shuw, phai hatü het peü Shembüpai Mosa kü epükei baümtap haolei yah-ei daiyei jakteke.

¹⁸ Shao büpai jakpü moila shuohhen mi chebaongha deiyei Aaron hatü chehathüi hapalei shangjing kü jomei laki dükhüteke,

¹⁹ hatü hapa jütü Mosai hapalei iy yah-ei moidü shinei haiteke.

²⁰ Büpai mi chebaongha khih mü deh, hatü shangjing, phailem hatü cheü aw kü jak.

²¹ Büpai thenleimongphang, hatü la yungi paü, hatü mi büm kemei Shembüpa kü moidülei vong meipü jakpü moila aw kü jakei Shembüpai Mosa kü epükei shuohteke.

²² Hapheikü büpai daühen hükpa mi chebaongha müei dei, hatü Aaron hatü chehathüi hapalei shangjing kü jomei laki dükhü,

²³ hatü hapa jü. Mosai haleipü iy hanei yah-ei Aaronei lakdahphi dhaongshü kü, hatü büpalei lakdahphi lakphiennyü kü, hatü büpalei ladahphi laphiennyü kü nyioteke.

²⁴ Hapheikü Aaronei chehathü shelemei müei dei, hatü Mosai jomei lakdahphi dhaongshü kü, hatü jomei lakdahphi lakphiennyü kü, hatü jomei ladahphi laphiennyü kü nyioteke; hatü Mosai aopü iy kemei moidü shinei haiteke.

²⁵ Büpai cheü, thenleimongphang kübü cheü, dhen kü jümpü cheü, she nyiphen mü haleipü cheü hatü shüngdahphi yahteke.

²⁶ Shembüpa kü shuohpü aan mühdow kübü daw neshihpü aan hük mainga shih-ei lingpü aan hük, hatü baünyangpü aan hük yah-ei cheü hatü shüngdah shangkü haüteke.

²⁷ Büpai hathü kemei Aaron hatü chehathülei lak kü haü, hatü jomi hapa Shembüpa kü hayaoha thintho vaishi shuoh.

²⁸ Hapheikü Mosai hathü jomei lak leipü yah-ei jakpü moila mü moidülei jak. Hapayü vong meipü dhüpü moila Shembüpa kü aw kü jakei shuohteke.

²⁹ Mosai amma yah-ei Shembüpa kü hayaoha thintho shuoh; hapa dhüpü mi moila kübü Mosalei hean nyu. Shembüpai epükei Mosai peü dük.

³⁰ Mosai mainga hanei hatü iy hanei moidü leipü yah, hatü Aaron hatü chehathülei owhiai kü hai. Hapakei büpai Aaron hatü chehathü hatü jomei owhiai kemei daütük.

³¹ Hapheikü Mosai Aaron hatü chehathü kü, “Ashakshem shadenei hapa phai cheütuh, hatü hayaoha dhüpü moila shihpü mühdow leipü aan mü ngei kü Shembüpai epükei Aaron hatü chehathüi hahtuh.

³² Aopeyü phai vaijao, aan vaijao jaktüktuh.

³³ Am dhüpü nyih manglom thahshi nyih nyet ashakshem shaden leipü nedaihen; mehenangkü am jehen nyih nyet yahkahen.

³⁴ Shinnyih mehe düktepa, hayü ammei mang tükhen nangkü Shembüpai epü nyüke.

³⁵ Am ashakshem shadenei nyihnüng yanüng shei nyih nyet nedai-i nyutuh, hatü am nedihen shingvaishi Shembüpai mehe enya ha düktuh; mehenangkü hayü ngei kü ephopeih” shei eteke.

³⁶ Aaron hatü chehathüi Mosa homei Shembüpai epükei lemphüli dük.