LEVI 7 - DAÜLANGPÜ LAIHING (BSI)

Pungpü Moila

¹ Hapayü pungpü moila nangkü shahkungnyü nyüke. Hapayü longi daülangpü nyüke.

² Hapa pungpü moilayü jakpü moila jüshingei jühen, hatü hapalei iy moidü shing peü lemei haihen.

³ Haleipü cheü hatü thenleimongphang kü jümpü cheü,

⁴ she nyiphen mü haleipü cheü hatü dhen kü shenpü cheü kemei yah-ei moidülei moilahen vongbong.

⁵ Ngongpai hathü cheü kemei yah-ei moidü shangei Shembüpa kü aw kü jakei moilahen. Hapayü pungpü moila nyüke.

⁶ Ngongpalei shem am bahathü peüi hapa hahhen aok, shejao hapayü daülangpü shingei hahhen; mehenangkü hapayü daülangpü nyüke.

⁷ Aihük shahkungnyüi mang moila hatü pungpü moila nyiphen kü nohen: Üpa ngongpai hapa moila shuohhen, büpai ha hahhen.

⁸ Jakpü moila shuohpü yemhalei shuwü üpa ngongpai hapa moila shuohnya, büpai yahhen.

⁹ Hahying moila oukpü, dük kü oukpü hatü shung kü ngoupü lemphü moila shuohpeyü ngongpalei vaihen.

¹⁰ Shejao lebü hahying moila mainga kü nyettü shuohpü nevaijü nenyetpü lemphü Aaronei chehathüi hükkei hanteihen.

Mongjempü Moila

¹¹ Hapayü shennyak hüki Shembüpa kü mongjempü moila shuohhen shahkungnyü nyüke.

¹² Büpai menvih shuoh-ei hapa moila shuohpü vaijema, büpai menvih shuohpü moila mü daw neshihpü aan mainga nyettü lingpü shuohtuh.

¹³ Ha mü lenei büpai daw shihtü oukpü aanao shuohhen.

¹⁴ Büpai moila shuohpü aan lem peü kübü aan hükbaong yah-ei Shembüpa kü thintho shuohhen; hapayü ngongpa üpai mongjempü moila iy yah-ei hainya, büpalei vaihen.

¹⁵ Hapa menvih shuohpü mongjempü moila kübü phaiyü moila shuohpü nyih-üng hahkemhen vongbong; büpai hapa nepphei thahshi aoei netuhhen vongbong.

¹⁶ Shennyak hanei-i büpai lahpü kü jiühüei nevaijü mongongpü moila shuohjema, hapayü büpai moilapü nyih hahhen, shejao aopü nyeipü neppheiyao hahhen.

¹⁷ Hapa moila kübü phai nyih jempabü thahshi aojema aw kü jaktükhen vongbong.

¹⁸ Mongjempü moila kübü phai aopü nyih jempabü thahshi hahjema, hapa moilayü neyahhen, nevaijü Kahvangi büpalei moila ie kü neshihhen, shejao nedaüpü vaihen; üpai hapa hahnya, büpayü pungpü vaihen.

¹⁹ Nedaünelangpü lemhük küüng hongtükpü phai nehahhen vongbong; hayü aw kü jaktükhen. Lebü phai nangkü, üami daülangi nyu, hathüi hapa hahhen aok.

²⁰ Shejao hanei nedaünelangi Shembüpa kü shuohpü mongjempü moila kübü hahjema, büpa laophülei nanglak khong kübü katitükhen.

²¹ Shennyak hanei-i hangku leipü nedaüpü vaituh, yemhimak leipü vaituh, nedaünelangpü lemhük kü-üng hongtü Shembüpa kü shuohpü mongjempü moila kübü phai hahjema, büpa laophülei nanglak khong kübü katitükhen.

Iy hatü Cheü Nehahhen

²² Shembüpai Mosa kü,

²³ “Israel am kü hei etuh shei eteke. Ammi mi, mohoh hatü yum cheü nehahhen.

²⁴ Dipü yemha nevaijü shahhishuwi jüpü yemhalei cheü ammi lebü nadang kü noteihen aok, shejao hapa nehahhen.

²⁵ Üpai Shembüpa kü jakpü moila shuohpü yem kübü cheü hahhenshang, büpa laophülei nanglak khong kübü katitükhen.

²⁶ Melei am nyuhenshang nyujao ammi ou hatü yemhalei iy nehahhen.

²⁷ Hanei-i iy hahjema, büpa laophülei nanglak kübü katitükhen.”

Ngongpalei Phaihan

²⁸ Shembüpai Mosa kü eteke,

²⁹ “Israel am kü etuh: Üpai Shembüpa kü mongjempü moila koei peihenshang, ha kübü hanei Shembüpa kü jakpü moila shuohtuh.

³⁰ Büpai laophülei laki-üng Shembüpa kü aw kü jakpü moila koei peihen; büpai hapa yemhalei cheü mü amma koei peiyei Shembüpa kü hayaoha thintho kei shuohtuh.

³¹ Ngongpai moidü shangei cheü jakhen; shejao ammayü Aaron hatü chehathü shing vaihen.

³² Ammei mongjempü moilalei yemha shüngdahphi ngongpa kü thintho shuohtuh.

³³ Aaronei cheha üpai mongjempü moilalei iy hatü cheü moila shuohnya, büpai büpalei phaihan yemhalei shüngdahphi yahhen.

³⁴ Yemhalei amma hatü hapalei shüngdahphiyü hayaoha thintho Shembüpai Israel nanglakthü kübü yah-ei ngongpathü kü shuohpü nyüke. Hapayü Israel ami ngongpathü kü hüdenhalenshi shuohhen phaihan nyüke.

³⁵ Jom ngongpathü vaihen jepü nyih mebü Aaron hatü chehathü kü Shembüpa kü jakpü moila shuohpü kübü hanshuohpü hean nyüke.

³⁶ Jom jepü nyih mebü Shembüpai hüdenhalenshi jom kü hapa hean düngei shuohhen Israel am kü shahkung shuohteke.

³⁷ Hathüyü jakpü moila, hahying moila, mang moila, pungpü moila, hayaoha jepü moila hatü mongjempü moila;

³⁸ Shembüpai Sinai Kahshangei Mosa homei Israel ami moila shuohhen shingvaishi Sinai jahpanei nyushi Shembüpai shuohpü shahkungnyü nyüke.”