LEVI 6 - DAÜLANGPÜ LAIHING (BSI)

¹ Shembüpai Mosa kü eteke:

² Shennyak hanei-i büpa kü büpalei chingyowi lemhük shuohpü nangkü, nevaijü büpai junghenlanghen shingvaishi lemhük shuohpü kü lueilemjema, nevaijü gühjema, nevaijü büpai hapa kü ühingei,

³ nevaijü büpai dou mahdaipü hanei dangei hapa nang shahshem eyei, nevaijü büpai shahshemi nedangangpih shei vangei, nevaijü shennyakthüi hapa homei mang thahhen mü büpai henüng mang Shembüpa tou kü thahjema, hatü hingnelemjema,

⁴ mechem büpai hapakei mang thah-ei punghen, büpai gühpü dou, nevaijü aetpü dou, nevaijü büpa kü junghenlanghen tuhpü dou, nevaijü mahdaipü dou büpai dangpü,

⁵ nevaijü mepa mepa dou büpai nedangangpih shei shahshemi vangnya, büpai hathü nyokei leishuohhen vongbong. Büpai pünyü mü phaihan kukha hapa kü ütü büpai büpalei mang moila kopü nyih shembü kü shemhen vongbong.

⁶ Büpai manglat vaishi ngongpa touei Shembüpa kü pungpü moila kawhikang neshiüpü mi nevaijü yum chebi hatü ha kü shangpü bhei koei peihen vongbong.

⁷ Hapa keiha ngongpai Shembüpa touei büpa shing jakpü moila shuohhen, hatü ha dükpai büpai pungpü mang kemei büpa kü tükhen.

Jakpü Moila

⁸ Shembüpai Mosa kü,

⁹ “Aaron hatü chehathü kü hapa shahkung yah-eishuoh” shei e: Hapayü jakpü moila nangkü shahkungnyü nyüke. Jakpü moilayü moidü awdepei yanüng vangnyak bah-ei nepnüng dhom thahshi anghen vongbong.

¹⁰ Ngongpai büpalei nyemin ow mü büm kü jümpü nyemin bhagthuh thuhtü moidü leipü jakpü moila awnih yah-ei moidü chongei haühen.

¹¹ Hapheikü büpai owhiai bhühtükhen, lebü ow owtü hapa awnih yah-ei baümtap haolei daülangpü shingei deilanghen.

¹² Moidülei düngei aw bah-ei anghen vongbong; ha mechemao nemettükhen vongbong. Nepjeih ngongpai ha kü pü jakhen hatü mongjempü moila cheü jakhen temhen.

¹³ Moidülei aw düngei nemettüki bah-ei anghen vongbong.

Hahying Moila

¹⁴ Hathü shahkungü hahying moila nangkü nyüke: Moidü touei Aaronei chehathüi Shembüpa touei koei peihen.

¹⁵ Ngongpai atta lakpaoh hük hatü mainga, ha mü hahying moila leipü ayingshü peü yahhen, hatü hapa kean yah-ei moidülei Shembüpa kü vong meipü moila jakhen.

¹⁶ Aaron hatü chehathüi aopü kemei hahhen, shejao hapayü daw neshih-i daülangpü shingei hahhen; jomi hapayü ashakshem chingshelei hahhen.

¹⁷ Hapayü daw shihtü neoukhen; ngei kü aw kü jakei shuohpü moila kübü jom shing hanpü phaihan nyüke. Mang moila hatü pungpü moila kei hapayü longi daülangpü nyüke.

¹⁸ Aaron kübü phaakpü baha peüi hapa hahhen aok. Ngoikahen hühiha denshem peü shingvaishi Shembüpa kü aw kü jakei shuohpü moila kübü büpalei phaihan düngeipü shing nyüke. Mepa mepai hapa kü honghenshang daülangi leidaihen.

¹⁹ Shembüpai Mosa kü eteke:

²⁰ “Hapayü Aaron thiteiphuei jepü nyih büpa hatü chehathüi Shembüpa kü koei peihen moila nyüke: Nyihjeih hahying moila shuohpü aimü atta dok hük, nepnüng dokbhao hatü om kü dokbhao shuohhen.

²¹ Hapayü meishi mainga mü nyettü aan oukpü dük kü ouktü meishi ngümtüktü Shembüpa kü vong meipü hahying moila kei shuohtuh.

²² Aaronei chehathü khong kübü büpa kü jeihen thiteiphuei jepü chehai hapa nemnohen. Hapayü Shembüpalei düngeipü phaihan hatü hapayü dhao mü jakhen vongbong.

²³ Ngongpa hükei hahying moilayü dhaomü jaktükhen vongbong; hapayü nehahhen.”

Mang Moila

²⁴ Shembüpai Mosa kü eteke,

²⁵ “Aaron hatü chehathü kü etuh: Hathüyü mang moila nangkü shahkungnyü nyüke. Mang moilayü Shembüpa touei metou shingkü jakpü moila jünya, hatouei jühen vongbong; hapayü longi daülangpü nyüke.

²⁶ Üpa ngongpai hapa mang moila shuohnya, büpai hapa hahhen; hapayü ashakshem chingshelei daülangpü shingei hahhen vongbong.

²⁷ Mepa mepai hapa phai kü honghen, daülangi leidaihen, hatü ashakviha kü hapalei iy phaatjema, hapayü daülangpü shingei dhohen vongbong.

²⁸ Phai cheüpü haümdükü bhaotükhen, shejao nyiamdük kü cheüpü vaijema hapayü yungi meishi thitei vaütükhen.

²⁹ Ngongpalei shem am baha peüi hapa hahhen aok; hapayü longi daülangpü nyüke.

³⁰ Shejao mang moila mepalei iy ashakshem mongei yah-ei shünya, hapayü nehahhen; hapayü aw kü jakhen vongbong.”