LEVI 4 - DAÜLANGPÜ LAIHING (BSI)

Mang Moila

¹ Shembüpai Mosa kü,

² “Mechem shennyak hanei-i nenyingi mang thahhen, hatü Shembüpalei shahkung kü nemongpü dou dükhen, hapakei düktuh shei Israel nanglakthü kü etuh” shei eteke.

Ngongpa Hükei Mang Moila

³ Thiteiphuei jepü ngongchongi mang thahjema, hatü hapai nanglakthü kü mang koei peijema, büpai thahpü mang shingvaishi Shembüpa kü meheyao kawhikang neshiüpü mohoh baongha yah-ei mang moila shuohtuh.

⁴ Büpai hapa mohoh ashakshem shadenei yah-ei peiyei Shembüpa kü shuohhen. Büpai hapalei shangjing kü büpalei laki dükhen hatü hapa Shembüpa tou kü jühen,

⁵ hatü thiteiphuei jepü ngongchongi hapa mohoh iy hanei yah-ei ashakshem mongei shühen.

⁶ Büpai hapa iy kü büpalei lakjaang hüngtü hapa hanei daülangpü shingei haenpü ashak touei Shembüpa tou mü nyetpa haihen.

⁷ Hapheikü ngongpai ashakshem mongei Shembüpa toueipü ayingshü jakpü moidü leipü vaung kü iy hanei nyiohen, hatü mohohlei iy aopü yah-ei büpai ashakshem shaden leipü moila jakpü moidü chongei langhen.

⁸ Büpai mang moila shuohpü mohoh kübü cheü kemei– thenleimongphang kü jümpü cheü hatü ha kü shenpü cheü kemei nyiukhen,

⁹ hatü she nyi mü haleipü cheü hatü dhen kübü cheü she mü omei,

¹⁰ mongjempü moila shuohpü kübü vetpükei vetei shuohhen, hatü ngongpai hathü jakpü moila jakpü moidü shangei jakhen.

¹¹ Shejao mohoh shuw hatü phai kemei, hapalei shangjing hatü lakhila, thenleimongphang hatü leihilang,

¹² mohoh kübü aopünyeipü peü büpai baümtap haolei daülangpü shing metouei awnih langnya, ha awnih shangkü pü bhaongpü shangkü yah-ei jakhen.

Israel Noknyülei Mang Moila

¹³ Israel noknyü kemei nenyingi mang thahjema, hatü Shembüpalei shahkung kü nemongpü lemhük dangkao dükjema, hatü jomi hapa nang meheyao nyingei nenyujao jomphongü mang nyüke.

¹⁴ Mechem jomi thahpü mang nyingei peihenshang khongi mang moila shuohhen mohohbaong hük ashakshemei yah-ei peihen vongbong.

¹⁵ Khong kü behethüi hapa mang moila shuohpü mohohlei shangjing kü jomei laki düktü Shembüpa tou kü ha jühen,

¹⁶ hatü thiteiphutükpü ngongchongi mohoh iy hanei yah-ei ashakshem mongei shühen.

¹⁷ Büpai hapa iy kü büpalei lakjaang hüngtü haenpü ashak tou mü Shembüpa touei nyetpa haihen.

¹⁸ Büpai ashakshem mongei Shembüpa tou kü haüpü moidü leipü vaung kü iy hanei nyiohen. Aopü iy yah-ei büpai ashakshem shaden toueipü jakpü moila jakteipü moidü chongei langhen.

¹⁹ Büpai haleipü cheü kemei yah-ei moidülei jakhen,

²⁰ hatü büpai mang moila shuohpü mohoh kü nemnopükei büpai hapa mohoh-ao nemnohen. Hapa keiha ngongpai jomei mang shingvaishi moila shuohhen, hatü jomei mang tüktükhen,

²¹ hatü büpai mohoh-ü baümtap haolei yah-ei daiyei shongpü mohoh jakpükei jakhen. Hapayü khong shingvaishi mang moila nyüke.

Vanglem lembü Hükei Mang Moila

²² Mechem vanglem lembü hüki nenyingi mang thahhen, hatü Shembüpa, büpalei Kahvangei shahkung kü nemongpü lemhük dangkao dükhenshang, büpayü mang nyüke.

²³ Mechem büpai thahpü mang büpai nyingei peihenshang, büpai büpalei mang moila shuohhen kawhikang neshiüpü yum chebaong yah-ei peihen vongbong.

²⁴ Büpai yum chebaongei shangjing kü büpalei laki dükhen hatü Shembüpa kü metouei jakpü moila jünya, hatouei hapa jühen. Hapayü mang moila nyüke.

²⁵ Ngongpai büpalei lakjaangi mang moila kübü iy hanei yah-ei jakpü moila shuohpü moidü leipü vaung kü nyiohen, hatü aopü iy kemei moidü chongei langhen.

²⁶ Büpai mongjempü moila kübü cheü jakpükei moidü shangkü cheü kemei jakhen. Hapa keiha ngongpai vanglem lembülei mang shingvaishi moila shuohhen, hatü büpalei mang tükhen.

Nanglak Hükei Mang Moila

²⁷ Khong kübü nanglak hüki nenyingi mang thahjema, hatü Shembüpalei shahkung kü nemongpü lemhük dangkao dükjema, büpayü mang nyüke.

²⁸ Mechem büpai thahpü mang büpai nyingei peihenshang, büpai büpalei mang shingvaishi kawhikang neshiüpü yum chebi hük moila koei peihen vongbong.

²⁹ Büpai hapa mang moila shuohpü yum shangjing kü büpalei laki dükhen, hatü hapa jakpü moila shuohpü shingei jühen.

³⁰ Hapheikü ngongpai büpalei lakjaangi hapa mang moila iy hanei yah-ei jakpü shuohteipü moidü leipü vaung kü nyiohen, hatü aopü iy kemei moidü chongei langhen.

³¹ Büpai mongjempü moila kübü cheü nyiukpükei haleipü cheü kemei nyiukhen, hatü ngongpai hapa moidü shangei Shembüpa kü vong meipü moila jakhen. Hapakei ngongpai büpa shingvaishi mang moila shuohhen, hatü büpalei mang tükhen.

³² Büpai laophülei mang moila mi cheha yah-ei peijema, hayü kawhikang neshiüpü mi chebiha vaihen vongbong.

³³ Büpai mi shangjing kü büpalei laki dükhen, hatü Shembüpa tou kü metouei jakpü moila jünya, hatouei jühen.

³⁴ Hapheikü ngongpai büpalei lakjaangi hapa mang moila iy hanei yah-ei jakpü moila shuohpü moidü leipü vaung kü nyiohen, hatü aopü iy kemei moidü chongei langhen.

³⁵ Büpai mongjempü mi moila kübü cheü nyiukpükei haleipü cheü kemei nyiukhen, hatü ngongpai hapayü moidü shangei Shembüpa kü aw kü jakpü hahying moila shangkü jakhen. Hapakei ngongpai hapa nanglaki thahpü mang shingvaishi moila shuohhen, hatü büpalei mang tükhen.