LEVI 25 - DAÜLANGPÜ LAIHING (BSI)

Sabbath Bong

¹ Shembüpai Sinai Kahshangei Mosa kü,

² “Israel am kü hapakei etuh” shei e. Ngei am kü shuohhen kahdokei mechem shühenshang, kahdokiyao Shembüpa kü Sabbath nyih themhen.

³ Vangbong vok thahshi kah kü sheileililahen, nyalingngupai kaohilak dakhen, hatü betjükvungjük vaümhen.

⁴ Shejao vangbong nyetpabü kü kahdokiyao Shembüpa kü Sabbath themei nyiumeihen. Hapa vangbong kah kü sheili nesheihen nevaijü nyalingngupai kaohilak nedakhen.

⁵ Nyingnying longei jükpü betjük nevaijü ammi nesheipü nyalingngupai meheyao tevaüm. Hapayü kahdok kü vangbong hük nyiushemmei shuohpü nyüke.

⁶ Kah nelingjao Sabbath bong kahdoki mepa mepa jükhühen, hapayü am, ammei aathü, amei nang shanpüthü, am mü lakeiloiyei nyupüthü,

⁷ ammei haümyemthü hatü phaüyemthü shingvaishi hahying chongkahen. Kahdoki mepa vamhühen ha hahhen aok.

Jubilee Bong

⁸ Sabbath bongthü shing nyet ittuh-Sabbath bongthü nyet nyet shing nyet peü shepjü bong pinyipüshü vamkahen.

⁹ Hatü lenyang nyetpabü nyih anpabü kü shing peülei amit wongmü vüngtuh; mang tükpü moila shuohpü nyih kü ammei kahdok kempülei amit vüngtuh.

¹⁰ Hapakei ammi bong pinyipüanpabü daüeilangei kahmük kü nyupü am peü kü bümei baongtuh. Hapayü am shingvaishi mongongmonglepü hepak nyukahen; hapa bong kü yutükpü douthü kemei shongpü shembü kü nyokei leishuohhen, hatü aa vaishi yutükpü shennyak laophülei shemei nyokei leidaihen.

¹¹ Hapa pinyipüanpabü vangbongü am shingvaishi mongongmonglepü nyukahen; ammi kah kü sheili nesheihen, nevaijü nyingnying longei jükpü betjük nevaijü ammi nesheipü nyalingngupai betjük nevaümhen.

¹² Mehenangkü hapa vangbongü am shingvaishi mongongmonglepü hatü daülangpü nyüke; mehe kah kübü vam hapa mon hahhen.

¹³ Hapa mongong monglepü bong kü yutükpü douthü kemei shongpü shembü kü nyokei leishihhen.

¹⁴ Nüngi jempü Israel bühü shennyak kü lemhük yujema nevaijü shakjema, am hüki hük kü telutelemtei.

¹⁵ Mechem nüngi küphü hük leipü kahdok shakhenshang, shakpü dou leiteihen vangbong lomhen ittü mon lop shuohhen, hatü yupü shennyakiyao vangbong meshük sheili sheiyei hahaokhen ittü mon lop yühen.

¹⁶ Bong longi shingvaishi yujema lop nyeishi yühen, bong maani shing yujema lop komshi yühen; mehenangkü mepa büpai nüng kü yunya, hayü bong meshük sheili sheiyei hahaokhen hapa heshap kü nyüke.

¹⁷ Am hüki hük kü telutelemtei shejao ammei Kahvang kü nyemtuh; mehenangkü ngeiyü Shembüpa; ammei Kahvang.

¹⁸ Am kahdok kü nyiushemmei kü nyuhen shingvaishi ngei am kü shuohpü shahkungnyüthü kü kenhingei mütuh.

¹⁹ Kahdoki hapalei betjük jükhühen, hatü am shümoh meiyei hahhen hatü nyiushem kü nyuhen.

²⁰ Ammi, “Kah neling, hah nevetjema bong nyetpabü kü hami mehe hahhenang?” shei phehen aok.

²¹ Bong nyi jem thahshi changshi hahhen mü kahdoki betjük jükhühen; vangbong vokpabü kü ngei moihiman shomphahen.

²² Mechem ammi vangbong shetpabü kü sheili sheihenshang, shongei vetpü hah hahshi nyuhen, hatü hapa kah bang aongpü hepak thahshi changshi nyuhen.

Douhinang Nyokei Leiteihen Nang

²³ Ammi kahdok vang mü teyutük; mehenangkü hapayü ammei lompü nevai; ngelei, hatü amphongü halei yen kei lakeiloiyei nyupü am kei nyüke.

²⁴ Mechem kahdok yuhenshang, shongpü shembüi nyipabü shakei leilanghen vanglem nyüpeih shei nyinghen vongbong.

²⁵ Israel shennyak hüki longi taoei büpalei dounyü hanei yutükjema, büpalei shem ami hapa angei leihen vongbong.

²⁶ Hapakei angei leihen shem am neshüpü shennyaki pheilei angeideiyei hapa leihen mü büpa shemmei leihen aok.

²⁷ Büpai hapa yutükpü vangbong kübü bhei ithen, hatü büpai yushuohpü shennyak kü aopü lop shemshuohhen vongbong, hatü dou payü büpalei vailanghen.

²⁸ Shejao hapa angei leilanghen mü büpa lop neshüjema, hapa dou nyokei leiteihen vangbong mangngoi thahshi shakhahpü shennyakei lakei nyuhen. Hapa jubilee bong kü shongpü shembü kü nyokei leishihtükhen.

²⁹ Shennyak hüki chingnyü pemong leipü shem hük yujema, hapa yupü pheikü vangbong hük mong aa kü angei leihen aok. Hapa hepak kü mon angei leihen aok.

³⁰ Vangbong hük peihpü thahshi ha angei neleiaokjema, hapa chingnyü pemong leipü shemü shakpü shennyaki hüdenhalenshi lomlanghen. Hapa jubilee hepak kü neleiteihen.

³¹ Shejao chingnyü pemong hao leipü chingthü leipü shemthüyü pehao heshap vaihen. Hathüyü shongpü shembüi angei leiaokhen hatü hathüyü jubilee hepak kü leiteihen.

³² Levi amei chingnyüthü kübü shemthüyü jomi angei leihen jiüpü nyüke.

³³ Jomei chingthü khongkü hük kübü shem Levi ami yutükjema hatü hapa angei neleiaokjema, hapayü jubilee vangbong kü nyokei leishuohhen vongbong; mehenangkü Israel nanglakthü khong kao Levi amei chingnyüthü kübü shemthüyü denden shingvaishi jomei lompü nyüke.

³⁴ Shejao jomei chingnyüthü kü shinpü kahdok neyuhen; mehenangkü hapayü düngei jomei mükjüp nyüke.

Taopa kü Lop Lushuohpü

³⁵ Jempü Israel shennyak taoei laophü nyingi nesheüh-aoki leijema, benha kü kei am mü nyuhen shingvaishi lakeiloiyei nyuhen nyushing yah-eishuoh.

³⁶ Nüngi büpa kü lop lushuohjü lop kü lop bhüei shemhen mü telushuoh, shejao Kahvang kü nyemtuh, hatü büpa am mü nyuhütuh.

³⁷ Nüngi büpa kü lop kü lop bhüei shemhen mü telushuoh; nevaijü nüngi nanglei danghen kü büpa kü hahying te-üh.

³⁸ Am kü hapa Kanan kahdok shuohhen, hatü ngei ammei Kahvang vaihen shingvaishi ngei am Ijip leipü müei leipü Shembüpa, ngeiyü ammei Kahvang.

³⁹ Am mü nyupü jempü Israel shennyak hük longi taoei büpa nyingi am kü aa kei yuphüjema, ammi büpa aa kei dou tedükhü.

⁴⁰ Büpa nüng mü nanglat shapü am kei tuhtuh, hatü jubilee vangbong mangngoi thahshi nüng chongphohen.

⁴¹ Büpa hatü chehathü aa laphen kübü bümei leihen, hatü büpa laophülei mükhiphang yemei leihen, hatü chebü chepalei mükjüp yahhen.

⁴² Mehenangkü Israel amü ngei Ijip leipü müei leipü ngei chongphopüthü nyüke. Jomü aa leshi nenyuhen.

⁴³ Ami jom kü nemei-i teno, shejao ammei Kahvang kü nyemtuh.

⁴⁴ Ammi aa najema, am ngeihpü shonpü jatthü kübü shakhen aok. Ammei kahdokei nyupü hapa keipü hapeüthü hatü jomi büh-ei paümpü hapeüthü ammei aa vaihen aok.

⁴⁵ Ammi am mü chemi ammei kahdokei nyudaipü kung shennyakthü aa vaishi shaknüng aok, hatü jomü ammei mükjüp vaihen.

⁴⁶ Nüng pheikü nüngei hapeüthü shingvaishi jomphongü aa leshi tuhhen aok. Hathü kü aa kei nohen aok, shejao jempü Israel shennyakthü shak kü üpaiyao nemei-i vanglem lemhen neaok.

⁴⁷ Am mü nyupü benha hük shemmei leijema, hatü jempü Israel shennyak hük am mü nyupü benhapa kü aa leshi büpa nyingi yujema, nevaijü jomei shem am kü yujema,

⁴⁸ büpa laophü nyingi yutük pheikao büpa angei leihen jiüpü nyüpeih. Büpalei shem am hanei-i büpa angei leihen aok.

⁴⁹ Büpalei chepa ami nevaijü iy hük phai hük kübü jeihinaüthüi büpa angei leihen aok. Büpa shemmei leijema büpa nyingi angei leihenaok.

⁵⁰ Büpa hatü büpa shakpü shennyak nyi-i büpa laophü nyingi yutükpü hepak kübü jubilee bong thahshi ithen. Büpa leihen shingvaishi bheiyü nanglat shapü shennyakei lat aimü büpa laophü nyingi yutükpü kübü leihen bong thahshi ittü shuohhen.

⁵¹ Bong longi aoei nyujema, büpa angei leihen shingvaishi büpa shakhen shuohpü bhei longshishing shemhen vongbong.

⁵² Jubilee ngoishekü bong maani mon nyujema, aopü bongthü aimü ittü lop shuohtü büpa laophü nyingi angei leihen.

⁵³ Vangbong ieyei dou dükhen shingvaishi nang shakpü shennyak kü nopükei nohen; shembüi büpa kü nemei-i nenohen nüngi veituh.

⁵⁴ Büpa mepa lemeiyao neleiaokjema, büpa hatü chehathü peü hapa jubilee bong laiyei bümei leihühen.

⁵⁵ Israel am den kü mih-ei aa neleihühen; mehenangkü Israel nanglakthü ngelei aathü, ngei Ijip kahdok leipü müei leipeih. Ngeiyü Shembüpa, ammei Kahvang.