LEVI 21 - DAÜLANGPÜ LAIHING (BSI)

Ngongpathü Daühenlanghen Nang

¹ Shembüpai Mosa kü eteke,

² “Aaronei cheha ngongpathü kü hapakei eyeishuoh: Üpa ngongpaiyao longi yopü shem am– laophülei nyü, pa, laophülei yeshang nevaijü yiükha, jeihinaü,

³ nevaijü baha neshiüpü büpa kü mongnyangshi nyupü nela nevaipheikü lebü nanglak khong kübü dipü mahng kü ompai nedaünelangi neleihen vongbong.

⁴ Shaonghinang lemei shenteipü shem am mahng kü ompai büpa nyingi nedaüpü neleihen vongbong.”

⁵ Üpa ngongpaiyao sho nejaphen nevaijü jumum nekuphen nevaijü büm kü kaw neshahen.

⁶ Jomphongü jomei Kahvang kü daülangi nyuhen hatü jomei Kahvangei men netenhen vongbong. Mehenangkü jomi Shembüpa, jomei Kahvang kü aw kü jakei moila shuohnyüke; jom daülangi nyuhen vongbong.

⁷ Jomi büm yuei longteipü nyühathü mü nevaijü baha tuhtü yandaipü nyühathü mü shem neyemhen; mehenangkü ngongpathüyü jomei Kahvang kü daülangi nyuhen vongbong.

⁸ Jomphongü daülangpü shei peüi ieyeilemhen; mehenangkü jomi ammei Kahvang kü hahying moila shuohnyüke. Jomphongü daülangpü shei deihtuh; mehenangkü Shembüpa ngeiyü daülangpü, hatü ngei am daülangi lingpeih.

⁹ Ngongpalei yiükha hük büm yuei nedaünelangi leijema, pinnyüi chepa veühüteke; pinnyü-ü aw kü jaktükhen.

¹⁰ Jom jeihinaüthü khongkü üpa kü ngongchong vaihen shingvaishi shangjing kü mainga phuei, hatü ngong-ow owhen jetepa, büpa mongshangpü huhen shingvaishi sho nehai-i nenyuhen nevaijü büpalei ashakviha neshaakhen vongbong.

¹¹ Büpa mahng shemei neshühen vongbong. Laophülei nyümahng pamahng kü dangkao peiyei büpa nedaünelangi neleihen vongbong.

¹² Kahvangei daülangpü shing tuhphongtü daipai hapa shing nenyethen; mehenangkü büpa Kahvangei mainga phuei daühüpeih. Ngeiyü Shembüpa.

¹³ Büpai pai mü ngühpü nela mü mon shem yemhen.

¹⁴ Büpai vaümnyü mü, lebü baha mü yandaipü nyüha nevaijü büm yuei tendaipü nyüha mü shem neyemhen, shejao laophülei nanglak khong kübü pai mü ngühpü nela mü shem yemhen,

¹⁵ Hapa keiha büpai laophülei nanglak khong kü büpalei lihila nesheihhen.

¹⁶ Shembüpai Mosa kü eteke,

¹⁷ “Aaron kü ha etuh: Hüdenhalenshi nüngei hühiha üpa kü eela kohhen, büpa Kahvang kü hahying moila shuohnüng yopailei neheihhen.

¹⁸ Shennyak üpa vaihen vaijao eela shadaipü, mükphüngdaipü, la khopü, dhe mangdaipü, lakhila wong nekohpü,

¹⁹ lakholanopü shennyak,

²⁰ dok kuhdaipü, khangdaipü, mük mangdaipü, ngühma kohpü, jüklük kohpü nevaijü ban tüktükpü hathüi yopailei neheihhen vongbong.

²¹ Ngongpa Aaronei hühihathü üpa kü eela shadai, hapa shennyaki Shembüpa kü aw kü jakpü moila shuohhen yopailei neheihhen. Büpayü eela shadaipü nangkü büpalei Kahvang kü hahying moila shuohhen yopailei neheihhen.

²² Hapa shennyaki Kahvangei daülangpü hahying hatü Longi Daülangpü hahying hahhen aok,

²³ shejao büpa kü eela shadaipü nangkü ngelei daülangpü shing nyetei haenpü ashak nevaijü moidü yopailei neheihkahen; mehenangkü ngeiyü jom daühüpü Shembüpa.”

²⁴ Hapakei Mosai Aaron hatü chehathü hatü Israel nanglakthü peü kü eteke.