LEVI 20 - DAÜLANGPÜ LAIHING (BSI)

Ven Nedanpü Hanghi

¹ Shembüpai Mosa kü eteke,

² “Israel am kü hapa etuh: Israel am vaijao benha vaijao Israel kü nyupü üpai laophülei hapeü Molekh kahvang kü shuohhenshang, hapa shennyakü khongi yaongi shükei jütükhen.

³ Ngei hapa shennyak khüei yaonghen, hatü ngei büpa laophülei nanglak kübü katitükhen; mehenangkü büpalei hapeü Molekh kahvang kü shuohpai ngelei daülangpü shing nyettükteke, hatü ngelei daülangpü men tentükteke.

⁴ Mechem hapa shennyaki laophülei hapeü Molekh kahvang kü shuohhen, hatü nanglak khongi hapa hei-üng tuh-ei büpa nejütükjema,

⁵ ngei büpa hatü jom shem khüei yaonghen, hatü laophülei nanglak khong kübü büpa hatü büpa phei müei Molekh kü khümpüthü kemei jütükhen.”

⁶ Shennyak hanei-i yimpi laang mü shah eteipüthü nevaijü lashüh tetpüthü lemei daijema, ngei büpa laophülei nanglak khong kübü katitükhen.

⁷ Hanangkü am nyingi daütuh, hatü daülangi nyutuh; mehenangkü ngeiyü Shembüpa, ammei Kahvang.

⁸ Ngelei shahkungnyüthü noteituh, hatü ha phei mütuh. Ngeiyü am daühüpü Shembüpa.

⁹ Shennyak hanei-i laophülei nyühipa kü thaüvaüjema, hapa shennyak jütükhen, hatü büpalei iy büpa shak kü nyuhen.

¹⁰ Shennyak hanei-i laophülei chingyowpalei nyüha mü mükbongjuyungjema, jijiphen jütükhen.

¹¹ Shennyak hanei-i laophülei palei nyüha mü mükbongjuyungjema, chepa veühüteke. Jijiphen jütükhen, hatü jijilei iy jiji shak kü nyuhen.

¹² Shennyak hanei-i laophülei hapeülei nyüha mü mükbongjuyungjema, jijiphen jütükhen, hatü jijilei iy jiji shak kü nyuhen.

¹³ Baha hüki baha hük mü nyüha mü kei jemteijema, jijinyi-i jiühitbenüng dükteke. Jiji nyiphen jütükhen, hatü jijilei iy jiji shak kü nyuhen.

¹⁴ Shennyak hüki nyühiha nyi mü shem yemjema, hayü jiühitnalaipü dou nyüke. Am khong mü henüng douten nenyuhen shangmü jom jemphen aw kü jaktükhen.

¹⁵ Baha hanei-i yemhimak mü mükbongjuyungjema, büpa hatü yemha nyiphen jütükhen.

¹⁶ Nyüha hanei-i yemhimak mü mükbongjuyungjema, nyühanyü hatü yemha nyiphen jütükhen. Jomei iy jom shak kü nyuhen.

¹⁷ Shennyak hanei-i laophülei nyahinaü nyü mü nevaijü pa mü jempü yiükha mü shem yemjema, hayü jiühitnalaipü dou nyüke, hatü jijinyi laophülei nanglak khong kübü katitükhen. Büpai nyahinaü mü mükbongjuyungjema, büpai hanghi danghen.

¹⁸ Baha hüki nyüha hük hangha tenpü hepak kü jemei pinnyü mü mükbongjuyungjema, jiji nyiphen laophülei nanglak khong kübü katitükhen.

¹⁹ Shennyak hanei-i nyü mü nevaijü pa mü jempü nyahinaü mü mükbongjuyungjema, hapai shem am veü danghüteke; jiji nyiphen hapa nangkü hanghi ponghen.

²⁰ Shennyak hanei-i laophülei pa naü-eepalei nyüha mü mükbongjuyungjema, büpai pa naü-eepa veühüteke; jijiyü hapeü neshiüi dihen.

²¹ Shennyak hanei-i laophülei jeihinaülei nyüha mü shem yemjema, hapayü jiühitnalaipü dou dükteke, hatü jeihinaü veühüteke. Jiji hapeü neshiüi nyuhen.

²² Ngei am müei leihen kahdok kübü am nechangtükhen shingvaishi ngelei shahkungthü düktuh, hatü ngei epü kü mütuh.

²³ Ngei am toueipü changtükpü jatthülei dükhiling vanglem kü temü; mehenangkü jomi hathü kemei dükpü nangkü ngei jom yaktükpeih.

²⁴ Shejao ngei am kü eshah, “Ammi hapa kahdok yahhen; ngei am kü amma hatü nyahjiü yenpü kahdok am kü mükjüp vaishi shuohhen. Ngeiyü Shembüpa, ammei Kahvang, hatü ngei lebü jatthü mü am hayaoha loukei jepeih.”

²⁵ Hanangkü ammi daülangpü hatü nedaünelangpü yemhimak hatü ouhiyüh baong hanhen vongbong. Ngei am kü nedaü shei epü yemhimak nevaijü ouhiyüh nevaijü kahdokei kamteipü yemlem mepa homeiyao am tenyethü.

²⁶ Am ngei touei daülangi nyuhen vongbong; mehenangkü ngeiyü daülangpü Shembüpa, hatü ngelei lompü vaihen ngei am lebü jatthü mü hayaoha jepeih.

²⁷ Nyüha vaijao baha vaijao am khong mü lashüh tetpü nevaijü yimpi laang mü shah eteipü nyujema, hapa shennyak yaongi shükei jütükhen; jomei iy jom shak kü nyuhen.