LEVI 2 - DAÜLANGPÜ LAIHING (BSI)

Hahying Moila

¹ Mechem shennyak hanei-i Shembüpa kü hahying moila shuohhen, hapa moilayü meipü atta aanthüng shuohhen vongbong; büpai ha kü olive mainga hatü ayingshü shihhen vongbong,

² hatü ha Aaronei cheha ngongpathü touei yah-ei deituh. Haleipü meipü aanthüng hatü mainga lakpaoh hük hatü ha mü ayingshü kemei yah-ei ngongpai moidülei hapa meivaüm deih-ei danghen shingvaishi kakhen; hapayü Shembüpa kü vong meipü aw kü jakpü moila nyüke.

³ Moila shuohtü aopü hahying kemei Aaron hatü chehathü shing vaihen; hapayü Shembüpa kü aw kü jakpü peü mü daülangpü vong meipü moila nyüke.

⁴ Mechem nüngi hahying moila aandük hük oukeitüktü shuohhenshang, hapayü meipü aanthüng daw neshih-i mainga mü nyettü nevaijü daw neshihpü aanbhaok kü mainga nyiotü shuohhen vongbong.

⁵ Nüngei moilayü aan oukpü dük kü oukpü hahying moila vaijema, hapayü meipü atta olive mainga kü nyetpü daw neshihpü vaihen vongbong.

⁶ Hapa khih mü nihtuh, hatü ha kü mainga langtuh; hapayü hahying moila nyüke.

⁷ Nüngei moilayü aan ngoupü shung kü ngoupü vaijema, hapayü atta hatü olive maingai lingpü vaihen vongbong.

⁸ Hapakei tempü hahying moila nüngi Shembüpa touei deiyei ngongpa kü shuohtuh; büpai hapa moidü touei yah-ei deihen.

⁹ Ngongpai hapa hahying moila kübü meivaüm yahei moidü shangei aw kü jakhen. Hapayü Shembüpa kü vong meipü aw kü jakpü moila nyüke.

¹⁰ Hahying moila aopü kemei ngongpathü shing vaihen; hapayü longi daülangpü nyüke; mehenangkü hayü Shembüpa kü shuohpü hahying moila kübü yahpü nyüke.

¹¹ Ammi Shembüpa kü shuohpü hahying moila mepayao daw shihtü teling; Shembüpa kü shuohpü hahying kü daw nevaijü nyahjiü meheyao neshihhen vongbong.

¹² Ammi hathüyü Shembüpa kü ammei lak kübü vampü meipü moila kohen aok, shejao hapayü moidü shangkü vong meipü moila kei jakei neshuohhen.

¹³ Hahying moila lemphüli kü hüm shihtuh; mehenangkü hüm homei am hatü Kahvang aa kü vangteishuwteipü nyangeihepü nyüke; ammei moila peü kü hüm shihtuh.

¹⁴ Ammi hahying moila shongpü betjük Shembüpa kü kojema, aw kü shoukei nevaijü ngümtükpü hahying moila shuohtuh.

¹⁵ Ha shangkü olive mainga hatü ayingshü shihtuh.

¹⁶ Ngongpai haleipü ngümtükpü hahying hatü mainga hatü ayingshü hanei yah-ei kean vaishi aw kü jakhen; hapayü Shembüpa kü vong meipü aw kü jakpü moila nyüke.