LEVI 17 - DAÜLANGPÜ LAIHING (BSI)

Jakpü Moila Nangkü Shahkung

¹ Shembüpai Mosa kü eteke,

² “Aaron hatü chehathü hatü Israel am peü kü hapa etuh: Shembüpai hapakei enyüke.

³ Israel shennyak hanei ami mohoh, mi nevaijü yum yah-ei Shembüpa kü moila shuohhen ashakshem shadenei koei nepei-i baümtap mongei nevaijü haolei jüjema,

⁴ büpa iythüng anpü nangkü büpa shahkung kü pungteke; hanangkü büpa nanglakthü khong kübü katitükhen.

⁵ Hapayü Israel ami koshoya kü moila shuohteipü shaangü Shembüpa touei koei peihen shingvaishi nyüke. Jomphongi hathüyü ashakshemei Shembüpa kü mongjempü moila shuohhen.

⁶ Ngongpai hapa iy ashakshem shadenei moidü shinei haihen, hatü hapalei cheü Shembüpa kü vong meipü moila aw kü jakei shuohhen.

⁷ Jomphongi hajük kü yum lajei kü yem jüei moila shuoh-ei mang dou nedükhen. Hapayü jom shingvaishi hüdenhalenshi noteihen shahkungnyü nyüke.”

⁸ Nedoh-i jomphong kü hapakei etuh: Israel am nevaijü jom mü nyupü benha üpai Shembüpa kü jakpü moila nevaijü lebü moila shuohhenshang,

⁹ ashakshem shadenei Shembüpa kü moilahen koei nepeijema, hapa shennyakü laophülei nanglak khong kübü katitükhen.

Iy Nehahhen Khüampü

¹⁰ Israel shennyak hanei-i nevaijü jom mü lakeiloipü benha hanei iy hahjema, ngei hapa iy hahpü shennyak khüei yaonghen, hatü hapa shennyak nanglak khong kübü katitükhen.

¹¹ Mehenangkü yangnyu hük yemmü nyuhenü iy kü nyüpeih, hatü ha vaipü nangkü ngei am shingvaishi moidülei moilahen hayü shuohpeih; hapayü yangnyu hükei mang tükhen iy nyüke.

¹² Hanangkü ngei Israel am kü enyüpeih, “Amphong üpaiyao nevaijü am mü lakeiloipü benha üpaiyao iy nehahhen.”

¹³ Israel am nevaijü am mü lakeiloipü benha hanei-i daülangpü yem nevaijü ouhiyüh hanei jüjema, büpai hapa iy kahdokei heentükhen hatü kahdoki lintükhen.

¹⁴ Mehenangkü lemphü yemhimak yemmü nyuhen shingvaishi hapalei iyü hapalei yangnyu yem nyüke. Hanangkü ngei Israel am kü mepa yemhalei iyao tehah; mehenangkü lemphü yemhimak yemmü nyuhenü hapalei iy kü nyüpeih shei eteke; üpai ha hahhen, büpa nanglak khong kübü katitükhen.

¹⁵ Bühü vaijao benha vaijao üpai yemha mahng dangpü nevaijü shahhishuwi hahpü yemha mahng hahhenshang büpai laophülei ashakviha dhotükhen, hatü hangha laktükhen, hatü büpa om dhüshi nedaüpü leihen; hapheikü büpa daütükhen.

¹⁶ Shejao jomphongi ashakviha nedho hatü hangha nelakjema, jom pungpü jom shangkü nyuhen.