LEVI 11 - DAÜLANGPÜ LAIHING (BSI)

Daüpü hatü Nedaüpü Hahying

¹ Shembüpai Mosa hatü Aaron nyi kü,

² “Israel am kü hapakei eyeishuoh shei e: Kahdok shak kü nyupü yem khongkü ammi hahhen yem hathü nyüke.

³ Mehe yem vaihenshang dhaok phaakpü hatü hetlei shaipü yem peü hahhen aok.

⁴ Shejao dhaok phaaktü hetlei shailangmao hathü yem ammi nehahhen: Uti hetlei shailangmao dhaok nephaaki nyüke; hapayü am shingvaishi nedaüpü yem.

⁵ Yüphüh-i hetlei shailangmao dhaok nephaaki nyüke; hapayü am shingvaishi nedaüpü yem.

⁶ Yüphüh shola-i hetlei shailangmao dhaok nephaaki nyüke; hapayü am shingvaishi nedaüpü yem.

⁷ Ook kü dhaok phaakshi nyulangmao hetlei neshainyu; hapayü am shingvaishi nedaüpü yem.

⁸ Ammi hathü kü mahng kao nehonghen; hathüyü am shingvaishi nedaüpü nyüke.”

⁹ Yungchingei vaituh, shohalei vaituh, yung mongei nyupü yem mepa kü kaok hatü ka nyu, ha ammi hahhen aok.

¹⁰ Shejao yungching nevaijü shohalei nyupü yem peü khongkü kamei daipü yem vaijao hatü yung mongei nyupü yem vaijao kaok hatü ka neshiüpü peü am shingvaishi jiühitnalaipü yemthü nyüke.

¹¹ Am shingvaishi hathüyü nedaüpü vaipü nangkü ammi hathü nehahhen, hatü hathü mahng kao nehonghen.

¹² Kaok hatü ka neshiüpü yungmong yem kemei am shingvaishi jiühitbenüng nyüke.

¹³ Ouhiyüh khongkü ammi hathü nehahhen; mehenangkü hathüyü am shingvaishi jiühitbenüng nyüke: alanglangha, yung alang,

¹⁴ langnyak, langshopong,

¹⁵ asha lem laolao,

¹⁶ ostrikh ou, nyak ou, yungnyü alang, ookpaüm alang,

¹⁷ lai-ou, ashühlaongkaong, shüptelü, bhihnyui ashühlaongkaong,

¹⁸ nyahhah alang, langda,

¹⁹ angüp, petaak, yungou lalu, abak.

²⁰ Yang kohpü yemhamakha la ali kohtü kampü peü am shingvaishi jiühitbenüng nyüke.

²¹ Shejao yang kohtü la ali-i kampü yemhamakha hanei ammi hahhen aok: hathüyü phaukhen shingvaishi laongkaong kohpüthü nyüke.

²² Hathü yemhamakha khongkü ammi shoukhanbaong, lunglang, shoukshah hatü henüngli lem laolao nevaijü kanibaong hatü henüngli lem peü hahhen aok.

²³ Shejao yang kohtü la ali nyupü lebü yemhamakhathü peü am shingvaishi jiühitbenüng nyüke.

Nedaüpü Yemthü

²⁴ Üami hathü yemha mahng kü honghenshang, ha ya om dhüshi nedaüpü leihen.

²⁵ Üami hathü yemha mahng hük dangkao homei yahhenshang, büpai laophülei ashakviha dhotükhen vongbong, hatü büpa ha ya om dhüshi nedaüpü leihen.

²⁶ Yemha dhaok phaakjao meishi nephaakpü nevaijü hetlei neshaipü kemei am shingvaishi nedaüpü nyüke; üami hathü yemha mahng hük kü dangkao honghenshang nedaüpü leihen.

²⁷ Lakhila ali kohtü lakdheni shükei kampü yemhathü peü am shingvaishi nedaüpü nyüke; hathü yemha mahng hük kü dangkao hongjema om dhüshi nedaüpü leihen.

²⁸ Hanei-i hapalei mahng homjema büpalei ashakviha dhotükhen, hatü büpayü om dhüshi nedaüpü leihen. Hathüyü am shingvaishi nedaüpü nyüke.

²⁹ Kahdokei lüteipü yemha khongkü hathü am shingvaishi nedaüpü nyüke: yungmoi, yüphüh, moihang,

³⁰ shem khangha, yiüthi khangha, bhihdü khangha, hatü ouhah khangha.

³¹ Kahdokei lüteipü hathü kemei am shingvaishi nedaüpü nyüke. Üami hapa mahng kü honghenshang, om dhüshi nedaüpü leihen.

³² Mechem hathü khongkü hük dangkao diyei vüei shaei noteipü douhinang, püi lingpü dou, ashakviha, phaishuwi lingpü dou nevaijü dhoila vaijao lemhük kü dangkao shükjema, nedaüpü leihen. Hapa yung kü hingeishuoh; hapa om dhüshi nedaüpü leihen, hapheikü mon daüdaihen.

³³ Hathü khongkü hük dangkao haümdük mongei vüjema, ha mongeipü lemphü nedaüpü nyüke, hatü hapa haümdük bhaotükhen.

³⁴ Hahhen hahying kü hapa keipü dük kübü yung shihjema, hatü hapa keipü dük kübü yingbenüng kemei nedaüpü vaihen.

³⁵ Hathü yemha mahng hük dangkao vüei aandük hatü nükdük haodük kü shükjema, ha dük bhaotükhen. Hapayü nedaüpü nyüke, hatü hapayü am shingvaishi nedaüpü nyukahen.

³⁶ Yungdük nevaijü yungdam daülangi nyupü kü hathü mahng hüki dangkao hongjema nedaüpü leihen.

³⁷ Sheihen sheilivungla kü hathü yemha mahng hük dangkao vüei shükjema, hayü daülangpü vaihen.

³⁸ Shejao hapa sheili yung kü vaümei nyushi hathü yemha mahng ha shangkü vüjema, hayü am shingvaishi nedaüpü vaihen.

³⁹ Am kü hahhen epü yemha khongkü hük dangkao dijema, hatü hapa mahng kü hanei-i hongjema, om dhüshi nedaüpü leihen.

⁴⁰ Hanei-i hapa yemha mahng phaihan hanei dangkao hahjema, büpai laophülei ashakviha dhotükhen, hatü om dhüshi nedaüpü leihen. Üpai hapa yemha mahng homei yahhen, büpai laophülei ashakviha dhotükhen, hatü büpa om dhüshi nedaüpü leihen.

⁴¹ Kahdokei lüteipü yemhamakha lemphü nedaüpü nyüke; hapayü nehahhen vongbong.

⁴² Vomi lüei daipü yem nevaijü la ali-i kampü yem, nevaijü la longi kohpü yem vaijao kahdokei kamteipü yem mepayao ammi nehahhen; hapayü jiühitbenüng nyüke.

⁴³ Hathü yemhimak homei am nyingi nedaüi telei. Hathü hahpai am nyingi nedaünelangi telei nevaijü hathü homei am teshaihü.

⁴⁴ Ngeiyü Shembüpa, ammei Kahvang; am nyingi daülangi nyutuh; mehenangkü ngeiyü daülangpü. Kahdokei lüteipü yemhimak homei am nyingi nedaünelangpü telei.

⁴⁵ Ngeiyü ammei Kahvang vaihen shingvaishi am Ijip leipü müei leipü Shembüpa; hanangkü am daülangi nyutuh; mehenangkü ngeiyü daülangpü.

⁴⁶ Hathüyü yemhimak, ouhiyüh, yungmongei lüteipü yemha hatü kahdokei lüteipü yemhamakhathü nangkü shuohpü shahkungnyü nyüke.

⁴⁷ Ammi nedaüpü hatü daüpü, hahbenüng hatü nehahbenüng yem nyi baong hanhen vongbong nyüke.