LEVI 1 - DAÜLANGPÜ LAIHING (BSI)

Jakpü Moila

¹ Shembüpai Mosa kü ashakshem leipü nyükei eteke:

² Israel nanglakthü kü hapakei eyeishuoh: Mechem shennyak hanei-i Shembüpa kü moila shuohhenshang, büpai büpalei mohoh nevaijü mi khong kübü shuohtuh.

³ Hapa moilayü mohoh khong kübü jakpü moila vaijema, ammi kawhikang neshiüpü shuohhen vongbong; Shembüpai hapa yahaokhen shingvaishi ashakshem shadenei deiyei shuohtuh.

⁴ Büpai jakei shuohhen yemhalei shangjing kü büpalei laki dükhütuh, hatü hapayü büpalei mang tükhen shingvaishi hapa jakpü moila yahhen.

⁵ Hapa mohohbaongü Shembüpa tou kü jühen vongbong, hatü Aaronei cheha ngongpathüi ashakshem shadenei nyupü moidü shing peü shinei iy haihütuh.

⁶ Hapa jakpü moilayü shuw nyiukhen hatü phai heanlem nyingei dehtuh.

⁷ Ngongpa Aaronei chehathüi moidü kü aw haphen hatü aw kü pü jakhen,

⁸ hatü Aaronei cheha ngongpathüi moidü shang kübü aw bahpü pü kü shangjing, hatü cheü shei phai heanlem nyingei,

⁹ shejao hapalei thenleimongphang hatü la shei yungi paütükhen, hatü ngongpai hathü kemei moidü shangei jakhen. Hapayü Shembüpa kü vong meipü aw kü jakpü moila nyüke.

¹⁰ Hapa moilayü mi nevaijü yum khong kübü jakpü moila vaijema, büpai yem chebaong kawhikang neshiüpü shuohtuh.

¹¹ Büpai hapayü Shembüpa tou kü moidü apsha philei jühütuh, hatü Aaronei cheha ngongpathüi moidü shing peü shinei iy haihen.

¹² Hapayü heanlem nyingei khih mü dehhen hatü ngongpai hapayü shangjing hatü cheü shei hengei moidü shangei aw bah-ei nyupü pü shangkü haühen.

¹³ Büpai thenleimongphang hatü la yungi paütükhen, hatü ngongpai hathü kemei deiyei moidü shangei jakhen. Hapayü Shembüpa kü vong meipü aw kü jakpü moila nyüke.

¹⁴ Shembüpa kü hapa moilayü ouhiyüh jakpü moila vaijema, moilayü athuba nevaijü khakhi ou moilatuh.

¹⁵ Ngongpai hapa moidü touei deiyei shangjing dehtükhen, hatü moidülei hapa shangjing jakhen; hapalei iy moidü shinei haihen.

¹⁶ Büpai hapalei hetdung hatü haleipü het yah-ei moidü heongphi depla langshingei yaktükhen.

¹⁷ Büpai hapa yang kü düktü yang nephentüki büm kü shaakhen, hatü hapa dhaomü moidülei jakhen. Hapayü Shembüpa kü vong meipü aw kü jakpü moila nyüke.