KOLOSI 4 - DAÜLANGPÜ LAIHING (BSI)

¹ Shembüthü, ammei aathü kü jiüshi hatü meishi noteituh; mehenangkü vangsholei ammei Shembüpa nyüpeih shei ammi nyingei nyüke.

Nyuhpüvenpü

² Phoppü kü lanei shuohtuh, hatü menvih shuoh-ei hapa kü thashimashi nyutuh.

³ Ha mü chemi hami Khristalei shahjo mepa shingvaishi ngei khoklatei küp, hapa shah ehen Kahvangi shaden aptuh shei hamphong shing phopshih,

⁴ shejüang ngei ehen jiüpü lekhingei shakei vamhüaokhen.

⁵ Hepak mei angei haolei nyupüthü touei ammi kon kohshi düktuh.

⁶ Ammi peü kü mekei shahnyok shuohhen ha nyinghen shingvaishi ammei shah-engeüshei kü phahji hatü hüm kei vüngnyangi nyuhütuh.

Dohpü Selam Shah

⁷ Tekhikus-i ngei jung shahjang peü am kü ekahen; büpayü bampü jeihinaü, hingshangpü chongphobü, hatü Shembüpa kü chemi chongphobü.

⁸ Hamphong mekei nyu ha ammi nyinghen, hatü büpai am kü mongnang thonghen hapa mükhong kü ngei büpa am touei shomnyüpeih.

⁹ Büpa hingshangpü hatü bampü jeihinaü Onesimus, amphong khong kü hük mü peikünyüke. Jijinyi-i hatoueipü lemphü am kü ekahen.

¹⁰ Ngei mü khoklatei küppü Aristarkhas-i selamja, hapakei Barnabaslei cheli Markiyao selamja. (Mark am lemei peiküjema mongongshi yahtuh shei epü shahyan ammi dangphei),

¹¹ hatü Jisu, üpa kü Justus sheiyao nyüknya, büpaiyao selamja. Kahvang ongching shingvaishi chemi chongphopü japtükpeyü jomphong hih, hatü jomphongü ngei shing nyiushemmei nyuhampeih.

¹² Amphong khong kübü Jisu Khrista chongphopü Epaphras-i selamja. Am behe leiyei Kahvangi mongpü lemphü meishi mongkü ponghen shingvaishi am nangkü büpai düngei phopnyanyüke.

¹³ Büpai am hatü Laodikea hatü Hierapolislei nyupüthü shingvaishi kheyei düknyüke shei büpa nangkü ngei denpü shuohnyeih.

¹⁴ Luke, bampü meli nobü hatü Demas nyi-i selamja.

¹⁵ Laodikealei nyupü jeihinaü nyahinaüthü, hatü Nempha, hatü jomei shemei nyupü attoi am kü selam shei ete.

¹⁶ Mechem ammi hapa lai iekemhenshang Laodikea attoi amiyao ha iehütuh, hatü ammi Laodikea amei laiyao ietuh,

¹⁷ hatü Arkhippas kü, “Shembüpa kü nüngi dangpü dousho temhen kentuh” shei eyeishuoh.

¹⁸ Ngei, Pauli hapa selam lai ngelei laki nyangnyeih. Ngei khoklatei küppü deih-ei dangtuh. Am mü phahji nyute.