KOLOSI 1 - DAÜLANGPÜ LAIHING (BSI)

Selam Shah

¹ Paul, Kahvangi mongpü homei Jisu Khristalei phongshan hük hatü jenei jeihinaü Timoti leipü,

² Kolosi kü nyupü Khrista kü daülangpü hatü hinglempü jeihinaü hatü nyahinaüthü touei, Jenei Pa Kahvang leipü phahji hatü chingmei nyute.

Menvih Shuoh-ei Phoppü

³ Am shingvaishi hami phopshingkü jenei Shembüpa Jisu Khristalei Pa Kahvang kü düngei menvih shuohnyeih.

⁴ Mehenangkü Khrista Jisu kü ammi hinglempü hatü daülangpüthü peü kü ammi bampü jung hami dantepih;

⁵ mehenangkü am shingvaishi vangsholei monglemhen tuh-ei nyüke. Ammi hapa monglem jung shelei-üng shahhing shah, shahjangmei,

⁶ am touei peipü homei danei nyüke. Kahdoknyü kempülei hapai betjük jükei longpü keiha ammi ha danpü nyih kübü amphong touei hapa shahjangmei-i betjük jükteke, hatü hingshangi Kahvang phahji nyingteke.

⁷ Hapayü ammi chemi chongphopü bampü Epaphras leipü danteke. Büpayü ammei men kü hingshangi Khrista chongphobü hük,

⁸ hatü Laangha kü am bamteipü büpai ham kü nyinghüpeih.

⁹ Ha vaipü nangkü hami ha danpü nyih kübü hami am shingvaishi laangha kihikon hatü nyingpühingpü peü kü Kahvangi mongpü nyingpühingpai am mahen nangkü yüei phoppü nedohnyih.

¹⁰ Shejüang Shembüpa touei changpü yangnyu nyuei lem peü kü büpa mong hahhühen, doumei peü kü betjük jükei Kahvang nyingpü kü longhen nangkü hami phopnyeih.

¹¹ Amphong büpalei müknyinshekhang ngan kübü peipü wongi am wong kohhühen, hatü nenteiaokpai ammi lemphü munenhen temhen, hatü mongongpai,

¹² amphong vangngai ongching kü daülangpüthü mü mükjüp hanteihen mü amphong mükjüp yahpü am leihüpü Pa kü menvih shuohtuh.

¹³ Mehenangkü büpai jen vangnyaki vanglem lempü kübü jen yangei büpai bampü Halei ongchingei jen müei leiteke.

¹⁴ Büpa kü jen angei leipü hatü mang tükpü nyüpeih.

Khrista hatü Büpalei Dou

¹⁵ Büpayü müki ne-eepü Kahvang lajei, lingpü peü kü shongpüba.

¹⁶ Mehenangkü büpa kü vangsho hatü kahdoknyü kübü müki eepü, hatü müki ne-eepü dou peü ling: Ong uoshing vaijao, vanglem lempü vaijao nevaijü vanglem lempüthü nevaijü yemya yapüthü vaijao dou peü büpa homei ling, hatü büpa shing ling.

¹⁷ Büpa laophü nying douthü peü shekü nyu, hatü büpa kü douthü peü chemi shoungei nyüke.

¹⁸ Büpayü büm, hakeiha attoi kü shangjing, büpayü chongpangpü, dipü kübü yangei leipü shongpüba. Hanangkü lemphüli kü büpa kü monha shongpü uoshing nyüpeih.

¹⁹ Büpa kü Kahvang dei-aei maei nyuhen mong hahpeih,

²⁰ hatü büpa homei monha Kahvangi dou peü kahdoknyülei vaituh, nevaijü vangsholei vaituh büpa touei mongjemhühen, hatü büpalei shophang iy homei chingmei linghen mong hahpeih.

²¹ Chem amphongü Kahvang kübü yanei ammei mongei ve lingei douten dükteke.

²² Büpai shaang büpalei phai büm kü dipü homei mongjemhüteke, hatü hapayü amphong büpa touei daülangi, eela neshiüi hatü thaüvaühen neshiüi nyuhen shingvaishi nyüke.

²³ Hanangkü ammi vangsho phang kübü hangkuli peü kü baongpü shahjangmei homei lahpü monglem mepa ammi dan, ha kübü nemoiloi-i hapa kü nedoh-i chongwongei vaipü kü wongshongi nyutuh. Paul, ngeiyü hapa shahjangmeilei chongphobü leipeih.

Khristai Paul kü Kangpü Dou

²⁴ Shaang ngei ammei men kü shangpongpü kü mongongnyeih, hatü Khristai büpalei büm lappai, attoi shingvaishi shangpongpü kü mepa taoei nyu, ha ngelei phai kü changhünyeih.

²⁵ Kahvangei shah changei nyinghühen nangkü am shingvaishi ngei kü shuohpü Kahvangei kangpü dou aimü ngei hapalei chongphobü leipeih.

²⁶ Den longi hatü hüdenhalenshi jaoei tuhlangpü shahjo ha shaang büpalei nanglakthü kü shakei vamhüteke.

²⁷ Kahvangi büpalei hapa shahjo müknyinshekhang mop Kung am touei meshük longpa, ha nyinghühen shingvaishi jomphong jepeih; hapayü am kü nyupü Khrista, müknyinshekhangpü monglem.

²⁸ Peü Khrista kü behe leihühen shingvaishi kihikon kempai peü kü shahvüng shuoh-ei, peü kü nyuh-ei hami baongpeyü büpa hih.

²⁹ Hapa shingvaishi büpai ngei kü shuohpü wong kemei ngei hokeiheiyei dou düknyüpeih.