KANDOK 7 - DAÜLANGPÜ LAIHING (BSI)

Mükbongjuyung Nedükhen Epü

¹ Ngelei hapeü, ngei epü düktuh, hatü ngelei shahkungthü nüngei mongei tuhtuh.

² Ngelei shahthü noteituh, hatü nüng yem mü nyuhen; ngei nyuhpüvenpüthü nüngei mük kü jungpükei jungtuh.

³ Hathü nüngei lakjaang kü sheptuh, hatü nüngei mongdang yaongshung kü nyangtuh.

⁴ Kihikon kü, “Nüngü ngelei nyahinaü” shei eyeishuoh; hatü danaokpü kon kü, “Nüngü ngelei jeihinaü” shei nyükeishuoh.

⁵ Hathüi nüng mükbongjuyungla kübü, hatü mong nehingpü yawhshah epü nyüha toueipü yangphahen.

⁶ Ngei ngelei shem ümha shaden homei veishingkü,

⁷ nethethü khongkü bahük sholi neshiüpü ngei eeteke.

⁸ Büpa chingshongei daishingkü pinnyülei shem lemei,

⁹ Om dhüdai pheikü, nyakdaiyaki peih-ei daiteke.

¹⁰ Hahepak kü nyüha hük büpa mü ponghen büm yupü nyüha hük leshi, ow temtüktü ten deihshi vamteke.

¹¹ Pinnyü-ü monglongshi, veüshe nekoh-i chingshongei mon kamtei;

¹² shaang-üng chingshongei, shao shaang-üng chingshoukei, hatü shaang-üng banghthai shingei danei yaongteke.

¹³ Pinnyüi büpa kü baktü ju kü jüp, hatü dhe khangei veitü büpa kü,

¹⁴ “Shinnyih ngei shemei mongjempü moila shuohnyüpeih, ngei lahtükpü shinnyih düknyüpeih.

¹⁵ Hanangkü ngei nüng yemei daipü shaang heünyu khih!

¹⁶ Ngei ngelei shinshing Ijip leipü ow kohpü nyemin ashaki jümtüktü nyüpeih;

¹⁷ Ngelei shinshing kü vong meipü büpü myrrh, aloe, hatü cinnamon meli-i kaptüktih.

¹⁸ Huoi, nepnüng dhom ngoishi ji bamteipai mahüshah; ji bamteipai ji mongongteishah.

¹⁹ Ngelei baha shemei neshiü; büpa tailu yen kü lüdaiteke.

²⁰ Büpayü khongha maei lop kotü lüdaitih; hapa len mahshi neleiküpih” shei eteke.

²¹ Pinnyülei yawhshah-i büpa yawhlang; pinnyüi inyainyiami epai büpa nganlang.

²² Mohoh jüshingei mohoh ngashi daipü keiha büpai pinnyü phei kü mü, hatü shaoki vunglük kü laongei,

²³ mongdang bhaoshi hümhahpükei laongteke. Ou-i laophülei yangnyu mahhen nenyingi tailok touei heihpükei büpa pinnyü phei kü dai.

²⁴ Hanangkü shaang, ngelei hapeüthü, ngei epü bangtuh, hatü ngelei shahthü kü mong shuohtuh.

²⁵ Nüngei mongdang pinnyü lemei telep, nevaijü pinnyüi hupü lemnyong kü tekam.

²⁶ Mehenangkü pinnyüi longi lomohhütepih, hatü longi jütepih.

²⁷ Pinnyülei shemü Sheolei daipü lemnyü khih, hatü hapayü dipü lemei müpü denshoh lem khih.