KANDOK 5 - DAÜLANGPÜ LAIHING (BSI)

Nedaünelangpü Kübü Yanhen Epü

¹ Ngelei hapeü, ngelei kihikon kü mong shuohtuh; ngelei danaokpü kon kü nüngei dhaong shaangtuh;

² Shejüang nüng kenhingmonghapü leihen, hatü nüngei jubeni nyingpühingpü yaongei tuh-aokhen.

³ Mehenangkü mong nehingpü nyüha hükei ju kübü nyahjiü yennyüpeih, hatü pinnyülei shah-e ngeüsheiyü mainga mao nyüpüba nyunyüpeih;

⁴ shejao dohpülei pinnyü-ü mohoh yiü mao shahpüba, hatü nyonghidah kü nah kohpü yan kei nyüke.

⁵ Pinnyülei la yimchingei müei shünyüpeih; pinnyülei lakham ieyei Sheol lemei münyüpeih.

⁶ Pinnyüi yangnyu lem kü jiüshangi nekamnyih; paüeiyonei longteinyeih, hatü pinnyüi ha nenyingnyih.

⁷ Hanangkü shaang, ngelei hapeü, ngei epü bangtuh, hatü ngei epü shahthü kübü teyandai.

⁸ Nüngei lem pinnyü toueipü khaatei tuhtuh; hatü pinnyülei shaden yopailei nüng teheih.

⁹ Hei nevaijema, nüng kü nyupü dhüm mih kü shuohtükhen, hatü phahji neshiüpüthülei lak kü denshohvanloh ponghen.

¹⁰ Yenpa oupai nüngei mop hah-ei jom shümoh meihen, hatü nüng nyiutüknangtükpü kemei mihsha mihshem vangmeihen;

¹¹ hatü nüngei yangnyu dohpü mü, nüngei büm hatü hangha phai kemei mindaijü,

¹² nüngi, “Mehekei ngei kü venpü shah kü ngei jiuhitpa, hatü ngelei mongdangi yeanpü shah neyahhahnya!

¹³ Ngelei nyuhbüthüi epü ngei nebang; ngelei venbüthüi venpü kü ngelei dhaong neshaang;

¹⁴ Sheyü ngei banghthai shingei hai danghen mon nyüke” shei thepei ehen.

¹⁵ Nüngei yungdük kübü yung, hatü nüngei yungkuk leipü vampü yung mon yingtuh.

¹⁶ Anyüha mü mon shahhing kü nyutuh; nüngei lihila chingshongha teleitük.

¹⁷ Nüngei hapeüthüyü nüngei lompü vaihen, nüngi hapa mihsha mihshem mü tehantei.

¹⁸ Nüngei yunglok moihimanhen; nüngei theden mü yahpü nyüha mü mongongteituh.

¹⁹ Pinnyü-ü bamhüpü, veinyuhüpü shaok keiha nyüke; Pinnyülei amma-i nüng düngei hüshemei, pinnyüi bampai nüng monghamei nyuhütuh.

²⁰ Ngelei hapeü, mehekei mih-ei nyüha mü nüng hüshemhen? Mükbongjuyungla mü mehekei küei jemhenang?

²¹ Mehenangkü shennyak hükei lemthü kü Shembüpai veinyüpeih; hatü büpai lemthü peü dokei veinyüpeih.

²² Nemeipüthülei mangi jom kü-üng hühhihang leinyüpeih, hatü jomei mang kü-üng jom mandainyüpeih.

²³ Ungei-aeipü neshiüi jom dinyüpeih, hatü jom ngapüyoipai lemnyong kü mahnyüpeih.