KANDOK 31 - DAÜLANGPÜ LAIHING (BSI)

Lamuel Ongpai Epü Kandok Shahthü

¹ Hathüyü chenyüi büpa kü nyuhshuohpü Lamuel ongpai epü kandok shahthü nyüke:

² Oh ngelei hapeü, Oh ngelei naü uoshing kübü hapeü, ngei phoppü kü jangei dangpü hapeü.

³ Nyühathü kü nüngei wong tetük; ongpathü mahtükhen lem kü tekam.

⁴ Hapayü ongpathü shing nevaipih, Oh Lamuel, Yiü yinghenü ongthülei dou nevai, nevaijü vanglem lempüthüi chokpümokpü hahhen nevai;

⁵ Hei nevaijema jomphongi yiü yinghen, hatü shahkungnyü betükhen, hatü hanghipü nanglakthü kü jiüpü nedükaokhen.

⁶ Mahdainüng shei nyupüthü kü chokpümokpü yah-eishuoh, mongtok kü nyupüthü kü yiü yah-eishuoh;

⁷ Jomi yiü yingtü jom taopü nyembetükhah; hatü jom ponghahpü nyemnedeihnüng yiü yingeishuoh.

⁸ Laophü nang ehah ne-aokpüthü, hatü nehahneyingpüthü peüi jiüpü hean danghühen shingvaishi nüngi etuh.

⁹ Shah etuh, hatü jiüshangpü shahphen shuohtuh; Taopa hatü nehahneyingpüthüi danghen jiüpü med kü yaongtuh.

Kenhingpü Nyüha Hükei Deiaei

¹⁰ Kenhingpü nyüha üpai dangaokhen? Pinnyü-ü douvang yaong mao nyeinya meipüba.

¹¹ Chepahai pinnyü kü monghahnyeih, hatü büpa meheiyao taoei nenyunyih.

¹² Pinnyülei yangnyu den kemei büpa kü ten nevai, mei mon düknyüpeih.

¹³ Pinnyüi mimum hatü nyemin vi mon yemnyüpeih, hatü shüeinyiükei düknyüpeih.

¹⁴ Pinnyü-ü tailu kahdok leipü hahying koei leipü jahas kei hahying koei leinyüpeih.

¹⁵ Vangngai shekü pinnyüi shin lomi paonyeih, hatü pinnyüi shem am kü ühyingnyeih, hatü chongphopü nelathü kü dükhen dou hunyeih.

¹⁶ Pinnyüi kah kü meishi veitü hapa kah shaknyüpeih; Pinnyüi latpü lopi halei nyalingngupai sheinyüpeih.

¹⁷ Pinnyüi douwong dükhen shünglok loknyüpeih; hatü dou dükhen lak kü wong kohhünyeih.

¹⁸ Pinnyüi pinnyü bhei leihpü kü nanglei dangnyüpeih, hatü vangnyak kao aw hapshi dou düknyüpeih.

¹⁹ Pinnyüi laophülei vi bhawnyeih, hatü laophülei dok-üm ashak daknyeih.

²⁰ Pinnyüi taopathü kü laophülei lak lainyeih, hatü nehahneyingpüthü kü sheühnyüpeih.

²¹ Jomshemi shü vühen kü nenyemnyu; mehenangkü jomshem kemei shaamlukpü ashak ümshi nyüke.

²² Pinnyüi shinshing kü nyemhen ashak daknyüke; pinnyülei ashakü nyeminpü, hatü mangshümpü ashak nyüke.

²³ Chepahayü chingnyü penyüshalei dhüm shuoh-ei yahnyüke; Büpayü kahmük kü mübüthü mü uonyüke.

²⁴ Pinnyüi nyemin ashak hatü shüngshep daknyüke, hatü hathü yunyüke.

²⁵ Pinnyü-ü wong kohshi, hatü dhüm kohshi nyüke, hatü ngoikahen nyihthü nangkü nyemei neshiü.

²⁶ Pinnyüi kihikoni shah enyüke, hatü shahhing nyuhpüvenpü pinnyülei yeijaangei nyüke.

²⁷ Pinnyüi düngei shemong dousho kü veinyüke, hatü nehet hahying nehahnyu.

²⁸ Pinnyüei hapeüthü longei pinnyü kü, “Moihimanpü nyü” shei nyüknyüke; Pinnyülei chepahaiyao pinnyü kü vihnyüke.

²⁹ “Nyüha longi nyümei dou düknyüke, shejao peü mü nüng-üng nyeipü khih” shei eshuohnyüke.

³⁰ Hangbong meipeyü mahdaihen, dhemeilaümapeyü lüdaihen, shejao üpa nyühai Shembüpa kü nyemnya, pinnyü kü vihhen nyüke.

³¹ Pinnyüi dükpü dou kü thintho yah-eishuoh, hatü pinnyülei dou kü chingnyü penyüshalei dupü-oupü yah-eishuoh.