KANDOK 29 - DAÜLANGPÜ LAIHING (BSI)

¹ Longi lohhah pheikü üpai mong vaanei nyuhenshang, yanglem neshiüi topshi mahhen.

² Mechem daülangpüthüi vanglem lemhen, nanglakthü mongongnyeih; shejao mechem nemeipüthüi vanglem lemhenshang, nanglakthüi mahng thepnyeih.

³ Kihikon kü bampü hapeüi laophülei pa mongonghünyeih, shejao üpai büm yupü am mü jemteinya, mop daümnyüpeih.

⁴ Shahhing homei ongpa hüki kahmük hük chong wonghünyeih, shejao üpai yawhdou kü kennya, büpai ha bentüknyeih.

⁵ Üpai laophülei chingyowpa kü shahshemi dueiounya, büpai laophülei la kü tai haenhahnyeih.

⁶ Shennyakten hüki laophülei mangei tai kü mannyüpeih, shejao daülangpü hüki kesho lokei mongongnyeih.

⁷ Daülangpüthüi taopathü kü jiüpü dükhen kennyeih, shejao nemeipüthülei mongkü henüng leyei neshiü.

⁸ Nebahnevaipüthüi ching hük awi haptüknyeih, shejao kon kohpüthüi mongshih meitükaoknyeih.

⁹ Mechem kon kohpü shennyaki ngapa mü shahphen shingei shah dakteihenshang, ngapai mongshihnyeih, nyinyeih, hatü mong netheannyih.

¹⁰ Iythüng anhüpü shennyaki hingshangpüthü kü jiühitnyeih.

¹¹ Ngapa hüki dendoh mongshihnyeih, shejao kon kohpü shennyaki ungei-aeiyei tuhlangnyeih.

¹² Vanglem lembü hüki shahshem kü bangjema, büpalei lakchongbüthü kemei shennyakten leidainyeih.

¹³ Taopa hatü shüveipa nyiphen kü ha aihük mü nyüpeih: Jijinyiphen kü eehen mük Shembüpai khan shuohnyeih.

¹⁴ Ongpa hüki taopathü kü baong nehani shahphenjema, büpalei ong uoshing den kü wong kohshi nyuhen.

¹⁵ Hanbhi hatü lohpümangpai kihikon shuohnyüpeih, shejao neveni longhahpü hapeüi nyü veühünyeih.

¹⁶ Mechem nemeipüthüi vanglem lemhen, jüteishangteipü ahnyüpeih, shejao daülangpüthüi hathü dopü eehen.

¹⁷ Hapeü ungei-aeituh, hatü büpai nüng kü nyiushemmei yahphahen; büpai nüngei laangha kü mongong koei leikahen.

¹⁸ Melei tetpüvanpü nenyu, halei shümeishuoppü neshiü; shejao üpai shahkungnyü noteinya, büpa moihiman.

¹⁹ Shah mon epai chongphobü hük kü yeanpü neshuoh-aoknyih; jomi nyingjao hapa kü dhaong neshangkahen.

²⁰ Deih-ei nevei-i shah epü shennyak nüngi eela? Hapa keipü shennyak leimeyü ngapa kü-üng nyeishi monglemhen nyüpeih.

²¹ Shennyak hüki aa hük kü hashih mebü büpai napü peü shuohjema, büpai dohpülei mongshang koei leikahen.

²² Mongshihpai dehilao vamhünyeih, mongshow kohpü shennyaki mang longi thahnyüpeih.

²³ Shennyak hük changmeipai laophü-üng vünyüpeih, shejao maanpü leipü shennyaki dhüm dangnyüpeih.

²⁴ Gühpa mü mongjem pongpeyü laophülei yangnyu kü jiühithahpü mon; Shahhing denpü neshuohhen büpa vanghütü tuhnyeih.

²⁵ Shennyak kü nyempeyü aethitai leinyüpeih, shejao üpai Shembüpa kü nyemnya, yangei nyuhen.

²⁶ Peüi vanglem lembü leipü yahyang shinshang yemnyeih, shejao shennyak hüki shahhingü SHEMBÜPAleipüdangnyüpeih.

²⁷ Daülangpüthüi nedaünelangpüthü kü jiühitnyeih, hatü nedaünelangpüthüi daülangpüthü kü jiühitnyeih.