KANDOK 28 - DAÜLANGPÜ LAIHING (BSI)

¹ Üpaiyao nechangpü kü nemeipüthü nyaidainyeih, shejao daülangpüthü mailang kei monglongnyeih.

² Mechem kahmük hük kü podongpolong vamhenshang, vanglem lempü longi vamnyeih; shejao danaokpü hatü nyingpü shennyaki chingmeivangmei kü tuhnyüpeih.

³ Taopathü kü shüveipü vanglem lembü-ü sheili bhonglangpü bhiyung kei nyüke.

⁴ Üami shahkung yakphongnya, hathüi nemeipüthü kü dunyüpeih, shejao shahkung bangpüthüi hathü mü khünyüpeih.

⁵ Shennyaktenthüi shahhing nyingei neaoknyih, shejao Shembüpa yempüthüi hapa meishi nyingnyüpeih.

⁶ Shemmei vaitü lemnyong kü kamlei meyü, taojao shahhing kü kampü-üng meipüba.

⁷ Üami shahkung noteinya, jomphongü kon kohpü hapeüthü; shejao hahnempüthü mü jemteipüthüi laophülei pa hai danghünyeih.

⁸ Üpai mih-i lupü bheishe hang kü bhüpü longi üei yah-ei shemmei leinya, büpalei mopü taopathü kü bampü shennyakei lakmongei shüdaihen.

⁹ Üpai shahkungnyü kü dhaong neshaangnya, büpai phoppeyü jiühitbenüng.

¹⁰ Üami daülangpüthü lemnyong lemei mühenshang, jomi laophüi shohahpü kahsha kü vühen; shejao eela neshiüpüthüi mükjüp meipü danghen.

¹¹ Shemmeipai ngei-üng kon kohpeih shei deihnyüpeih, shejao yao-aokpü taopa hüki büpa peipeilei-i eenyüpeih.

¹² Mechem daülangpü shennyaki vanglem lemhen, peüi mongongnyeih, shejao mechem nemeipüthüi vanglem lemhenshang, nanglakthüi jolem yemdainyeih.

¹³ Mang jopü shennyak mechemao moihiman nedangpih, shejao üami mang lahnya, hatü ha nedüknya, jomi phahji dangnyeih.

¹⁴ Üpai düngei Shembüpa kü nyemnya, büpa moihiman! shejao üpai mong vaanei nyunya, büpa vongshüh kü vühen.

¹⁵ Ngüngei nyupü mailang, nevaijü kethen nyeandaipü sheptao keiha, taopathü shak kü nemeipü shennyaki vanglem lempü nyüke.

¹⁶ Danaokpü neshiüpü ongpayü mih kü shüveipü vanglem lembü, shejao üpai shahshem kü jiühitnya, yangnyu shoshoei nyuhen.

¹⁷ Shennyak hanei-i mih jüpü mang jotü hanghijema, büpa mangdi thahshi paüeiyonei angtuh; üpaiyao büpa kü tesheüh.

¹⁸ Üpai shahhing kü kamnya, büpa yanghen, shejao üpai nejiüpü lem kü kamnya, ngangahük kü mahhen.

¹⁹ Üpai kheyei kah lingnya, büpai hahhen danghen, shejao üpai angsha dousho kü changteinya, taohen.

²⁰ Shahhing epü shennyakü moihimani maei nyuhen, shejao üpai shemmei leihen shaoksheünya, mechemao nehanghi-i nenyupih.

²¹ Dhe veiyei dou dükpeyü nemei, shejao haneiyü nük omhük tata kü nejiüpü düknyeih.

²² Taohinangi büpa danei nyüpeih shei nenyingi kaungtut shennyaki shemmei leihen shülangnyeih.

²³ Yawh-eiyangei epü meyü üpai shennyak hük kü yeanei lohshuohnya, büpai pheilei mongmei eehen.

²⁴ Üpai laophülei nyühiha leipü güh-ei yahtü, “Hapayü pungpü nevai” shei ehenshang, büpayü ten dükpülei mongjempa.

²⁵ Hahnempü shennyaki dehilao vamhünyeih, shejao üpai Shembüpa kü hinglemhen, lemphü anghen.

²⁶ Üami laophü kü monglemnya, hathüyü ngapathü; shejao üpai kihikon kü kamnya, büpa yanghen.

²⁷ Üpai taopa kü shuohnya, büpa meheiyao netaohen; shejao üpai jomphong eeyao ne-eepükei nyunya, thaüvaü longi danghen.

²⁸ Mechem nemeipüthüi vanglem lemhenshang, nanglakthü jolem yemdainyeih; mechem nemeipüthü mahhen, daülangpüthü danyüpeih.